﻿Titus.
2.
Maca cek, siweř min ittřiqen i tɣuri n ṣṣaḥ. 
Seřmed imɣaren maḥend ad iřin faqen, ad uyuren s tsexxayt d tazdugi d l’iman n ṣṣaḥ u s tayri d ṣṣbar. 
Seřmed tiwessura ɛawed ammu, maḥend ad ggurent am dd-ittřiq ak-d tiggʷudi zi AREBBI, war ttceqqifent ca, war wcint i binu, maca ejj i-tent ad ssřemdent min iṣebḥen, 
ḥima ad cejjɛent tibřiɣin ad uyurent s uweqqar, ad xsent iryazen nsent d tarwa nsent, 
uca ad daysent yiři utebbet d tqeddast, ad wcent taynit i ayt bab n taddart nsent, ad ggent array i yeryazen nsent, ḥima uřa d ijj war ittceqqaf ca deg wawař n AREBBI. 
Cejjɛet ɛawed ibřiɣen ḥima ad uyuren s tsexxayt. 
Egg ixef nnec di marra d lmital, di marra řexdayem tiṣebḥanin, u xmi tessřemded, ḥḍa maḥend ad yiři wawař nnec d ṣṣeḥ, 
s řeṣfayet břa řɣecc, uca war t isseḥqar uřa d ijj, ař ɣa iseḍḥa wenni d aneɣ ittɛekkasen umi war izemmar ad xaneɣ issiweř s uřa d ijj n wawař issfeṭṭaḥen. 
Ittxeṣṣa i imsexxaren ḥima ad ṭṭaɛen i aytbab nsen di marra, ad asen arḍan, war ten ttɛekksen. 
War iɛeddeř ad acaren, maca ejj i-ten ad ssecnen řmanet nsen icnan, ḥima ad ittwagg ccan i tɣuri n AREBBI, wenni d aneɣ itticen Tudart. 
Minzi arḍa n AREBBI i issakkwaḍen asenjem i marra, aqa iffeɣ-dd i marra iwdan. 
Arḍa nni ittarebba aneɣ maḥend ad nᵉttejj řeqjaḥet d nnecwat n ddunect, maḥend ad neddar di ddunect-a s tsexxayt d tsegda u s tiggʷudi zi AREBBI. 
Ammu i nettraja asitem ittwabarken uřa d asargeb n uɛuǧi n AREBBI ameqqran d wenni d aneɣ itticen Tudart: Yasuɛ Lmasiḥ. 
Netta d wenni i xaneɣ iwcin Ixef nnes deg wemcan nneɣ, maḥend ad aneɣ isellek zi marra řmuɛṣiyyet, ḥima ad issizdeg i Yixef nnes ijj n řgens imeḥḥḍen i řexdayem tiṣebḥanin. 
Siweř x man aya, ziyyar u webbex s marra jjehd, war ttejji ḥed ad cek isseḥqar. 
