﻿2 Itissalunikiyyen.
2.
Aqa nᵉttzaweg kenniw, a aytma, zi jjihet n twasit n Siditneɣ Yasuɛ Lmasiḥ d wesmuni nneɣ ɣares, 
aqa war tᵉttnexřiɛem niɣ tesḥissfem ca deɣya, war iǧi s ijj n wawař niɣ s ca n arruḥ niɣ s ict n tebrat axmi zzayneɣ, i iqqaren: “Xzar, ass n Siditneɣ yusa-dd!” 
War ttejji uřa d ijj ad kenniw iɣwa s ca n webrid, minzi ass nni war dd-ittis qbeř i dd ɣa yas uɣewweɣ uca ad dd-iban bnadem n ddnub, aqa-t d mmis n tehliket.    
Netta ittemɛařa u issɛuǧa ixef nnes x marra min ittwasemman ‘AREBBI’ niɣ ‘aɛbad’, ař ɣa iqqim di Zzawect Tameqqrant n AREBBI amecnaw netta d AREBBI i yeǧa, uca ad isscen i yixef nnes, aqa netta axmi AREBBI. 
Ma war teɛqiřem ca umi tuɣa ayi kiwem, aqa nniɣ awem-t? 
Maca řexxu tiwḍem tessnem min d as ibedden ɛad deg webrid, ḥima ad dd-iban di řweqt nnes. 
Ssirr n řmuɛṣiyyet aqa ixeddem řexxu. Maca mařa immeksi zi řwesṭ min d as issbedden ɛad deg webrid řexxu, 
ad dd-iḍhar bab n řmuɛṣiyyet, wenni ɣa isshellek Siditneɣ Yasuɛ s twarrit n nnefs zeg uqemmum nnes, ad t issebḍeř xmi dd ɣa tban twasit nnes. 
Maɣar tawasit n bab nni n řmuɛṣiyyet ad traḥ jmiɛ ak-d řxedmet n cciṭan s marra jjehd d řeɛřamat d lmuɛjizat issxarriqen, 
u s marra řɣecc n řmuɛṣiyyet deg yinni i ɣa ihellken, minzi nitni war qbiřen ca tayri n tidett ḥima ad zzayes afen Tudart. 
S uyenni AREBBI ad ɣarsen dd-issekk min ten ɣa yarr s jjehd ɣar uweddar, ař ɣa yamnen deg uxarriq. 
Marra inni war yuminen ca di tidett, maca ixsen řmuɛṣiyyet ktar, ad ttwaḥakmen. 
Maca icuwwar aneɣ ad nqada AREBBI řebda xawem, a awmaten nneɣ, inni xef iɛizz Siditneɣ, aqa AREBBI ixḍar i kenniw zeg umezwaru i Tudart, s tqeddast zi Arruḥ u s l’iman n tidett. 
Aqa iřaɣa-dd xawem i man aya s ubarreḥ nneɣ s Řexbar Aṣebḥan, ḥima ad tiřim i uɛuǧi n Siditneɣ Yasuɛ Lmasiḥ. 
S uyenni, a aytma, beddem nican uca ṭṭfem di tweṣṣa i d awem ittwassřemden zzayneɣ, ma s wawař niɣ s tebrat nneɣ. 
Maca Netta, Siditneɣ Yasuɛ Lmasiḥ, u AREBBI, Babatneɣ, wenni d aneɣ ixsen d wenni d aneɣ iwcen afewwej ittduman d usitem icnan s arḍa nnes, 
ad issfewwej uřawen nwem uca ad kenniw issejhed di marra awař u di marra řxedmet taṣebḥant. 
