﻿Ikulusiyyen.
3.
Mařa tᵉttwassnekkarem-dd ak-d Lmasiḥ, xenni arzum min iǧan sennej, mani iqqim Lmasiḥ x ufusi n AREBBI. 
Ɛeqřem min iǧan sennej, war iǧi min iǧan di temmurt, 
minzi kenniw aqa temmutem uca tudart nwem tennuffar ak-d Lmasiḥ di AREBBI. 
Xmi dd ɣa iḍhar Lmasiḥ, wenni iǧan d Tudart nneɣ, řexdenni uřa d kenniw ad kides dd-teḍharem deg uɛuǧi. 
S uyenni nɣem iɣezdisen n arrimet nwem inni x temmurt: farq-ccɣeř, řexmej, acahi, nnecwat tiɛeffanin d ṭṭmeɛ, wenni d aɛbad i l’aṣnam, 
s minzi ad dd-yas weɣḍab n AREBBI x ayt n řmuɛṣiyyet. 
Uřa d kenniw tuɣa teggurem ammu zic, umi kenniw tuɣa teddarem ɛad di tmesřayin nni. 
Maca řexxu, sarsem man aya marra x uɣezdis: aɣḍab d tefqeḥt d tuɛeffna d uceqqef d řhard ixmej. 
War sxarriqem ca x wayawya, maca sarsem ɣar uɣezdis bnadem aqdim ak-d marra ibriden nnes, 
u tyarrḍem bnadem n jdid, wenni iddekkwařen jdid s tussna zzayes Netta, ɣar ṣṣifet n Wenni i-t-i-dd-ixeřqen. 
Dayes war iǧi Wuday řa d Arami, řa d axtan, řa břa axtan, řa d Ayunaniy, řa řbarrani, řa d ismeɣ uřa d ḥurr, maca Lmasiḥ d kuřci u di kuř ijjen. 
X uyenni, kenniw, a imqeddasen d imɛizzen inni ittwafarzen zi AREBBI, arḍem s arreḥmet d řeḥnunect d řeḍrafet d uwaḍeɛ n arruḥ d temhint d ttasiɛ n řxaḍar. 
Qebřem u samḥem i wayawya. Mařa ca n yijjen ɣares acetci x wenni d as yudsen, ɣfarem kenniw ijj i wenneɣni, am mammec i d awem iɣfar Lmasiḥ. 
Uca ak-d marra aya, arnim tayri tenni d taxadent n řekmařet. 
Xenni ad iḥkem řehna n Lmasiḥ deg wuřawen nwem, řehna nni ɣar tᵉttwařaɣam deg ict n Arrimet, uca qadam i Lmasiḥ. 
Jjem Awař nnes ad daywem izdeɣ s marra tiɣit. Sřemdem, sejjɛem ijj wenneɣni s uɣennej n izehhiden d tesbiḥ d izřan n Arruḥ, u ɣennjem i AREBBI s wuřawen nwem ccuren s arḍa. 
Marra min tᵉtteggem s wawař niɣ s tmegga, ggem t s Yisem n Siditneɣ Yasuɛ Lmasiḥ u cekkarem zzayes AREBBI, Babatneɣ. 
A timɣarin, dewřent sadu iryazen nkent am mammec dd-ittas ak-d Lmasiḥ. 
A iryazen, xsem timɣarin nwem, war ttqesḥem daysent s tarzugi. 
A iḥenjiren, ṭaɛem i lwalidin nwem di marra, minzi man aya yareṭṭa i Siditneɣ. 
A lwalidin, war darracem ca iḥenjiren nwem, ḥima war d asen tᵉttraḥ teryast. 
A imsexxaren, ṭaɛem i yinni iǧan d aytbab nwem di temmurt di marra, war ttsexxarem ca i tiṭṭawin n iwdan am yinni ixsen ad arḍan iwdan waha, maca sexxarem s řeṣfayet n wuř u zi tiggʷudi n SIDI. 
Qaɛ min ɣa teggem, ggem t s marra řeɛmar nwem, ggem t axmi i Siditneɣ, war iǧi i iwdan. 
Snem aqa ad teksim řexřaṣ zi Siditneɣ di řwart, maɣar tᵉttsexxarem i SIDI, Lmasiḥ. 
Minzi wenni itteggen řɣecc, ad ittwaxřef ɛlaḥsab řɣecc i yegga, minzi war din iǧi řfarz n bnadem. 
