﻿Ifasusiyyen.
3.
X uyenni necc, Bulus, aqa ayi d ameḥbus n Yasuɛ Lmasiḥ, i kenniw inni iǧan zi řegnus, 
mařa zeɛma aqa tesřam x tsexxart n arḍa n AREBBI i d ayi immewcen jar awem, 
belli ittwassargeb ayi-dd ssirr, am izzareɣ uriɣ awem-dd s drus. 
Xmi ɣa tɣarem man aya, tzemmarem ad tfehmem řefhamet inu n ssirr n Lmasiḥ, 
wenni war ittwassargeb ca di tarwa n bnadem di řejyuř nneɣni, am mammec ittwaɛarra xas řexxu s Arruḥ i rrusul imqeddasen nnes u i inabiyyen nnes, 
aḥeqqa inni zi řegnus ad iřin d iwriten akidsen d iɣezdisen akidsen n Arrimet nnes uřa d icricen n lwaɛd nni dayes immewcen s L’Injil, 
i zi dewřeɣ d amsexxar ɛlaḥsab tawhibt n arḍa n AREBBI i d ayi immewcen ɛlaḥsab jjehd nnes i dayi ixeddmen. 
Aqa immewc ayi arḍa-ya, i necc d amuqřiř qaɛ jar marra imqeddasen, ḥima ad barrḥeɣ s Řexbar Aṣebḥan, iwa agřa n Lmasiḥ i war nzemmar ad nefhem, 
u ḥima ad ssuffɣeɣ ɣar tfawt i marra, min ixs ad yini uwekkeř n ssirr i tuɣa inuffaren di zzmanat n zic di AREBBI, Wenni i dd-ixeřqen kuřci, 
ḥima tiɣit n AREBBI ak-d waṭṭas n iɣezdisen nnes ad tiři tᵉttwassnen s tmesmunt ɣar řeḥkamat d ṣṣulaṭat deg ijenwan, 
tiɣit i tuɣa issewjed Netta zi zzman uca ikemmeř i-tt di Siditneɣ Yasuɛ Lmasiḥ, 
wenni dayes aqa ɣarneɣ taryast d wadaf ak-d ttiqet s l’iman zzayes. 
S uyenni ttzawageɣ kenniw, maḥend war ttiḥřem ca s řemḥayem inu di ṭṭweɛ nwem. Aqa man aya i uɛuǧi i kenniw. 
Ad adareɣ s ifadden inu zzat i Babas n Siditneɣ Yasuɛ Lmasiḥ, 
i Wenni umi semman kuř ijj n tbabat i iǧan deg ijenwan d temmurt, 
ḥima ad awem iwc ɛlaḥsab agřa n uɛuǧi nnes u ḥima ad tᵉttwassjehdem s jjehd s Arruḥ nnes di bnadem nwem n daxeř. 
ḥima Lmasiḥ ad izdeɣ deg wuřawen nwem s l’iman, s tayri, x minni teccatem iẓewran u dsas nwem ad yiři imten, 
ḥima ad tzemmarem ad tfehmem ak-d marra imqeddasen min teɛna tiru d tuzzeggart d řuɛřa d řaǧaɣ, 
u ad tessnem ɛawed řemɣaret n tussna n tayri n Lmasiḥ, uca ad tiřim tɛemmarem s marra aɛemmar n AREBBI. 
Maca i Netta umi ɣares tizemmar ifeyyḍen ḥima ad igg di ṭṭweɛ nneɣ sennej i min nettᵉttar niɣ nettxarreṣ, ɛlaḥsab jjehd nnes i ixeddmen dayneɣ, 
i Netta ikkar as-dd uɛuǧi di tmesmunt nnes, di Yasuɛ Lmasiḥ, di marra řejyuř i řebda qaɛ. Amin. 
