﻿Ifasusiyyen.
1.
Bulus, rrasul n Yasuɛ Lmasiḥ ɛlaḥsab řxaḍar n AREBBI, i yinni iǧan di Afasus, i imqeddasen d yinni yumnen di Yasuɛ Lmasiḥ    
Arḍa d řehna ad kidwem iřin zi AREBBI, Babatneɣ, u zi Siditneɣ Yasuɛ Lmasiḥ. 
Ad ittwabarek AREBBI, Babas n Siditneɣ Yasuɛ Lmasiḥ, wenni d aneɣ ibarken s marra lbarakat n Arruḥ i iǧan deg ijenwan di Lmasiḥ, 
am mammec ixḍar aneɣ dayes, deg umezwaru qbeř ma ad ittwagg dsas n ddunect, ḥima ad niři d imqeddasen břa řɛib qibač nnes. 
Di tayri izwar ad aneɣ yarcem i Yixef nnes uca aqa igga aneɣ d arrawen di Yasuɛ Lmasiḥ am mammec t ixs řxaḍar nnes, 
i usemɣar n uɛuǧi n arḍa nnes i xaneɣ ifarreɣ deg Umɛizz nnes. 
Dayes ɣarneɣ asenjem d weɣfar n ddnub s Idammen nnes ɛlaḥsab agřa n arḍa nnes 
i dayneɣ iǧan s ufeyyeḍ, di marra tiɣit d marra řefhamet. 
Aqa issargeb aneɣ x ssirr n řxaḍar nnes, i tuɣa izɛem qbeř maḥend ad t ikemmeř deg Yixef nnes, 
ḥima, i řeḥkamet n uɛemmar n zzmanat, ad dd-ixřeq marra min iǧan deg ijenwan u x temmurt d jdid zeg Uzeǧif s Lmasiḥ. 
Aqa nettwaxḍar dayes, am mammec i izwar ad immars i neccin u tuɣa ixs ad zzayneɣ igg, Netta d wenni itteggen marra ɛlaḥsab lqarar n array nnes, 
ḥima neccin ad niři d imezwura i ɣa issitimen di Lmasiḥ i usemɣar n uɛuǧi nnes. 
Dayes aqa tesřim awař n tidett, Řexbar Aṣebḥan n usenjem nwem, xenni tumnem dayes uca teksim acemmiɛ n Arruḥ Iqeddsen i d aneɣ iwaɛd, 
wenni d řɛarbun n řwart nneɣ i usenjem n yinni iddaren u i usemɣar n uɛuǧi nnes. 
Xzar, s uyenni necc, řami sřiɣ x l’iman nwem di Siditneɣ Yasuɛ Lmasiḥ u x tayri nwem i marra imqeddasen, 
war beddeɣ ca ad qadiɣ i kenniw niɣ ad daywem fekkareɣ di tẓiǧatin inu, 
ḥima AREBBI n Siditneɣ Yasuɛ Lmasiḥ, Babas n uɛuǧi, ad awem iwc Arruḥ n tiɣit d usargeb ḥima ad t tessnem, 
uca ad awem iwc tifawt di tiṭṭawin n wuřawen nwem, ḥima ad tessnem man asitem n třaɣit nnes d mammec imɣar agřa n uɛuǧi n řwart nnes di marra imqeddasen, 
u mammec imɣar aṭṭas i yeǧa jjehd nnes dayneɣ, deg inni yumnen ɛlaḥsab aqarru n jjehd n ṣṣulṭa nnes 
i ixeddmen di Lmasiḥ umi t-i-dd-issnekkar zi taddart n imettinen uca igga i-t ɣar uɣezdis afusi nnes deg ijenwan, 
sennej i kuř azeǧif d ṣṣulṭa d jjehd d řeḥkamet d marra isem ittwasemman, war iǧi di ddunect-a waha, maca ɛawed di tenni i dd ɣa yasen. 
Aqa Netta yarra as-dd marra sadu iḍaren nnes u Wenni iǧan sennej i marra, aqa igga i-t d Azeǧif i Tmesmunt, 
tenni d Arrimet nnes uřa d aɛemmar n Wenni ittɛemmaren kuřci di marra.    
