﻿1 Ikurintiyyen.
15.
A aytma inu, ad awem ssargbeɣ x L’Injil wenni d awem barrḥeɣ, d wenni tqebřem u d wenni di tbeddem nican, 
i zi tᵉṭṭfem Tudart, s Wawař i d awem barrḥeɣ, mařa xas tɛeqřem ɛad. Mammec nneɣni, zeɛma tumnem amenni waha. 
Minzi zeg umezwar sseɛduɣ awem-dd min tuɣa ṭṭfeɣ s yixef inu, aqa Lmasiḥ immut x ddnub nneɣ ɛlaḥsab min yuran, 
aqa ittwanḍeř uca ittwassnekkar-dd deg wass wiss třata ɛlaḥsab min yuran. 
Netta iḍhar-dd ɣar Kifa, xenni ɣar tenɛac n imeḥḍaren. 
Awarni as iban-dd i tiwwa n xemsa-mya n wawmaten deg umur d ijjen, aṭṭas zzaysen ddaren ɛad ař i řexxu, maca inneɣni aqa ṭṭṣen iḍeṣ n řmewt. 
Awarni as iḍhar-dd i Yaɛqub, xenni i marra rrusul. 
Am ɣar uneggar n marra, iḍhar ayi-dd ɛawed am i yijj n umexřuq dd-izwaren i řweqt nnes. 
Minzi necc ǧiɣ d amaẓuẓ qaɛ zi rrusul, war sdihijeɣ ad ayi řaɣan rrasul, minzi necc tuɣa darrceɣ x tmesmunt n AREBBI. 
Maca s arḍa n AREBBI i ǧiɣ min ǧiɣ uca arḍa nnes i dayi iǧan war iǧi baṭeř, minzi xedmeɣ mahu qaɛ xasen marra, maca war iǧi d necc, maca arḍa n AREBBI nni iǧan akidi. 
Xenni ma d necc niɣ d nitni, ammu i nettbarreḥ, ammu i tumnem. 
Maca mařa ittwabarreḥ s Lmasiḥ wenni dd-ittwassnekkaren zi taddart n imettinen, mammec xenni zemmaren ca jar awem ad inin belli war din bu Tudart i imettinen? 
Minzi mařa war din bu Tudart i imettinen, uřa d Lmasiḥ war dd-ittwassnekkar ca, 
uca mařa Lmasiḥ war dd-ittwassnekkar, xenni baṭeř i teǧa tbarreḥt nneɣ, baṭeř i yeǧa xenni l’iman nwem. 
Xenni neccin nban ɛawed d řechud issxarriqen n AREBBI, minzi neched x AREBBI belli aqa issnekkar-dd Lmasiḥ, waxxa Netta war i-t-i-dd-issnekkar ca. 
Minzi mařa imettinen war dd-ttᵉtwasnekkaren ca, aqa Lmasiḥ war dd-ittwassnekkar ɛawed. 
U mařa Lmasiḥ war dd-ittwassnekkar ca, aqa l’iman nwem ixwa, u aqa kenniw ɛad di ddnub nwem, 
uca ttwahellken uřa d inni ittᵉṭṭṣen di Lmasiḥ awarni řami mmuten. 
Mařa tuɣa nessitim di Lmasiḥ di tudart-a waha, aqa aneɣ qaɛ d imcumen n marra iwdan. 
Maca řexxu umi dd-ittwassnekkar Lmasiḥ zi taddart n imettinen, aqa idweř Netta d Amenzu n yinni iṭṭṣen deg wenḍeř. 
U am mammec dd-tusa řmewt zeg ijj n bnadem, ammu uřa d tanukra n imettinen teǧa zeg ijj n Bnadem. 
Minzi am iwdan marra ad mmten di Adam, ammu ɛawed i ɣa ddaren marra nitni ɛawed di Lmasiḥ. 
Maca kuř ijj di nnubet nnes: Lmasiḥ tuɣa d Amenzu, xenni awarni as inni iǧan n Lmasiḥ ɣar twasit nnes. 
Awarni man aya d aneggaru, xmi ɣa iwc tageldit i AREBBI, Babatneɣ, xmi ɣa issebḍeř marra řeḥkamet d marra ṣṣulṭa d marra jjehd. 
Maɣar Netta ad iḥkem am Ujeǧid ař d ɣa yegg marra řɛedyan nnes sadu iḍaren nnes. 
Řeɛdu aneggaru wenni i ɣa ittwabeḍřen, aqa-tt d řmewt. 
Minzi aqa igga marra sadu iḍaren nnes. Maca xmi ittwanna: “Aqa marra timesřayn ttwaggent sadu Netta!”, aqa iban mliḥ belli wenni d as iggin marra sadu Netta, aqa Netta simant nnes war iǧi sadu Netta. 
Uca řami d as ittwagg marra sadu i Netta, řexdenni Mmis n AREBBI ɛawed ad ittwagg sadu i Wenni umi d as iggin marra sadu i Netta, ḥima ad yiři AREBBI d marra di min di mma. 
Niɣ, min ɣa ggen inni ittwassɣeḍṣen di ṭṭweɛ n imettinen mařa war dd-tᵉttwassnekkaren imettinen ɛemmarṣ? Maɣar mayemmi ɣa ttwassɣeḍṣen ɛad di ṭṭweɛ n imettinen? 
U mayemmi neccin ɛad di lxaṭar di kuř tsaɛɛet? 
A aytma, ttjaǧiɣ ɣar usemɣar nwem i iǧan ɣari di Siditneɣ Yasuɛ Lmasiḥ, aqa ttmettiɣ kuř ass. 
U mammec, mařa ttwamenḍareɣ zzat i řewḥuc di Afasus x řeḥsab bnadem, man řefḍeř i ɣari, mařa imettinen war dd-ttwassnekkaren ca? Ejj aneɣ ad necc ad nsu, minzi tiwecca ad nemmet. 
War ttɣeccim yixef nwem: řhard war iḥřin tjeyyaḥ nneyyet taṣebḥant. 
Sfaqem uřawen nwem ɣar tsegda, war xeṭṭim ca. Minzi ca zzaywem war ɣarsen teǧi tussna n AREBBI. I řeḥya nwem qqareɣ tt. 
Ad inin ca zzaywem: “Mammec i dd ɣa ttwassnekkaren imettinen? S man arrimet i dd ɣa yasen?” 
A afɣuř, min tzarrɛed cek, war iddar mařa war immut qbeř. 
Min tzarrɛed, war teǧi ca d arrimet nni i ɣa tiři, maca tzarrɛed taɛeqqact iɣeryen n yirden niɣ n imendi niɣ n ca n zzariɛet nneɣni. 
Maca AREBBI iwca as arrimet am mammec ixs Netta, i kuř ddab n zzariɛet iwca as arrimet ɛlaḥsab ṭṭbiɛet n kuř icten zzaysent. 
War iǧi marra arrimet d arrimet d ijj, maca tenni n iwdan immsebḍa x tenni n řmař, u tenni n ijḍaḍ wenneɣni n tenni n iseřman. 
Aqa din arrimat n ujenna d arrimat n temmurt, maca aɛuǧi n yinni n ujenna wenneɣni n yinni n temmurt. 
Ijjen d aɛuǧi n tfuct, wenneɣni d aɛuǧi n uyur, u wenneɣni d aɛuǧi n itřan, uca aɛuǧi n ijj n itři iɛeddun x uɛuǧi n ijj n itři nneɣni. 
Ammu xenni i ɣa tiři Tudart i yinni mmuten. Aqa ttwazarrɛen nitni di min iɣeccen uca ttwassnekkaren-dd břa řɣecc. 
Aqa ttwazarrɛen nitni di min war icniɛen, maca ad dd-ttwassnekkaren deg uɛuǧi. Nitni ttwazarrɛen deg weḍɛaf, maca ad dd-ttwassnekkaren di jjehd. 
Aqa ttwazarrɛen nitni s ict n arrimet n ṭṭbiɛet uca xenni ad dd-ittwassnekkar bnadem s ict n arrimet tarruḥanit. Aqa din arrimet n ṭṭbiɛet, ammu aqa din uřa d arrimet n Arruḥ. 
Ammu i tura ɛawed: “Aryaz amezwaru Adam, idweř d řeɛmar iddaren!”, Adam aneggaru idweř d Arruḥ i itticen Tudart. 
Maca min iǧan zi Arruḥ war dd-yusi ca d amezwaru, maca min iǧan n ṭṭbiɛet, xenni awarni man aya min iǧan zi Arruḥ. 
Bnadem amezwaru ikka-dd zeg ucař n temmurt, Bnadem wiss tnayen d SIDI i dd-ikkin zeg ujenna. 
Am mammec iǧa wenni zeg ucař, ammu i ǧan uřa d nitni zeg ucař, uca am mammec iǧa Wenni n ujenna, ammu i ǧan uřa d inni n ujenna. 
Uca am mammec narbu ṣṣifet n wenni ittwaggen zeg ucař, ammu xenni ad narbu ṣṣifet n Wenni iǧan zeg ujenna. 
A aytma inu, ddegga xseɣ ad iniɣ: Aqa aysum d idammen war zemmaren ad warten Tageldit n ijenwan, uca min ifennan war iwarret min war ifennin. 
Xzarem, ad kenniw ssaregbeɣ x ijj n ssirr: aqa aneɣ war nettᵉṭṭeṣ ca marra s yiḍeṣ n řmewt, maca neccin marra ad nettwabeddeř, 
deɣya, deg wermac n wabřiwen, ɣar řḥess n usuḍi aneggaru deg uyicc n icarri: imettinen ad dd-ttwassnekkaren ɣar min war ifennin uca neccin ad nettwabeddeř. 
Minzi min ifennan ittxeṣṣa as ad yarḍ min war ifennin u min ɣa immuten ittxeṣṣa as ad yarḍ min war ittmettin. 
Uca xmi min ifennan ad yarḍ min war ifennin u min ɣa immuten ad yarḍ min war ittmettin, řexdenni ad ikemmeř wawař i ittwarin: “Řmewt aqa tᵉttwaṣarḍ deg řeɣřeb.” 
“A řmewt, mani iǧa usennan nnem? A řaxart, mani iǧa řeɣřeb nnem?” 
Aqa asennan n řmewt d ddenb, uca jjehd n ddenb aqa-tt d Ccariɛa. 
Maca aqadi i AREBBI, wenni d aneɣ iwcin řeɣřeb s Siditneɣ Yasuɛ Lmasiḥ. 
S uya, a aytma iɛizzen, beddem nican u břa anhezzi, arnim řebda di řxedmet n SIDI s ufeyyeḍ, am tessnem belli řxedmet nwem war teǧi baṭeř di SIDI. 
