﻿1 Ikurintiyyen.
14.
Ḍfarem tayri u njebdem ɣar tewhibin n Arruḥ, d amezwaru ḥima ad tnebbam. 
Minzi wenni issawařen s iřsawen nneɣni, war issiwiř ca i iwdan, maca i AREBBI, minzi uřa d ijj war d as ifehhem, maca issawař řesrar s Arruḥ. 
Maca wenni ittnabben, issawař ɣar yewdan, ḥima ad ten ibna, ad ten isejjeɛ, ad ten issfewwej. 
Wenni issawařen s yijj n iřes nneɣni, ibenna ixef nnes, maca wenni ittnabben ibenna tamesmunt. 
Iwa xseɣ marra kenniw ad tessiwřem s iřsawen nneɣni, maca mliḥ ɛad ad tnebbam, minzi amenzu wi ittnebban x wi issiwřen s iřsawen nneɣni, mɣir mařa wanita ad t ifessar, minzi mařa ifessar ad tᵉttwabna tmesmunt. 
Xenni řexxu, a aytma, mařa usiɣ-dd ɣarwem uca ad kiwem ssiwřeɣ s iřsawen nneɣni, man nnfeɛ i ɣarwem i ɣa yawyeɣ mařa war d awem ssiwřeɣ ca s usargeb niɣ s tussna niɣ s ijj n wawař i ɣa nebbeɣ niɣ s useřmed? 
Maɣar uřa d řeḥwayec war iddaren am tamja niɣ lgambri, ggin řḥess. Mařa war ggin řfarz jar ijj n řḥess d umas, mammec ɣa ssnen inni ittesřan min ttiraren s tamja niɣ s lharpa? 
Iwa, mařa asuḍi deg uyicc ittegg řḥess war iṣfi, wi ɣa isswejden xenni i umenɣi? 
Ammu ɛawed kenniw, mařa tessiwiřem awařen s ijj n yiřes nneɣni, maca war ten tfessarem, mammec ɣa fehmen min teqqarem? Ad tessiwřem xenni am wenni issawařen di řeɛwin. 
Aqa din wi issnen mecḥař n iřsawen di ddunect uca uřa d ijjen zzaysen war iǧi břa řḥess nnes. 
Xenni mařa war ssineɣ řaǧaɣ n řḥess, ad iřiɣ necc d ijj n ubarrani i wenni issawařen, d wenni issawařen ad yiři d abarrani i necc. 
Ammu ɛawed kenniw, umi tenjebdem ɣar tewhibin n Arruḥ, arzum ad tfeyyḍem di ṭṭweɛ n řebni n tmesmunt. 
Wenni issawařen s ca n iřes nneɣni, ad iẓẓaǧ ḥima izemmar i ufessar nnes. 
Minzi mařa necc ẓẓuǧeɣ s ca n yiřes nneɣni, arruḥ inu aqa iẓẓuǧ, maca řefhamet inu ad teqqim břa řɣiǧet. 
Mammec i ɣa ggeɣ? Ad ẓẓaǧeɣ s arruḥ inu, maca ad ẓẓaǧeɣ ɛawed s řeɛqeř inu, ad ɣennjeɣ s arruḥ inu, maca ad ɣennjeɣ ɛawed s řeɛqeř inu. 
Mammec nneɣni, mařa tbarkem s Arruḥ, izemmar ḥed i din iqqimen am war ifhim, ad yini ‘Amin!’ i tẓaǧit n uqadi nnec, minzi netta war issin min teqqared. 
Minzi waxxa cek tbarked mliḥ, maca wenni d ac yudsen war ittwabenni ca zi man aya. 
Necc ttqadiɣ AREBBI aqa ssawařeɣ s iřsawen ktar zzaywem marra, 
maca di tmesmunt aqa meɛlik ufiɣ ad iniɣ xemsa n wawařen s řeɛqeř inu, ḥima ad ssřemdeɣ ɛawed inneɣni, x ɛecra-ařaf n wawařen s yijj n yiřes nneɣni. 
A aytma inu, war ttiřim d tarwa deg ixarriṣen nwem, maca iřim d iseyman di tuɛeffna, u iřim tiwḍem di řefhamet. 
Aqa tura di Ccariɛa: “Ad ssiwřeɣ i řgens-a s ijj n řhard n řbarrani u s ijj n yiřes nneɣni. Waxxa ammu war d ayi ttesřin ca, iqqar SIDI.” 
Ammu xenni iřsawen d řeɛřamet, war iǧi i yinni yumnen, maca i yinni war yuminen ca, maca awař i ittwanabben zzayes war iǧi i yinni war yuminen, maca i yinni yumnen. 
Mařa marra tamesmunt tessmun u marra tuɣa ssawařen s iřsawen, uca xenni udfen inni ijehřen niɣ inni war yuminen, ma nitni war qqaren belli aqa iwdan-a ttxeřfen? 
Maca mařa marra tnebbam uca yudef-dd ḥed war yumin niɣ ḥed ijheř, xenni wanita ad ittwasseqneɛ zi marra kenniw uca ad ittwawebbex zzaywem marra, 
uca min innufaren deg wuř nnes ad ittwaɛarra. Netta ad yaḍar s wudem nnes, ad isjed i AREBBI, ad yini: “Aqa s tidett AREBBI aqa-t jar awem!” 
S uyenni ad awem iniɣ, a aytma inu, mařa tmunem, ejj kuř ijjen zzaywem wenni ɣar iǧa ijj n uzehhid niɣ ict n tɣuri niɣ ijj n usargeb niɣ ijj n yiřes niɣ ijj n ufessar ad zzayes dd-inṭeq. Ejj ad yiři marra i řebni. 
Mařa din ḥed issiweř s yijj n iřes nneɣni, ejj i-ten ad ssiwřen s tnayen niɣ s waṭṭas s třata yidsen, uca kuř ijjen zzaysen s nnubet nnes, u ejj ijj ad t ifessar. 
Maca mařa war din iǧi wi izemmaren ad ifessar, ad isqar netta di tmesmunt, ad issiweř i yixef nnes u i AREBBI. 
Jjem ad ssiwřen tnayen niɣ třata n inabiyyen, uca inneɣni ad ḥekmen. 
Maca mařa ittwassargeb ca i ḥed am iqqim dinni, ejj xenni ad issusem wenni issawařen d amezwaru, 
Minzi tzemmarem ad tnebbam marra ijjen awarni wenneɣni, ḥima marra ad řemden uca ad daysen ittwagg wuř marra. 
Maɣar arruḥ n inabiyyen, aqa-t immars sadu inabiyyen, 
minzi AREBBI war iǧi d AREBBI n uxarweḍ, maca n řehna, ammu i yeǧa di marra timesmunin n imqeddasen. 
Tusa-dd x temɣarin nwem ad ssusment di tmesmunin, minzi war d asent ismiḥ ad ssiwřent, maca icuwwar asent ad iřint ttwaḍɛent am mammec teqqar ɛawed Ccariɛa. 
Uca mařa xsent ad řemdent ca, ad sseqsant iryazen nsent di taddart nsen, minzi aqa-tt d řefḍiḥet i temɣarin ad ssiwřent di tmesmunt. 
Ma zeɛma iffeɣ-dd zzaywem awař n AREBBI? Niɣ yiweḍ-dd ɣarwem waha? 
Mařa ḥed ittɣiř as d anabi niɣ d bnadem arruḥani, ejj i-t ad iɛqeř mliḥ belli min d awem ttariɣ, aqa atent d tiweṣṣa n Siditneɣ. 
Maca mařa ixs ḥed ad iqqim ijheř, ejj i-t ad ijheř. 
Ammu xenni, a aytma inu, njebdem ḥima ad tnebbam, war mennɛem ca awař s iřsawen inneɣni. 
Ad imsar marra s ladab u s usettef. 
