﻿1 Ikurintiyyen.
1.
Bulus, rrasul ittwařaɣan d ittwasekken n Yasuɛ Lmasiḥ ɛlaḥsab min ixs AREBBI, d tawmat Sustinis, 
i tmesmunt n AREBBI i iǧan di Kurintus, inni ittwařaɣan d inni d imqeddasen, inni ittwaqeddsen di Yasuɛ Lmasiḥ, u i marra inni mani ma ittřaɣan x Yisem n Siditneɣ Yasuɛ Lmasiḥ, wenni d Siditsen d Siditneɣ. 
Ad xawem yiři arḍa d řehna zi AREBBI, Babatneɣ, u zi Siditneɣ Yasuɛ Lmasiḥ. 
Necc řebda ttqadiɣ AREBBI inu di ṭṭweɛ nwem x arḍa n AREBBI i d awem immewcen di Yasuɛ Lmasiḥ. 
Minzi di marra tdewřem zzayes d ttujjar, di marra awař u di marra tussna, 
maɣar cchadet n Lmasiḥ tᵉttwaḍmen daywem, 
minzi uřa d ijj n zzɛaf n tewhibin nnes war daywem iqqim, am tᵉttrajam asargab n Siditneɣ Yasuɛ Lmasiḥ, 
Minzi Netta ad kenniw iḍmen ɛawed ɣar uneggar, ḥima ad tiřim břa řɛib deg wass n Siditneɣ Yasuɛ Lmasiḥ. 
AREBBI d amtiqqi, d wenni zi tᵉttwařaɣam kenniw ɣar tmunt ak-d Mmis Yasuɛ Lmasiḥ, Siditneɣ. 
Maca ttzawageɣ kenniw, a aytma, s Yisem n Siditneɣ Yasuɛ Lmasiḥ, ad tessiwřem marra s ijj n wawař, war tᵉttemsebḍim jar awem, maca iřim tmunem nican s nneyyet d icten d uxarreṣ d ijjen. 
Minzi ssargben ayi inni zi taddart n Kluwi, a aytma inu, belli jar awem imenɣan. 
Xseɣ ad iniɣ, aqa ca zzaywem qqaren: ‘Necc aqa ayi zi Bulus!’ u ca nneɣni: ‘Necc zi Apullus!’, u ca nneɣni ɛawed: ‘Necc zi Kifa!’, u ca nneɣni qqaren: ‘Necc zi Lmasiḥ!’ 
Ma aqa Lmasiḥ ittwabḍa d iwetwiten? Ma tuɣa Bulus ittwaṣelleb di ssibbet nwem? Niɣ tuɣa kenniw tᵉttwassɣeḍṣem s yisem n Bulus? 
Necc ttqadiɣ AREBBI inu war ssɣeḍṣeɣ uřa d ijj zzaywem mɣir Krispus d Xayus waha, 
ařami uřa d ijjen ad yini belli ssɣeḍṣeɣ deg yisem inu. 
Ɛawed ssɣeḍṣeɣ tawacunt n Stifanus, xenni war ssineɣ ca, ma ssɣeḍṣeɣ ḥed nneɣni. 
Maɣar Lmasiḥ war d ayi dd-issekk ḥima ad ssɣeḍṣeɣ, maca ḥima ad barrḥeɣ s Řexbar Aṣebḥan, war iǧi s tiɣit n wawařen, ḥima war ittᵉttwassbeṭṭeř ṣṣalib n Lmasiḥ. 
Minzi awař n ṣṣalib d tubbuheřya di tiṭṭawin n yinni i ɣa iweddaren, maca i neccin, inni iddaren, man aya d jjehd n AREBBI. 
Minzi tura: “Ad areddǧeɣ tiɣit n imiɣisen uca ad kkseɣ řefhamet n ifehhamen.” 
Mani iǧa umiɣis? Mani iǧa umseřmad n idlisen? Mani iǧa bu-umḥarweḍ n ddunect-a? Ma war isscen AREBBI belli tiɣit n ddunect-a d tubbuheřya? 
Minzi di tiɣit n AREBBI, ddunect war tessin ca AREBBI zi ssibbet n tiɣit n yixef nnes, aqa tuɣa yarḍa AREBBI ad iwc Tudart i yinni yumnen s tubbuheřya n tbarreḥt. 
Minzi Udayen ttaren řeɛřamat u Iramiyyen arezzun tiɣit, 
maca neccin nettbarreḥ Lmasiḥ, d wenni ittwaṣellben, aqa-t d taɛenkrift i Wudayen, d tubbuheřya i Iramiyyen, 
maca i yinni ittwařaɣan, am Wudayen am Iramiyyen, aqa Lmasiḥ d jjehd n AREBBI d tiɣit n AREBBI. 
Minzi tubbuheřya n AREBBI d tmiɣist x iwdan, u tuḍɛeft n AREBBI tejhed x iwdan. 
Xenni, a aytma, xzarem mammec teǧam ɣar wass n třaɣit nwem, aqa war teǧim d aṭṭas n imiɣisen ɛlaḥsab bnadem, niɣ d aṭṭas n yinni ɣar teǧa ṣṣulṭa, niɣ d aṭṭas n tarwa n taṣiřet. 
Maɣar AREBBI aqa ifarz ibuhařiyyen n ddunect, ḥima ad zzaysen isseḥcem imiɣisen, uca imuḍɛifen n ddunect ifarz i-ten AREBBI, ḥima ad zzaysen isseḥcem ayt n bu-ṣṣulṭa. 
uca yinni dd-ixeřqen am war ɣarsen ca di ddunect, d yinni ittwasseḥqaren, d yinni war iǧin d ca, aqa ifarz i-ten AREBBI, ḥima ad ibḍeř inni iǧan d ca, 
ḥima uřa d ijj n bnadem n weysum, war ittfeyyec ca zzates. 
Maca kenniw teǧam zzayes di Yasuɛ Lmasiḥ, wenni d aneɣ idewřen d tiɣit n AREBBI d tsegda d tuqeddsi d usenjem, 
am mammec tura: “Ejj wenni issemɣaran, ad issemɣar di SIDI.” 
