﻿Irumaniyyen.
16.
Wekkřeɣ awem učmatneɣ Fubi, tenni d tamsexxart n tmesmunt di Kinxriyus, 
ḥima ad zzayes tareḥḥbem di Siditneɣ, am mammec ittřiq i imqeddasen, uca ad tt tɛawnem di marra min zzaywem tᵉttar nettat, minzi aqa tɛawen aṭṭas, uřa řa d necc. 
Seǧmem s řehna x Priskilla d Akwila, inni d imsexxaren akidi di Yasuɛ Lmasiḥ, 
Nitni sebbřen tudart nsen x ssibbet inu. War ǧiɣ d necc waha wenni ten ittqadan, maca ɛawed marra timesmunin n řegnus. 
Seǧmem ɛawed s řehna x tmesmunt tenni di taddart nsen. Seǧmem x Ibanitus, amɛizz inu, s řehna. Netta d ṣṣabet tamezwarut n Axaya di Lmasiḥ. 
Seǧmem x Mariya s řehna. Netta tuɣa tᵉttamar aṭṭas xawem. 
Seǧmem s řehna x Andrunikus d Yuniyas inni d raǧ inu d imeḥbas akidi, aqa aten d iryazen ittwassnen ɣar rrusul, tuɣa aten di Lmasiḥ qbeř xafi. 
Seǧmem s řehna x Ampliyas, amɛizz inu di Siditneɣ. 
Seǧmem s řehna x Urbanus, wenni d amsexxar akidneɣ di Lmasiḥ, u x Astaxis amɛizz inu. 
Seǧmem s řehna x Apillis wenni ittwafarzen di Siditneɣ. Seǧmem s řehna x aytbab n taddart n Aristubulus. 
Seǧmem s řehna x Hirudiyun wenni d řaǧ inu. Seǧmem s řehna x aytbab n taddart n Narkissus inni iǧan di Siditneɣ. 
Seǧmem s řehna x Tarifina d Tarifusa, tinni ittamaren di Siditneɣ. Seǧmem s řehna x Parsis, amɛizz inu, wenni ittamaren aṭṭas di Siditneɣ. 
Seǧmem s řehna x Rufus wenni ittwafarzen di Siditneɣ, uřa x yemmas tenni ɛawed am yict n yemma i necc. 
Seǧmem s řehna x Asinkritus, Fligun, Hirmas, Batrubas, Hirmis uca x wawmaten inni akidsen. 
Seǧmem s řehna x Filuluɣus d Juliya d Niriyus d učmas, d Ulimbas d marra imqeddasen inni akidsen. 
Seǧmem x wayawya s usudem iqeddsen. Marra timesmunin n Lmasiḥ marra ttseǧament xawem. 
Maca ttzawageɣ kenniw, a aytma, maḥend ad teḥḍam zi wi itteggen amsebḍi d tɛinkrifin, barra i tɣuri i teɣrim. Beɛɛdem xasen. 
Minzi am yina war sexxaren ca i Siditneɣ Yasuɛ Lmasiḥ, maca i uɛeddis nsen. S řehrud iṣebḥen d wawařen izewwqen xeddɛen uřawen n iḥafiyyen. 
Minzi ṭṭaɛet nwem tᵉttwassen ɣar marra iwdan. S uyenni farḥeɣ zzaywem, maca xseɣ ad tiřim d imiɣisen di tcuni uřa d imezdagen zi řɣar. 
AREBBI n řehna ad iteḥḥa cciṭan sadu iḍaren nwem deɣya. Arḍa n Siditneɣ Yasuɛ Lmasiḥ ad kiwem yiři. Amin. 
Timutiyu, wenni d amsexxar akidi, ittseǧam-dd xawem s řehna, uřa d inni zi řaǧ inu: Lukiyus d Yasun d Susipatrus. 
Necc, Tartiyus, wenni yuran tabrat-a, ttseǧameɣ xawem di Siditneɣ s řehna. 
Ittseǧam-dd xawem Xayus s řehna. Netta yareḥḥeb zzayi uřa zi tmesmunt marra. Ttseǧamen-dd xawem Irastus, wenni x ssenduq n tendint, d Kwartus, tawmat. 
I Wenni ɣar teǧa ṣṣulṭa maḥend ad kenniw iḍmen ɛlaḥsab L’Injil inu - L’Injil i ittwabarrḥen zi jjihet n Yasuɛ Lmasiḥ ɛlaḥsab asargab n ssirr nni tuɣa innufaren di zzmanat n zic, 
maca aqa ittwasseḍhar-dd řexxu s Tira Iqeddsen s ufus n inabiyyen, uca ittwasscen i marra řegnus ɛlaḥsab řumur n AREBBI, wenni iǧan i řebda, ařami d as ɣa ṭṭaɛen řegnus s l’iman - 
aqa i Netta wenni d Bab n tiɣit weḥḥdes, i Netta umi ɣa yiři uɛuǧi s Yasuɛ Lmasiḥ i řebda qaɛ. Amin. 
Arḍa n Siditneɣ Yasuɛ Lmasiḥ ad kiwem yiři marra. Amin. 
