﻿Irumaniyyen.
3.
I xenni, man řefḍeř ɣar Wudayen, niɣ man tizi n wextan? 
Aṭṭas x kuř iɣezdisen! Xenni ɣar umezwar mmewcen asen ‬wawařen n‮ ‬AREBBI. 
Maɣar mařa tuɣa ca zzaysen war uminen ca, ma xenni beḍřen nitni řaman n AREBBI zi ssibbet n břa l’iman nsen? 
Ɛemmarṣ! Maɣar AREBBI d tidett uca kuř bnadem d bu-ixarriqen, am mammec tura: “Cek ad tbaned d Amsegged s wawařen nnec, ad tiřid tkemmřed di řeṣfayet xmi Cek i ɣa ḥasben.” 
Maca mařa min war isseggden dayneɣ aqa issbeyyen tasegda n AREBBI, min ɣa nini ɛad xenni? Ma AREBBI war ɣares bu řḥeqq umi xaneɣ igga aɣḍab nnes? Necc ssawařeɣ am yijj n bnadem d amednub. 
War xas nessiwiř! Mammec i ɣa iḥaseb AREBBI ddunect řexdenni? 
Mammec mařa tfeyyeḍ tidett n AREBBI ɣar uɛuǧi nnes s uxarriq inu, mayemmi ɛad i ɣa ttwaḥasbeɣ am umednub? 
War iɛeddeř aqa tamesřact teǧa am mammec qqaren inni dayneɣ iceqqfen belli neccin neqqar: “Ejj aneɣ ad negg tuɛeffna, ḥima ad zzayes dd-yekk min icnan!”?, inni aqa řḥukm xasen ad ittwaxemmeř ař ccreɛ iseggden. 
I xenni mammec? Ma neccin ḥsen? Qbeř aqa nufa aqa Udayen d Iramiyyen marra sadu ddenb, 
am mammec tura: “Uřa d ijj war iǧi d amsegged, 
uřa d ijj war ifehhem, uřa d ijj war yarezzu x AREBBI. 
Marra ffɣen zeg webrid, mmenḍaren, uřa d ijj war ittegg tcuni, uřa d ijj. 
Tmijjawin nsen d imeḍřan yarezmen, s iřsawen nsen cemmten, ssem n ifiɣran sadu iyencicen nsen, 
aqemmum nsen iccur s nneɛřet d tarzugi, 
s iḍaren nsen ttqeǧiqen ɣar usizzeř n idammen, 
areyyeb d tamara deg ibriden nsen, 
abrid n řehna war t ssinen ca, 
tiggʷudi n AREBBI war teǧi qibač i tiṭṭawin nsen.” 
Neccin nessen belli marra min teqqar Ccariɛa, aqa teqqar i-t i yinni iǧan sadu Ccariɛa, ḥima ad ittwaqqen kuř aqemmum uca ad tedweř marra ddunect dayes řɛib zzat i AREBBI, 
maɣar zi řexdayem n Ccariɛa war ittwasegged uřa d ijj n bnadem qibač nnes, minzi s Ccariɛa aqa ttwassnen ddnub. 
Maca řexxu aqa teḍhar-dd tsegda n AREBBI břa Ccariɛa, tcehhed xas Ccariɛa d Inabiyyen, 
aqa tasegda n AREBBI zi l’iman n Yasuɛ Lmasiḥ ɣar marra u x marra inni zzayes yumnen, minzi war din bu řfarz. 
Minzi marra xḍan uca ineqṣ i-ten uɛuǧi n AREBBI, 
uca ttwaseggden baṭeř s arḍa nnes s ufekki i iǧan di Yasuɛ Lmasiḥ. 
AREBBI igga i-t d aṣřaḥ qbeř s l’iman deg Idammen nnes, di ssibbet n ddnub nneɣ nni tuɣa negga zic di řmijař n řweqt i d aneɣ iwca AREBBI s ttasiɛ n řxaḍar nnes, ḥima ad isscen tasegda nnes di řweqt-a, 
maḥend di tsegda ad yarr d amseggad wi iǧan di l’iman n Siditneɣ Yasuɛ Lmasiḥ. 
Mani iǧa xenni usemɣar? War xas nessiwiř. S man Ccariɛa? S man řexdayem? Ɛemmarṣ, maca s Ccariɛa n l’iman. 
S uya neḥseb belli bnadem ad ittwasegged s l’iman, war iǧi s řexdayem n Ccariɛa. 
Niɣ AREBBI n Wudayen waha, war iǧi n řegnus ɛawed? Wah, uřa n řegnus! 
Minzi AREBBI d Ijjen wenni i ɣa iseggden inni ittwaxetnen s l’iman, u ɛawed inni war ittwaxtinen s l’iman. 
Ma nbeṭṭeř Ccariɛa s l’iman? Wayyaw, s řemqřub, neccin ad neḍmen Ccariɛa. 
