﻿Irumaniyyen.
2.
S uyenni aqa cek břa smaḥet, a bnadem, cek d wenni iḥekkmen x wenni d ac yudsen, minzi di min tḥekkmed x umeddukkeř nnec, aqa uřa d cek d bu-umarwas di man aya, maɣar cek, wenni ittḥasaben inneɣni, řesqent ɣarek uřa d simant n tmesřayin. 
Neccin nessen belli řḥukm n AREBBI d tidett x yinni ɣar teǧa tesɣart di tmesřayin am tina. 
Maca mayemmi d ac ittɣiř, a bnadem, wenni iḥekkmen x yinni itteggen timesřayin-a am uřa d cek tᵉttegged tent simant nnec, aqa tzemmared ad tarewřed zi řḥukm n AREBBI? 
Niɣ tesseḥqarad agřa n tcuni nnes d ttasiɛ n uraji nnes d ttasiɛ i d ac iwcin, uca war tessined ca belli tcuni n AREBBI aqa ineddeh i cek ɣar ttubet? 
Maca di ssibbet n řeqsaḥet d nnuqṣan n ttubet n wuř nnec, tyarwed i yixef nnec ijj n řeqdar n weɣḍab i wass n weɣḍab u i usargeb n řḥukm iseggden n AREBBI, 
wenni i ɣa ixeǧṣen kuř ijjen ɛlaḥsab řexdayem nnes: 
... i yinni yarezzun aɛuǧi d ccan d min war ifennin am ttṣebbaren nitni di řexdayem iṣebḥen, aqa ad asen ixeǧeṣ s Tudart ittduman, 
... maca i yinni ittɣewwɣen, inni war ittnumen ttᵉṭṭaɛen i tidett, maca ttnumen ttᵉṭṭaɛen i min war iseggden, aqa ad asen ixeǧeṣ s weɣḍab d tefqeḥt, 
... u s řmeḥnet d řeḥsaret ad ixeǧeṣ kuř řeɛmar n bnadem i itteggen řɣar, Udayen d amezwar, xenni Iramiyyen, 
... maca aɛuǧi d ccan d řehna ad iřin i marra wi itteggen tcuni, i Wudayen d amezwar uca xenni i Iramiyyen, 
minzi AREBBI war ittegg ca s wudmawen. 
Minzi marra inni ɣa ixḍan břa Ccariɛa, břa Ccariɛa ad ttwahellken uca marra inni ɣa ixḍan sadu Ccariɛa, aqa s Ccariɛa ad ttwaḥasben 
maɣar war iǧi inni ittesřan i Ccariɛa nitni d imseggaden ɣar AREBBI, maca inni itteggen Ccariɛa aqa nitni ad ttwaseggden. 
Minzi mařa řegnus nni war ɣar iǧi bu Ccariɛa, tteggen s ṭṭbiɛet min dayes di Ccariɛa, aqa yina d Ccariɛa i yixef nsen, waxxa nitni war ɣarsen bu Ccariɛa, 
uca sscanen belli řxedmet n Ccariɛa tura deg wuřawen nsen, am teched ɛawed tnefsect nsen, am ixarriṣen nsen deǧen uřa ttdafaɛen x yixef nsen jar asen 
deg wass min di i ɣa iḥaseb AREBBI x min innufaren deg iwdan s Yasuɛ Lmasiḥ ɛlaḥsab L’Injil inu. 
Maca mařa cek, umi řaɣan Uday, tsennaded x Ccariɛa u tessemɣared di AREBBI, 
aqa tessned min ixs Netta, tfarrzed min iṣebḥen, minzi tᵉttwassřemded zi Ccariɛa, 
u tḥasbed ixef nnec d amgewwed n idarɣařen d tfawt i yinni iǧan di taǧest, 
d amseggem yarebban ibuhařiyyen d amseřmad n iḥenjiren, u aqa ɣarek ṣṣifet n tussna d tidett di Ccariɛa, 
iwa cek wenni isseřmaden inneɣni, ma war tesseřmided ca ixef nnec? Cek wenni ittbarrḥen ‘War tticar!’, ma tᵉttacared? 
Cek wenni iqqaren ‘War zenni!’, ma tzennid? Cek d wenni icarrhen l’aṣnam, ma tacared zzawect nsen iqeddsen? 
Cek wenni issemɣaran di Ccariɛa, ma tfeḍḥed AREBBI umi texḍid di Ccariɛa? 
Minzi x ssibbet nwem ttceqqafen deg Yisem n AREBBI jar řegnus am mammec tura. 
Aqa axtan ineffeɛ mařa tḍeffared Ccariɛa nican, maca mařa tᵉttɛeddid x Ccariɛa, aqa axtan nnec ittwaḥseb břa axtan. 
Mařa wenni břa axtan ittᵉṭṭef di řumar iseggden n Ccariɛa, ma xenni war iḥesseb břa axtan nnes d axtan? 
Wenni iḍeffaren Ccariɛa s ṭṭbiɛet am iǧa břa axtan, ad cek iḥaseb, cek wenni ittɛeddan x Ccariɛa s Tira d wextan! 
Minzi Uday war iǧi d Uday s wudem, u axtan s tidett war iǧi min ittbanen deg weysum, 
maca netta d Uday wenni ittiřin d Uday di tnuffra, u axtan aqa netta d wenni deg wuř, s Arruḥ, war iǧi d wenni ittwaggen ɛlaḥsab Tirra n Ccariɛa, ařami asemɣar nnes war dd-ittis ca zeg iwdan maca zi AREBBI. 
