﻿Řexdayem n rrusul.
27.
Xas uca ikkes Fastus awař, aqa ittxeṣṣa ad ittwassekk ɣar Iṭalya. Netta isellem Bulus d ca n imeḥbas nneɣni i yijj n řqebṭan x mya qqaren as Yuliyus, tuɣa-t zi řkumpaniyyet n qayṣar. 
Řami nenwa ad nbeḥḥar, nenya deg ijj n uɣarrabu zi Adramantus, tuɣa ad ikk x jjwayeh i iǧan x tma n Asiya, uca nruḥ. Inya akidneɣ deg uɣarrabu Aristarxus, ijj n weryaz zi Tissalunika di Makiduniya. 
Tiwecca nnes niweḍ ɣar Ṣaydun. Řqebṭan x mya tuɣa iǧa mliḥ ak-d Bulus, isamḥ as ad iraḥ ɣar imeddukkař nnes ḥima ad xas sexxaren. 
Ssenni neffeɣ, nbeḥḥar s ijj n ddura, neɛdu x Qubrus, minzi asemmiḍ tuɣa iccat dayneɣ deg uɣembub. 
Neẓwa řebḥar n Kilikiya d Pamfiliya, uca niweḍ ɣar Mira, ict n tendint di Likiya. 
Řqebṭan x mya yufa din ijj n uɣarrabu zi Iskandariyya, ittraḥ ɣar Iṭalya, issenya aneɣ dayes. 
Maɣar aɣarrabu war iruḥ ɣar zzat aṭṭas n wussan, niweḍ s uɣiř zzat i tegzirt n Knidus, u minzi war d aneɣ yejji usemmiḍ ad nraḥ ɣar zzat, nbeḥḥar deg udduri n Krita zzat i Salmuni. 
Řami tuɣa war nzemmar ɛřayen ad nendeh ɣar zzat, niweḍ, řami newta ict n ddura temɣar, ɣar ijj n wemcan umi qqaren ‘Řmuyyat Iṣebḥanen’, wenni iǧan ṭṭarf i tendint qqaren as Lasiyya. 
Neqqim aṭṭas n řweqt dinni ař dd-iɛdu ass n uẓummi n Wudayen. Umi idweř usafar di řebḥar yewɛar, iɛřem asen Bulus, 
inna: “A iryazen, ttwařiɣ asafar ad yawi druct d txessart aṭṭas, war teǧi i sseřɛet d uɣarrabu nneɣ waha, maca uřa i tudart nneɣ.” 
Maca řqebṭan x mya tuɣa isřa ktar ɣar umendah d řqebṭan n uɣarrabu x min tuɣa ittesřa ɣar wawařen n Bulus. 
Umi tuɣa amcan n řmuyyi war iḥři ḥima ad sseɛdun řmecta din, ibedd array n wezyen ameqqran nsen ad ffɣen ssenni, balak ad awḍen ɣar Finiks, ijj n řmuyyi di Krita, iwařan ljanub, ḥima ad din sseɛdun řmecta. * 
Umi isaha usemmiḍ n ljanub, tuɣa nitni ssittimen ad awḍen am mammec tt xsen, uca nebda ttcuqan x ṭṭarf n tma n Krita. 
Maca cwayt awarni man aya, tekkar ict n tḥaryaḍt, qqaren as ttifun ‘Uruklidun’. 
Ittwaksi zzayes uɣarrabu s jjehd, war izemmar i usemmiḍ. Xenni nestewṭeɛ uca nettwandeh. 
Am nekka deg udduri n ict n tegzirt d tameẓyant umi qqaren ‘Qawda’, s uɣiř i nemneɛ ḍman n tɣarrabut n usellek i iǧan ɣar ḍeffar n uɣarrabu. 
Nessgeɛɛed i-tt, u nessejhed aɣarrabu am t nebyes swadday s iḥezzamen. Maɣar tuɣa neggʷed aqa aɣarrabu ad immenḍar x ict n řgeɛɛdet n ijdi di řebḥar, nessehwa-dd řbacc uca nettwandeh s usemmiḍ u ammu i nřaḥ. 
Uca umi taḥaryaḍt thaj xaneɣ aṭṭas, xenni tiwecca nnes nenḍar sseřɛet nneɣ di řebḥar. 
Deg wass wiss třata nenḍar řeqcuɛ n uɣarrabu s ifassen nneɣ. 
Řami taḥaryaḍt teqqim tᵉttsuḍ aṭṭas n wussan, war tbin tfuct řa d taziri uřa d itran, xenni ittwaqḍeɛ marra řayas ad neqqim neddar. 
Řami war izemmar uřa d ijj ad iṣbar ɛad, ibedd Bulus di řwesṭ nsen, inna: “A iryazen, tuɣa ittxeṣṣa awem ad ɣari tesřem, xenni war neffiɣ ca zi Krita u war d aneɣ třeqqef druct-a d řeḥṣaret-a. 
Řexxu ad kenniw cejjɛeɣ, minzi uřa d ijj zzaywem war ittweddari ca tudart nnes, mɣir aɣarrabu waha ad iɣebbař. 
Minzi ibedd-dd ɣari ǧiřet-a lmalak n AREBBI wenni necc nnes u wenni umi ɛebbdeɣ. 
Netta inna ayi: “War tteggʷed ca, a Bulus, minzi ittxeṣṣa ac ad tbedded qibač i qayṣar. Xzar marra inni akidek ittbeḥḥaren, aqa iwca ac ten AREBBI.” 
S uya ggem taryast, a iryazen, minzi ttiqqeɣ di AREBBI, belli ad teffeɣ am mammec d ayi inna. 
Maca ad nemmenḍar x ict n tegzirt.” 
Awarni řami nettwaɛaren zi ssa ɣar diha u nessiḥeř ixef nneɣ di Řebḥar n Hadriyus, ittɣiř asen i ibeḥriyyen di řwesṭ n ǧiřet, aqa nqarreb-dd ɣar řbarr. 
Nitni nḍaren ayřizim di raǧaɣ n řebḥar, ɛebbaren ɛicrin n tiddiwin. Umi ɛdun cwayt, ɛebbaren nitni xemmesṭac n tiddiwin. 
Am neggʷed ad neřqef imucan n sseǧaḥ, nenḍar arebɛa n iyřizam zi ḍeffar n uɣarrabu, uca nettar ad dd-yaweḍ uziř. 
Řami tuɣa ibeḥriyyen xsen ad arewřen zeg uɣarrabu, ssḍaren taɣarrabut n usellek ɣar řebḥar axmi xsen ad dayes nyin maḥend ad cedden aɣarrabu ɣar temmurt. 
Umi iẓra Bulus man aya, inna i řqebṭan x mya u i iɛeskariyyen: “Mařa ina war qqimen deg uɣarrabu, war tzemmarem ad ttwassnejmem.” 
Xenni qessen iɛeskariyyen iseɣwan n tɣarrabut n usellek uca jjin tt ad truḥ. 
Ařami dd-iqarreb ad iṣbeḥ řḥař, iziyyar i-ten Bulus marra ḥima ad ccen, inna: “Arbeɛṭac n wussan aqa war teccim walu zi ssibbet n lxaṭar. 
S uyenni cejjɛeɣ kenniw ad teccem, ḥima ad teqqimem teddarem, minzi war iweṭṭi uřa d ijj n uẓeṭṭu n ucuwwaf n uzeǧif n uřa d ijjen zzaywem.” 
Awarni řami inna aya, iksi aɣrum, issemɣar AREBBI qibač i marra, yarẓa i-t, ibda ad icc. 
Marra ttwacejjɛen u ksin macca. 
Tuɣa aneɣ deg uɣarrabu di mitayen u-setta u-sebɛin n yeryazen. 
Řami jjiwnen s macca, bdan ssefsasen aɣarrabu, am ksin řḥebb n yirden, nḍaren t di řebḥar. 
Ařami iṣbeḥ řḥař, tuɣa ibeḥriyyen war ssinen man tammurt i teǧa, maca ẓrin ijj n umesruq n řebḥar ɣar tma n řbarr uca mcawaren, ma zemmaren ad din ɛarnen aɣarrabu. 
Umi qeḍwen iyřizam n uɣarrabu, jjin ten di řebḥar, fesyen iceddan n řemqadef, ssgeɛɛden řbacc n zzat i usemmiḍ ittsuḍen, wejjhen ɣar tma n řbarr. 
Maca aɣarrabu iwta ijj n uɛarric n yejdi mani iǧa řebḥar ɣar tnayen n iɣezdisen uca nnuɣen s uɣarrabu. Yarsa zzat n uɣarrabu x uɛarric n yejdi, war izemmar ad inhezz, maca ḍeffar n uɣarrabu iqeřɛ i-t jjehd n řemwaj. 
Tuɣa newwan iɛeskariyyen ad nɣen imeḥbas ḥima war immenḍar ḥed ixef nnes di řebḥar maḥend ad iɛumm, uca ad yarweř. 
Maca řqebṭan x mya wenni tuɣa ixs ad issenjem Bulus, issbedd i-ten, yumur belli inni izemmaren ad mmenḍaren ixef nsen deg waman, maḥend ad ɛummen, ad ɛummen d amezwaru, maḥend ad awḍen ɣar řbarr. 
Wi iqqimen, ijja i-ten ad ẓwan x tfeřwin u x izeynan n ikeccuḍen n uɣarrabu, uca ammu i iwḍen marra ɣar řbarr, ttwassnejmen. 
