﻿Řexdayem n rrusul.
23.
Bulus iqceɛ deg inni iqqimen di Jmaɛet Tameqqrant, inna: “A iryazen tawmat! Aqa necc uyureɣ s tnefsect teṣfa ɣar marra iɣezdisen zzat i AREBBI ař ass-a!” 
Ananiyas, akehhan, yumur inni i tuɣa din akides ibedden, ad t wten ɣar uqemmum. 
Xenni inna as Bulus: “Ad cek iwwet AREBBI, cek d řḥiḍ ijiyyaren! Aqa cek teqqimed da maḥend ad xafi tḥekmed ɛlaḥsab Ccariɛa, maca txařafed Ccariɛa s yixef nnec am tumured ad ayi wten!” 
Inni i tuɣa kis ibedden, nnan: “Ma tdeǧmed akehhan n AREBBI?” 
Inna Bulus: “A tawmat, war ssineɣ aqa-t d akehhan, minzi tura: ‘Azeǧif n řgens nnec war t neɛɛeř!’” 
Umi issen Bulus, aqa azyen n řgens d Iṣaduqiyyen u azyen nneɣni zeg Ifarisiyyen, iřaɣa di Jmaɛet Tameqqrant: “A iryazen tawmat, necc d Afarisi, mmis n Ifarisiyyen, necc ttᵉttwaḥakameɣ di ssibbet n usitem d tnukra n imettinen.” 
Ařami inna aya, imsar ijj n uxarweḍ jar Ifarisiyyen d Iṣaduqiyyen uca ittwabḍa řgens, 
minzi Iṣaduqiyyen qqaren belli war teǧi ca d tanukra niɣ d lmalakat uřa d buḥbeř, maca Ifarisiyyen cehhden x marra man aya. 
Ikkar ijj n uxarweḍ d ameqqran. Ca n imseřmaden n idlisen zeg wezyen n Ifarisiyyen kkaren, ttemnaqacen akidsen s jjehd, nnan: “War nufi uřa d ijj n řɣar di bnadem-a. Mařa issiweř akides ijj n buḥbeř niɣ ijj n lmalak, man řɛib i yeǧa xenni di man aya?” 
Umi ikkar ijj n uxarweḍ d ameqqran, iggʷed ukumandar ad mezzqen Bulus. Xenni yumur iɛeskariyyen Irumaniyyen maḥend ad dd-asen, ad t xeḍfen zi řwesṭ nsen, uca ad t awyen ɣar lqecla. 
Di ǧiřet iḍhar-dd Siditneɣ i Bulus, inna as: “Egg uř, minzi am mammec xafi tcehded di Urcalim ammu i ɣa tcehded uřa di Ruma!” 
Ařami d iṣbeḥ řḥař, munen ca zeg Wudayen, qqnen ixef nsen s ict n nneɛřet maḥend war ttᵉtten war sessen ař d nɣen Bulus. 
Ktar zi arebɛin n yeryazen kksen wawař-a s ict n tjaǧit. 
Ina ruḥen ɣar imeqqranen n ikehhanen d imɣaren n řgens, nnan: “Aqa neqqen ixef nneɣ s ict n nneɛřet maḥend war nᵉttett walu ař ɣa nenneɣ Bulus. 
Xenni řexxu, mařa kenniw d imeqqranen n Jmaɛet Tameqqrant ad tᵉttarem zeg ukumandar maḥend ad t-i-dd-indeh ɣarwem axmi texsem ad txebbcem di tmesřact-a mliḥ, aqa neccin newjed ḥima ad t nenneɣ qbeř ma ad ɣarwem dd-yaweḍ.” 
Isřa mmis n učmas n Bulus x tḥiřet-a. Xenni yudef ɣar lqecla uca ixebbar Bulus x man aya. 
Iřaɣa Bulus i yijjen zeg řqebṭanat x mya, inna as: “Ruḥ s ubřiɣ-a ɣar ukumandar minzi ɣares ca ad as t yini.” 
Iksi řqebṭan x mya abřiɣ, uca iwyi t ɣar ukumandar, inna: “Bulus, ameḥbus, iřaɣa ayi-dd, ittar ayi ad ac awyeɣ abřiɣ-a i ɣar iǧa ca ad ac t ini.” 
Iṭṭef ukumandar abřiɣ s ufus, iddur zzayes weḥḥdes uca isseqsa t: “Min ɣarek ad ayi t tinid?” 
Inna as ubřiɣ: “Aqa Udayen arezzun ad zzayek ttaren maḥend ad dd-tessehwid Bulus tiwecca ɣar Jmaɛet nsen Tameqqrant, axmi xsen ad t sseqsan ɛad. 
War ttejji ad cek ssqenɛen, minzi ktar zi arebɛin n yeryazen zzaysen ggin as ijj n řfex deg webrid, qqnen ixef nsen s ict n nneɛřet maḥend war ttᵉtten war sessen ař t nɣen. Aqa nitni wejden řexxu, ttrajan ad tewced ttesriḥ nnec.” 
Akumandar ijja abřiɣ ad iraḥ, inna as: “War ttejji ḥed ad issen, aqa tessaregbed ayi x man aya.” 
Xenni iřaɣa-dd ɣares x tnayen n iqebṭanen x mya, inna: “Swejdem mitayen n iɛeskariyyen Irumaniyyen maḥend ad raḥen ɣar Qayṣariya ɣar třata n ǧiřet, akidsen sebɛin n yinni inyin x yiysan u mitayen n imjebbaden n řqews s ufus ufusi. 
Ejj i-ten ad sswejden ict n zzayřet maḥend ad xas ssɣimen Bulus, ad t nedhen ɣar lɛamil Filiks di řaman.” 
Xenni yura ict n tebrat, iwca asen tt. Ammu i dayes yura: 
“Kludiyus Lisiyas, i lɛamil yuɛřan Filiks: Sřam xak! 
Udayen aqa ṭṭfen aryaz-a u tuɣa xsen ad t nɣen. Wciɣ as afus ak-d iɛeskariyyen Irumaniyyen uca fekkeɣ t umi sřiɣ aqa-t d Arumani. 
Minzi tuɣa xseɣ ad ssneɣ min xef t ḍeřmen, iwyeɣ t ɣar Jmaɛet nsen Tameqqrant. 
Ufiɣ aqa ḍeřmen t di ssibbet n ca n ixarwiḍen n Ccariɛa nsen, maca war din ufiɣ aḍřam i isdaheǧen iceddiyyen niɣ řmewt. 
Umi d ayi ittwanna, belli Udayen ggin as ijj n řfex deg webrid s tnuffra, ssekkeɣ t-i-dd řexdenni ɣarek, umureɣ i yinni t iḍeřmen ad ɣarek ruḥen maḥend ad kides ssiwřen zzatek mi xef t ḍeřmen. S ttisir!” 
Iɛeskariyyen Irumaniyyen ksin Bulus, am mammec d asen yumur, uca iwyen t s ǧiřet ɣar tendint n Antipatris. 
Tiwecca nnes jjin inni inyin x yeysan ad ɛeqben iɛeskariyyen imeddukkař nsen x iḍaren ɣar lqecla. 
Xenni iwyen t ɣar Qayṣariya, wcin tabrat i lɛamil uca ssbedden Bulus zzates. 
Awarni řami iɣra tabrat nni, isseqsa x man jjihet i zi dd-yusa netta, uca řami yufa belli netta yusa-dd zi Kilikiya, 
inna as: “Ad ac sřeɣ mařa uřa d yinni i cek iḍeřmen iwḍen-dd da!” Xenni yumur ad t ḥḍan di taddart n ccreɛ n Hirudus, umi qqaren ‘Prituriyum’. 
