﻿Řexdayem n rrusul.
20.
Awarni řami yarsa uɣuwweɣ, iřaɣa-dd Bulus x imeḥḍaren, iweddeɛ i-ten s usudem n wawmaten, uca iffeɣ ḥima ad iraḥ ɣar Makiduniya. 
Řami icuq di jjwayeh nni, icejjeɛ i-ten s waṭṭas n wawařen, xenni yiweḍ ɣar Hillas, ixs ad yini ɣar jjihet Axaya. 
Ařami isseɛdu din třata n iyuren, ssewjden as Wudayen ijj n řfex, umi tuɣa iggur ad ibeḥḥar ɣar Suriya. S uya igga ad yeɛqeb x webrid n Makiduniya. 
Supatrus zi tendint n Biriya, Aristarxus d Sikundus zi Tissalunika, Xayus zi Dirbi, Timutiyu zi Listra u Ticikus d Trufimus zi Asiya uyuren akides ař Asiya. 
Ina izwaren aneɣ, ttrajan aneɣ di Truwas. 
Maca neccin neffeɣ zi Filippi, tandint tamezwarut n Makiduniya, awarni řami kemmřen wussan n Weɣrum břa Antun, nekka x řebḥar u di xemsa n wussan niweḍ-dd ɣar Truwas mani neqqim sebɛa n wussan. 
Deg wass amezwaru n ssimana umi munen imeḥḍaren maḥend ad arẓen aɣrum n tnemmirt, issiweř Bulus akidsen. Isszugar Bulus di řhard nnes ař řwesṭ n ǧiřet, maɣar netta tuɣa inwa ad isafar tiwecca nnes. 
Aqa areqqen din aṭṭas n řefnarat di tɣurfet n sennej i di tuɣa nmun. 
Tuɣa din ijj n ubřiɣ qqaren as Utixus, iqqim di řkazi, ittesřa, řexdenni ikka xas yiḍeṣ yuǧeɣ am tuɣa Bulus isszugar di řhard nnes. Umi tuɣa iṭṭeṣ, iwḍa-dd zi ṭṭebqet wiss třata ɣar wadday, ksin t immut. 
Maca Bulus ihwa, iwḍa xas, idarreɛ as, inna: “War tennexřiɛem ca, aqa dayes tudart.” 
Xenni yuři ɛawed, yarẓa aɣrum, icca cwayt zzayes, xenni issiweř akidsen ɛad aṭṭas ařami d řefjar. Xas uca iruḥ isafar x temmurt, 
am dd-iwyen nitni aḥenjir iddar, farḥen as aṭṭas. 
Maca neccin nenya deg uɣarrabu, nbeḥḥar ɣar řmarsa n Tissus maḥend ad kidneɣ dd-nawi Bulus ssenni, am mammec tuɣa ittḍebbar, maɣar netta s yixef nnes ikka ɣar din x temmurt. 
Ařami zzayes nareḥḥeb di Tissus, neksi t di tɣarrabut uca niweḍ-ḍḍ ɣar Mitilini. 
Ssenni neɛdu tiwecca nnes ɣar tegzirt n Xiyus u farwecca nnes niwed ɣar Samus, neqqim di Truxiliyun. Deg wass awarni as niweḍ ɣar Militus, 
minzi Bulus igga ad iɛdu Afasus x řebḥar ḥima war ittɛeṭṭař dinni, minzi tuɣa ittqeǧeq ḥima, meɛlik iɛeddeř, ad iɛeyyed Řɛid n Xemsin n Wussan di Urcalim. 
Zi Militus ijja ad dd-asen imɣaren n tmesmunt di Afasus. 
Řami dd-usin ɣares, inna asen: “Kenniw tessnem zeg wass amezwaru umi dd-udfeɣ ɣar Asiya, mammec ǧiɣ akidwem marra ussan, 
am tuɣa ttsexxareɣ i AREBBI s marra awaḍeɛ u s imeṭṭawen, uřa deg iɣekkwan i xafi ikkin zi ssibbet n tmeɛmač n Wudayen. 
War jjiɣ ca zi min inefɛen i řeɛmur nwem war d awem t barrḥeɣ, war t ssřemdeɣ di řeswaq u di tudrin, 
am ssqenɛeɣ Udayen d Iramiyyen maḥend ad dd-dewřen ɣar AREBBI, ad amnen di Siditneɣ Yasuɛ Lmasiḥ.    
U řexxu ad raḥeɣ ɣar Urcalim am ttwacarfeɣ zi Arruḥ, war ssineɣ min d ayi ittrajan din, 
mɣir aqa Arruḥ Iqeddsen iched ayi di kuř tandint, iqqar: ‘Aqa iceddiyyen d řemḥayem ttrajan cek!’ 
Maca necc war ḥessbeɣ tudart inu ca tiɣřa i yixef inu, maḥend ad kemmřeɣ ticři inu d řxedmet n tsexxart i ksiɣ zi Siditneɣ Yasuɛ ḥima ad cehdeɣ x Řexbar Aṣebḥan n arḍa n AREBBI. 
U řexxu ssneɣ, aqa uřa d ijj zzaywem ad iẓar aɣembub inu ɛad, marra kenniw inni jar awem ggureɣ, ttbarrḥeɣ s Tgeldit n AREBBI. 
S uyenni ad xawem cehdeɣ ass-a, belli necc ttbarriɣ ixef inu zeg idammen nwem marra. 
Minzi war ɛgizeɣ ad awem ssecneɣ marra min ittexs AREBBI. 
S uyenni ḥḍam x yixef nwem u x tḥimart tmun min xef igga Arruḥ Iqeddsen kenniw d imeḥḍayen, ḥima ad tarwesem tamesmunt n Lmasiḥ tenni d ikesseb s Idammen nnes. 
Minzi ssneɣ belli awarni twaḥit inu ad ɣarwem dd-adfen wuccanen imuzzaren inni war ittejjin taḥimart. 
Ɛad ad zzaywem dd-kkaren yeryazen inni i ɣa issiwřen řhard iɛewwjen ḥima ad ssuffɣen imeḥḍaren zeg webrid, ad ten jarren awarni asen. 
S uyenni faqem, tɛeqřem belli třata n iseggʷusa, ǧiřet d wass, war beddeɣ ad ssmeḥdeɣ kuř ijjen zzaywem s imeṭṭawen. 
U řexxu ad kenniw sellmeɣ i AREBBI u i wawař n arḍa nnes, i Wenni ɣar iǧa tizemmar ḥima ad kenniw ibna u ad awem iwc řwart ak-d marra imqeddasen. 
War ḍmiɛeɣ di nnuqart niɣ deg wureɣ niɣ deg warruḍ uřa zeg ijjen. 
Kenniw tessnem simant nwem belli ifassen inu aqa xedmen i min ḥwajeɣ u i min ḥwajen inni iǧan akidi. 
Di kuřci ssecneɣ awem belli ittxeṣṣa, am nxeddem ammu, ad newc afus i yinni iḍeɛfen uca ad nfekkar deg wawařen n Siditneɣ Yasuɛ, belli inna: ‘Sseɛd n wenni iwcin x wenni iksin.’” 
Awarni řami inna aya, iwḍa x ifadden nnes, iẓẓuǧ u marra iryazen akides. 
Aqa din jar asen aṭṭas n imeṭṭawen uca darrɛen as, ssudmen t. 
Ceḍnen aṭṭas, amezwar n marra x wawař i inna, belli war ẓarren ca aɣembub nnes ɛad, uca ssqebbḍen t ɣar uɣarrabu. * 
