﻿Řexdayem n rrusul.
19.
Řami tuɣa Apullus di Kurintus, icuq Bulus di jjwayeh yuɛřan, yiweḍ-dd ɣar Afasus, uca ibda ittseqsa imeḥḍaren i din yufa. 
Isseqsa ten: “Ma tqebřem Arruḥ Iqeddsen řami tumnem?” Nitni arrin-dd xas, nnan: “War nesři qaɛ belli din Arruḥ Iqeddsen.” 
Inna asen: “Xenni min zi tᵉttwassɣeḍṣem?” Nnan as: “S useɣḍeṣ n Yuḥanna!” 
Xenni inna Bulus: “Tuɣa Yuḥanna isseɣḍaṣ řgens s useɣḍeṣ n ttubet. Iqqar asen ittxeṣṣa ad amnen s wenni i dd ɣa yasen awarni as, aqa Netta d Yasuɛ Lmasiḥ.” 
Awarni řami sřin timesřayin aya, ttwassɣeḍṣen deg Yisem n Siditneɣ Yasuɛ Lmasiḥ. 
Umi xasen issars Bulus afus, ihwa-dd xasen Arruḥ Iqeddsen, uca bdan ssawařen s ijj n yiřes nneɣni uca bdan ttnabben. 
Tuɣa-ten qaɛ tenɛac n yeryazen. 
Yudef Bulus ɣar temzida, issawař akidsen teřt n iyuren s teryast, ittḥeddat ɣarsen, yarezzu ad ten isseqnaɛ di min itthemman Tageldit n AREBBI. 
Maca řami dewřen ca zzaysen qesḥen, ttemcubbucen, ceqqfen deg Webrid n AREBBI zzat i yinni din imunen zi řegnus, xenni iggʷej Bulus xasen, uca issbeɛɛed xasen imeḥḍaren, ibda issawař akidsen kuř ass di temzida n ijj n weryaz qqaren as Tirannus. 
Ammu i yegga tnayen n iseggʷusa ařami marra inni tuɣa izeddɣen di Asiya sřin Awař n SIDI, am Udayen am Iramiyyen. 
Tuɣa AREBBI ittegg řeɛjayeb imeqqranen s ifassen n Bulus, 
ařami ksin řemḥamat n řeqṭen d westawen n ibuyas i iǧan arruḍ x arrimet nnes, ssarsen ten x imehřac, uca xenni ruḥen xasen řehřacat uca ccwaṭen ffɣen zzaysen. 
Tuɣa din ɛawed ca n Wudayen inni tuɣa igguren di temmurt, tuɣa ssuffuɣen ccwaṭen. Nitni ttɛezzmen x yinni di iǧa řaryaḥ aɛeffan s Yisem n Siditneɣ Yasuɛ, qqaren: “Neccin nettɛezzem xak s Yisem n Yasuɛ i zi ittbarreḥ Bulus.” 
Inni t iggin, aqa aten sebɛa n tarwa n Skiwa, wenni d ijj n umeqqran n ikehhanen d Uday. 
Maca cciṭan aɛeffan yarra-dd, inna asen: “Yeccu ssneɣ t uřa d Bulus ssneɣ t, maca min teɛnam kenniw?” 
Uca bnadem i di iǧa řaryaḥ d aɛeffan ingez xasen, iɣeřb i-ten, inḍar i-ten x temmurt, ařami arewřen zi taddart d iɛaryanen d iyezmen. 
Řexbar-a iffeɣ-dd ɣar marra Wudayen d Iramiyyen inni izeddɣen di Afasus. Tewḍa-dd ict n tiggʷudi temɣar x marra nitni uca ittwassemɣar Isem n Siditneɣ Yasuɛ Lmasiḥ. 
Aṭṭas n yinni yumnen usin-dd, steɛtarefen x iɛeddiyyen nsen, neɛmen s min tuɣa tteggen. 
Uřa d aṭṭas n iseḥḥaren yarwen idlisen nsen, sscemmḍen ten zzat i marra. Nitni ggin asen řeḥsab uca ufin belli ssekkwan xemsin-ařaf n řweznat n nnuqart. 
Ammu tuɣa l’iman n AREBBI iggam, yarenni di jjehd. 
Awarni řami kemmřent tmesřayin-a, igga Bulus maḥend ad icuq di Makiduniya d Axaya marra, ḥima ad isafar ɣar Urcalim, inna: “Xmi din i ɣa reḥḥgeɣ, ittxeṣṣa ayi ad ẓareɣ Ruma ɛawed.” 
Issekk tnayen n yinni tuɣa ixeddmen akides ɣar Makiduniya, ina d Timutiyu d Irastus, maca netta simant nnes tuɣa iqqim din ɛad ca n řweqt di Asiya. 
Di řweqt nni ikkar din ijj n uxarweḍ d ameqqran x ssibbet n Webrid n AREBBI. 
Minzi tuɣa din ijj n usiyaɣ n nnuqart, qqaren as Dimitriyu, wenni tuɣa ittṣennaɛ tizawiyyin timeẓyanin n nnuqart n ‘Artimis’ di řeqwařeb, uca ammu i yarbeḥ i ayt n ṣṣenɛet nnes ijj n arbeḥ d ameqqran. 
Issmun-dd ayt n ṣṣenɛet nnes ak-d inni ixeddmen akidsen, inna asen: “A iryazen, kenniw tessnem belli marra arbeḥ nneɣ yusa-dd ak-d ṣṣenɛet-a. 
Kenniw tesřim u tessnem belli Bulus wanita isseqnaɛ aṭṭas n iwdan, war iǧi imezdaɣ n Afasus waha, maca uřa d ibarruten n marra Asiya, aqa issbeɛɛed i-ten x řexyařat-a, iqqar: ‘Řexyařat-a i ittwaggen s ifassen war ǧin ca d irebbiten!’ 
War teǧi tsebbabt-a waha di lxaṭar uca teggur ad tedweř d ict n tmesřact ibeṭṭřen, maca uřa d zzawect n ‘Artimis’, tarebbit tameqqrant, ad tt ḥesben d walu uca ad sseḥqaren tarebbit-a i tɛebbed temmurt n Asiya uřa d marra řegnus.” 
Umi sřin man aya, dewřen xeyqqen aṭṭas. Sɣuyyun, nnan: “Tameqqrant d tarebbit ‘Artimis’ n Ifasusiyyen!” 
Tandint qaɛ txarweḍ am tekmeř uca uzzřen am yijj n bnadem ɣar tiyatir n lmesraḥ, uca Xayus d Aristarxus, iryazen zi Makiduniya, inni d imɛacaren n Bulus deg usafar nnes, ṭṭfen ten uca iwyen ten-dd akidsen. 
Uřa d Bulus tuɣa ixs ad yadef ɣar tiyatir n lmesraḥ, maca imeḥḍaren nnes ssbedden t. 
Izeǧifen imḍebbaren n jjwayeh n Asiya, umi tuɣa aten d imeddukkař nnes, ssekken ɛawed ireqqasen, maḥend ad zayes ttaren ḥima war ittsebbeř ixef nnes ad yadef ɣar tiyatir. 
Řɣaci i ittwassmunen di tiyatir, tuɣa ssekkaren t aṭṭas. Nitni sɣuyyun ijj i wenneɣni, maɣar azyen ameqqran zzayes war issin mixef tuɣa munen. 
Řgens n Wudayen i din iǧan, nedhen ijj n weryaz zzaysen ɣar zzat, ijj n Wuday qqaren as Aliksandir. Netta ikkar, iceyyar s ufus nnes u tuɣa ixs ad issiweř x udafeɛ n Bulus zzat i řgens. 
Maca umi fehmen belli aqa-t d Uday, sɣuyen marra s tmijja d icten ɛřaḥař tnayen n tsaɛɛetin: “Tameqqrant d ‘Artimis’ n Ifasusiyyen!” 
Azeǧif n tendint isshedden řɣaci, inna: “A iryazen n Afasus, man wen war issinen belli tandint n Ifasusiyyen d takehhant tḥeṭṭa nican x zzawect n ‘Artimis’ u x řexyař i dd-iwḍan zeg ujenna! 
S uyenni, umi war izemmar uřa d ijjen ad iɛekkes timesřayin-a, icuwwar awem ad tarsem, war tteggem ca s uqeǧeq, 
minzi tiwyem-dd iryazen-a danita, inni war iǧin d iceffaren n tzawiyyin uřa war ttceqqafen di trebbit nneɣ. 
Maca mařa tuɣa ɣar Dimitriyu u ɣar yinni iǧan akides di ṣṣenɛet ca n ucetci x yijjen, aqa din ijj n lɛamil di tendint. Ejj i-ten ad ɣares dd-qarrben u ad carrɛen ak-d wayawya zzates. 
Maca mařa texsem ca n tmesřact nneɣni, ittxeṣṣa ad ittwafekk man aya deg ijj n wemcan i ittweṣṣan i tmesmunt ɛlaḥsab ccariɛa, 
minzi aqa aneɣ di lxaṭar ad xaneɣ ḍeřmen ass-a zi ssibbet n uɣuwweɣ, minzi war din bu řesbab i zi nzemmar ad dd-narr s yijj n wawař di tmesřact n wegraw-a, minzi nessmuna di řbaṭeř u nettɣewweɣ amenni waha.” 
Awarni řami inna aya, ismeḥ i wegraw ad yuyur. 
