﻿Řexdayem n rrusul.
16.
Řami dd-yusa ɣar tneddam n Dirbi d Listra, tuɣa din ijj n umeḥḍar qqaren as Timutiyu. Tuɣa netta d mmis n ict n temɣart d tudact d řmumina, maca babas d Aramiyu. 
Marra tawmat n Listra d Ikuniya cehden xas s řxar. 
Bulus tuɣa ixs wa ad isafar akides. Xenni iksi t uca ixten as, minzi Udayen di tendint nni ssnen belli babas d Aramiyu. 
Umi kkin x tneddam, ttbarrḥen, sseřmaden ten ɛawed maḥend ad ṭṭfen di tiweṣṣa i yuran rrusul d imɣaren di Urcalim. 
Ammu dewřent tmesmunin beddent mliḥ di l’iman uca tuɣa řqedd nsent imeqqar kuř ass. 
Umi cuqen nitni di jjwayeh n Frixiya d Galaṭiya, imneɛ i-ten Arruḥ Iqeddsen maḥend ad beccaren s Wawař n AREBBI di Asiya. 
Řami dd-usin ɣar jjihet n Misya, arzun ad raḥen ɣar Bitiniya, maca Arruḥ n Yasuɛ war ten ijji. 
Xenni ffɣen-dd zi Misya, hwan ɣar temmurt n Truwas. 
Deg ijj n řewḥiy s ǧiřet iban-dd ijj n weryaz zi Makiduniya ɣar Bulus, ibedd dinni, ittar zzayes, inna: ‘Hwa-dd ɣar Makiduniya ḥima ad ayi tewced afus!’ 
Awarni řami iẓra Bulus řewḥiy-a, nekkar řexdenni maḥend ad nraḥ ɣar Makiduniya, minzi nefhem belli Siditneɣ iřaɣa aneɣ-dd ḥima ad asen nbarreḥ s Řexbar Aṣebḥan. 
Aqa nuyur di řebḥar zi Truwas uca nruḥ nican ɣar Samutraki, u tiwecca nnes nruḥ ssenni ɣar Niyapulis. 
Ssenni nruḥ ɣar Filippi, tenni d lɛaṣima n Makiduniya, tuɣa ṭṭfen tt Irumaniyyen d tzeddiɣt i nitni. Neqqim ijj n řmijař n ca n wussan di tendint nni. 
Deg wass n ssebt neffeɣ zi tewwart n tendint ɣar tma n iɣzar minzi neẓra din ict n taddart n tẓaǧit. Awarni řami neqqim din, nessiweř ak-d temɣarin tinni tuɣa imunen dinni. 
Ict n temɣart nni izzenzen řeḥrar, qqarent as Ludiya zi tendint n Tiyatira, tuɣa tᵉtteggʷed AREBBI. Siditneɣ yarzem as uř nnes ḥima ad tseř mliḥ mixef issawař Bulus. 
Ttwasseɣḍeṣ nettat d aytbab n taddart nnes, uca xenni tᵉttar zzayneɣ, tenna: “Mařa s tidett tᵉttwařam belli necc umneɣ di Siditneɣ, iwa araḥem-dd, qqimem di taddart inu!” Tuɣa tzawg aneɣ aṭṭas. 
Am neggur ɣar taddart n tẓaǧit, temmseřqa akidneɣ ict n tayya, dayes řaryaḥ n tgezzant, tiwi-dd ijj n řefḍeř imɣar i aytbab nnes s tgezzant nni. 
Nettat tḍeffar Bulus d neccin, tesɣuyyu, teqqar: “Iwdan-a d imsexxaren n AREBBI, Amɛuǧi x kuřci, nitni ttbarrḥen i kenniw s webrid n Tudart!” 
Ammu i teqqim aṭṭas n wussan. Maca Bulus, umi tuɣa ittxeyyaq x man aya, inneqřeb, inna i řaryaḥ: “Ttumureɣ cek s Yisem n Yasuɛ Lmasiḥ, ffeɣ zzayes.” Uca iffeɣ-dd řaryaḥ di tsaɛɛet nni. 
Umi ẓrin aytbab nnes belli asitem n řefḍeř nsen iffeɣ zzayes, ṭṭfen Bulus d Sila, jarren ten, iwyen ten ɣar ssuq. 
Nitni iwyen ten zzat i imxazniyyen u zzat i imḍebbaren n tendint, nnan: “Iwdan-a ttxarwaḍen tandint nneɣ, minzi nitni d Udayen. 
Nitni ttbarḥen aneɣ s ttaqalid nni war iḥeǧeř ad tent neqbeř niɣ ad tent neḍfar, minzi neccin d Irumaniyyen!” 
Issmun xasen ijj n řɣaci d ameqqran. Xenni carrgen imxazniyyen arruḍ nsen, umuren ad ten hettken s urekkuḍ. 
Awarni řami ten hettken aṭṭas s urekkuḍ, nḍaren ten di řeḥbes, umuren i uɛessas n řeḥbes ḥima ad xasen iɛess mliḥ. 
U netta, umi iksi tawṣeyyet-a, issidef i-ten ɣar daxeř qaɛ n řeḥbes, iqqen i-ten zeg iḍaren nsen deg ijj n řqařeb n ǧuḥ. 
Deg wezyen n ǧiřet tuɣa Bulus d Sila ttẓaǧan u ttsebbaḥen AREBBI am d asen sřin imeḥbas. 
Řexdenni imsar ijj n wenhezzi n temmurt d ameqqran ařami ittwanhezz dsas n řeḥbes, uca deɣya nnurzment marra tiwwura uca dewřen iceddiyyen n marra imeḥbas fesyen. 
Řami d ifaq uɛessas n řeḥbes, iẓra tiwwura arzment, ijbed ssif nnes, tuɣa iggur ad ineɣ ixef nnes, ittɣiř as belli imeḥbas arewřen. 
Maca Bulus iřaɣa s jjehd: “War ttḍarra ixef nnec, aqa aneɣ da marra!” 
Xenni issareɣ ijj n řefnar, ingez ɣar daxeř, ittarjiji, inḍar ixef nnes ɣar iḍaren n Bulus d Sila. 
Issuffeɣ i-ten-dd ɣar barra, inna: “A řejwad, min ittxeṣṣa ad ggeɣ ḥima ad ṭṭfeɣ Tudart?” 
Nitni nnan as: “Amen di Siditneɣ Yasuɛ Lmasiḥ, ad tᵉṭṭfed Tudart, cek d aytbab n taddart nnec!” 
Ssiwřen Awař n SIDI akides u ak-d marra aytbab n taddart nnes. 
Di tsaɛɛet nni n ǧiřet iwyi ten-dd ɣares, issird asen iyezzimen nsen uca deɣya ittwasseɣḍeṣ netta ak-d marra aytbab n taddart nnes. 
Xenni iwyi ten ɣar taddart nnes, issewjed asen ṭṭabřa, ifarḥ netta d aytbab n taddart nnes, minzi ṭṭfen l’iman zi AREBBI. 
Umi dd-yiweḍ uziř, ssekken imxazniyyen iweqqafen x řaman, ḥima ad inin i uzeǧif n řeḥbes: “Ḍeřq asen-dd i iwdan nni.” 
Umi isřa aya uzeǧif n řeḥbes, yudef-dd ɣar daxeř uca issiweḍ awařen-a ɣar Bulus, inna: “Imxazniyyen sekken-dd ḥima ad awem ḍeřqen. Xenni řexxu, ffɣem, řuḥem di řehna!” 
Maca Bulus inna as: “Waxxa neccin d Irumaniyyen, jjin ad aneɣ hettken s urekkuḍ s bṭayṭay am war dayneɣ iǧi řɛib, nḍaren aneɣ di řeḥbes, uca řexxu, ma xsen nitni ad aneɣ ḍeřqen s tnuffra? Lla, ejj i-ten ad dd-asen s yixef nsen, ḥima ad aneɣ ḍeřqen.” 
Iweqqafen x řaman ruḥen, ssiwḍen awařen-a nni d asen ittwannan ɛawed ɣar izeǧifen n tendint. Uca nitni ggʷeden umi sřin aqa-ten d Irumaniyyen. 
Xenni usin-dd ɣarsen, ttaren zzaysen ad ruḥen, ad ffɣen zi tendint. 
Awarni řami ffɣen-dd zi řeḥbes, ɛeqben ɣar Ludiya, mani ẓrin tawmat. Sscejjɛen ten uca uyuren. 
