﻿Řexdayem n rrusul.
15.
Hwan-dd yeryazen zi Yahudiyya ɣar Antiyuxiya uca bdan sseřmaden i tawmat, nnan: “Mařa war tᵉttwaxetnem ɛlaḥsab tnamit n Ccariɛa n Musa, war tzemmarem ad tᵉttwassnejmem.” 
Ikkar ijj n uxarweḍ d unaqec akidsen zi ṭṭarf n Bulus d Bar-Naba. Imsar aqa Bulus d Bar-Naba, u akidsen ɛad inneɣni, ruḥen ɣar rrusul d imɣaren di Urcalim zi ssibbet n unaqec-a. 
Tessqebbeḍ u tessekk i-ten tmesmunt. Nitni cuqen di marra Finiqiya d temmurt n Samarya uca xebbaren mammec tuben inni iǧan zi řegnus, ssfarḥen marra tawmat aṭṭas. 
Řami iwḍen ɣar Urcalim, tareḥḥeb zzaysen tmesmunt d rrusul d imɣaren u nitni xebbaren i-ten s marra min zzaysen igga AREBBI. 
Maca ca zi tebridt n Ifarisiyyen inni idewřen umnen, kkaren, nnan: “Ittxeṣṣa ad ten txetnem u ad ten umuren ad cebbaren di Ccariɛa n Musa.” 
Munen rrusul d imɣaren ḥima ad mcawaren x tmesřact-a. 
Awarni řami tuɣa ttqacaḥen aṭṭas, ibedd Cimɛun, inna asen: “A iryazen tawmat, kenniw tessnem belli aṭṭas zeg wami AREBBI ixḍar aqa řegnus ad sřen i wawař n Řexbar Aṣebḥan s uqemmum inu uca ad zzayes amnen. 
AREBBI, wenni issnen min iǧan deg wuřawen, iched xasen am d asen iwca Arruḥ Iqeddsen am i neccin. 
Netta war ittegg bu řfarz jar neccin d nitni, am issizdeg uřawen nsen s l’iman. 
Iwa řexxu, mayemmi tᵉttjarrabem ɛad AREBBI u tᵉtteggem ijj n uzayřu x irawen n imeḥḍaren i war zemmaren řejdud nneɣ uřa d neccin ad t narbu? 
Maca s arḍa n Siditneɣ Yasuɛ Lmasiḥ numen aqa ad neṭṭef Tudart am nitni.” 
Isqar řɣaci, nitni sřan i Bar-Naba d Bulus ttɛawaden x řeɛřamat d řeɛjayeb timeqqranin i zzaysen igga AREBBI jar řegnus. 
Umi qqimen sqaren, ikkar Yaɛqub, inna: “A iryazen tawmat, sřem-dd ɣari. 
Cimɛun ixebbar mammec tuɣa igga AREBBI deg umezwar ḥima ad ixdar ijj n řgens zi řegnus i Yisem nnes. 
Man aya ittas-dd ak-d wawařen n inabiyyen am mammec tura: 
“‘Awarni man aya ad dd-ɛeqbeɣ uca ad ssbeddeɣ ɛawed Tazeddiɣt iwḍan n Dawud, u min zzayes yareddǧen ad tt ssgeɛɛdeɣ uca ad tt areqqɛeɣ ɛawed, 
ḥima min iqqimen n iwdan ad arzun x SIDI, uřa d marra řegnus i xef ittwařaɣa s Yisem inu!’, ammu i iqqar SIDI wenni iggin marra aya.” 
Řexdayem n AREBBI aqa ttwassnent zi řebda. 
S uyenni ttwařiɣ icuwwar war nesseḍqiř ca x yinni dd-iddakkwařen ɣar AREBBI zi řegnus, 
maca ad asen nari ḥima ad beɛɛden x texmuji zi tɣarṣa i l’aṣnam u x farq-ccɣeř u x jjiyfat u x idammen. 
Minzi Musa tuɣa ɣares di kuř tandint imxeṭṭaben di temzidawin di řejyuř iɛdun, inni zzayes qqaren di marra ussan n ssebt.” 
Xenni ixḍaren rrusul d imɣaren, jmiɛ ak-d marra tamesmunt, iryazen zi řwesṭ nsen uca ssekken Yahuda, umi qqaren ɛawed Bar-Saba, d Sila ak-d Bulus d Bar-Naba ɣar Antiyuxiya. Iryazen-a tuɣa aten d imeqqranen jar tawmat. 
Urin s ufus nsen ammu: “Rrusul d imɣaren d tawmat. I tawmat i yeǧan di Antiyuxiya d Suriya d Kilikiya, i tawmat i yeǧan zi řegnus. Sřam xawem! 
Nesřa belli ca n yinni dd-yusin zi řwesṭ nneɣ, ṣedɛen kenniw s wawařen nsen, ssenhezzen tanefsect nwem, qqaren: ‘Ittxeṣṣa ad tᵉttwaxetnem u ad tᵉṭṭfem di Ccariɛa!’, umi neccin war d asen numur s man aya. 
S uya nemcawar awarni řami nmun marra, uca nfarz ca n yeryazen ḥima ad ten nessekk ɣarwem ak-d imɛizzen nneɣ Bar-Naba d Bulus. 
Nitni d iryazen inni iṭṭewwɛen tudart nsen i Yisem n Siditneɣ Yasuɛ Lmasiḥ. 
Nessekk-dd akidsen Yahuda d Sila, inni kenniw i ɣa ixebbaren man aya ɛawed s uqemmum nsen. 
Minzi aqa-t di řxaḍar n Arruḥ Iqeddsen u di řxaḍar nneɣ, ḥima war xawem nesseḍqiř ca sennej i timesřayin tinni labudda zzaysent, 
aqa ad taggʷejem x min wehhben d taɣarṣt i l’aṣnam řa x idammen řa x jjiyfat uřa x farq-ccɣeř! Mařa teḥḍam ixef nwem zi man aya, ad teggem mliḥ. Iřim d imtiqqan di Siditneɣ.” 
Inni dd-ittwassekken iwḍen ɣar Antiyuxiya uca ssmunen marra iwdan, wcin asen tabrat. 
Řami tt ɣrin, farḥen nitni, ttwassfewwjen. 
S wawařen aṭṭas ssjehden nitn tawmat uca ssmetnen inni iǧan ak-d Yahuda d Sila, maɣar uřa d nitni tuɣa aten d inabiyyen. 
Awarni řami qqimen dinni ca n řweqt, ssqebbḍen ten wawmaten s řehna ḥima ad dd-dewřen ɣar rrusul. 
Maca Sila tuɣa ixs ad iqqim dinni. 
Bulus d Bar-Naba qqimen di Antiyuxiya, ssɣaran, ttbarrḥen s Wawař n AREBBI ak-d waṭṭas inneɣni. 
Awarni ca n wussan inna Bulus i Bar-Naba: “Ejj aneɣ ad neɛqeb ɣar tawmat di kuř tandint mani tuɣa nettbarreḥ s Wawař n AREBBI, ad nargeb mammec ɣa iffeɣ umeddur nsen.” 
Bar-Naba tuɣa ixs ad kisen indeh Yuḥanna, wenni ittkennan Markus, 
maca Bulus tuɣa war ixs ad t yiwi, minzi Markus ismeḥ daysen umi tuɣa aten di Pamfiliya, u minzi war kisen iruḥ. 
Ikkar ijj n umcubbec d ameqqran jar asen ařami mmsebḍan ijjen x wenneɣni. Bar-Naba yiwi Markus akides uca ibeḥḥar ɣar tegzirt n Qubrus. 
Maca Bulus ixḍar Sila uca iffeɣ, awarni řami sellmen t wawmaten ɣar arḍa n AREBBI. 
Icuq di Suriya d Kilikiya, ittcejjaɛ timesmunin. 
