﻿Řexdayem n rrusul.
9.
Maca Cawul tuɣa ɛad ittsuḍ s uɛeddi d řmewt ḍidd n imeḥḍaren n Siditneɣ. 
Ittar zeg arrays n ikehhanen tibratin i temzidawin n Dimacq, maḥend, mařa yufa ca n yinni iḍeffaren ‘Abrid-a’, iryazen niɣ timɣarin, izemmar ad ten icedd u ad ten dd-indeh ɣar Urcalim. 
Řami din iruḥ, imsar, am tuɣa ittqarrab ɣar Dimacq, tařɣa-dd xas deɣya ict n tfawt zeg ujenna. 
Iwḍa ɣar temmurt, xenni isřa i yict n tmijja teqqar as: “Cawul, Cawul mayemmi xafi tdarraced? Tzeyyared x yixef nnec umi teccated di sřek n buykucḍan.” 
Yarra-dd, inna: “Min teɛnid Cek, a Sidi?” Inna as Siditneɣ: “Aqa d NECC, Yasuɛ wenni x tdarrced. 
Kkar, tudfed ɣar tendint, ad ac ittwanna dinni min ittxeṣṣa ad tegged!” 
Uca iryazen inni kis isafaren, bedden ttbehten, minzi nitni sřin tmijja, maca war ẓrin ḥed. 
Ikkar-dd Cawul zi temmurt, waxxa arzment tiṭṭawin nnes war izemmar ad ittwařa, u nitni gewwden t zeg ufus, nedhen t ɣar Dimacq. 
Třata n wussan tuɣa war ittwiři, war icci, war iswi. 
Tuɣa din di Dimacq ijj n umeḥḍar qqaren as Ananiyas. SIDI inna as deg ijj n řewḥiy: “A Ananiyas!” Inna as: “Aqa ayi da, a Sidi inu!” 
Inna as Siditneɣ: “Kkar, truḥed ɣar webrid umi qqaren ‘Abrid isseggden’, xenni ɣar taddart n Yahuda, seqsa x ijj n weryaz zi Tarsus, qqaren as Cawul, xzar, aqa ittẓaǧa din, 
uca yusa-dd ɣares deg ijj n řewḥiy, aqa ijj n weryaz qqaren as Ananiyas yudef-dd, issars xas afus nnes ḥima ad ttwarzment tiṭṭawin nnes.” 
Yarra-dd Ananiyas: “A Sidi, aqa sřiɣ aṭṭas n tmesřayin x weryaz-a, mecḥař d řɣar i igga deg imqeddasen nnec di Urcalim. 
Aqa da, ɛawed danita ɣares ttesriḥ zeg uɣezdis n imeqqranen n ikehhanen, maḥend ad iḥebbes marra inni ittřaɣan x Yisem nnec.” 
Maca SIDI inna as: “Ruḥ minzi wa aqa-t ɣari d řqecɛet ifarzen ḥima ad yarbu Isem inu ɣar řegnus u ɣar ijeǧiden u jar ayt n Israil, 
minzi ad as ssecneɣ mecḥař ittxeṣṣa as ad iweddeb di ṭṭweɛ n Yisem inu.” 
Iruḥ Ananiyas, yudef ɣar taddart, issars xas afus nnes, inna: “A uma Cawul, aqa Siditneɣ Yasuɛ, wenni d ac dd-iḍharen deg webrid i zi dd-tusid, issekk ayi-dd, ḥima ad tᵉttwařid ɛawed u ad tᵉttwaccured s Arruḥ Iqeddsen.” 
Řexdenni tewḍa-dd ca am teqcurt zi tiṭṭawin nnes, ttwarzment tiṭṭawin nnes. Ikkar uca ittwasseɣḍeṣ. 
Umi icca, imḥeḍ uca iqqim ca n wussan ak-d imeḥḍaren di Dimacq. 
Řexdenni ibda ittbarreḥ di temzida n Wudayen x Yasuɛ, belli Netta d Mmis n AREBBI. 
Marra inni tuɣa ittesřan, ttbehten, qqaren: “Ma war iǧi d wanita i tuɣa imarrten marra inni tuɣa ittřaɣan s Yisem-a di Urcalim, u ma war iǧi d wanita i dd-ittwassekken ɛad danita zi ssibbet d ict, maḥend ad ten icarf u ad ten igewwed ɣar imeqqranen n ikehhanen?” 
Cawul tuɣa yarenni di jjehd, issedhec Udayen inni izeddɣen di Dimacq am d asen isscen belli Yeccu wanita d Lmasiḥ. 
Umi ɛdun wussan, ggin Wudayen ijj n wenway s teḥraymect ḥima ad t nɣen. 
Maca taḥiřet nsen i zi tuɣa arezzun ad t nɣen, tᵉttwassargeb i Cawul. Maca nitni tuɣa ḥeṭṭan tiwwura n tendint s uziř d ǧiřet, maḥend ad awḍen ad t nɣen. 
Maca imeḥḍaren nnes ggin t deg ict n tsuǧet uca ssehwan t zi řḥiḍ s ǧiřet. 
Yuyur netta ɣar Urcalim, yarzu ad imun ak-d imeḥḍaren, maca nitni marra ggʷeden zzayes, war ttiqqen ca belli netta idweř d ameḥḍar. 
Maca Bar-Naba iksi t ɣares uca indeh i-t ɣar rrusul uca Cawul ixebbar i-ten mammec iẓra SIDI deg webrid u mammec kis issiweř u mammec tuɣa ittbarreḥ s teryast s Yisem n Yasuɛ di Dimacq. 
Tuɣa iqqim akidsen ittadef itteffeɣ zi Urcalim, 
uca ittbarreḥ s teryast s Yisem n Yasuɛ, ittqacaḥ ak-d Wudayen inni issnen iřes n Tyunanit, maca nitni arzun ad t nɣen. 
Umi ssnen tawmat man aya, nedhen t ɣar Qayṣariya di ǧiřet uca sekken t ssenni ɣar Tarsus. 
Tamesmunt di marra Yahudiyya d Ljalil d Samarya tuɣa dayes řehna, tᵉttwabna di l’iman, teggur di tiggʷudi n AREBBI uca truḥ di tyumi s ufewwej n Arruḥ Iqeddsen. 
Řami tuɣa Cimɛun iggur di tneddam, ihwa-dd ɣar imqeddasen inni izeddɣen di tendint n Lidda. 
Yufa din ijj n bnadem, qqaren as Aniyas, izzeř s tassut u teɛdu xas tmenya n iseggʷusa d aneɛḍab. 
Inna as Cimɛun: “A Aniyas, Yasuɛ Lmasiḥ ad cek issgenfa. Kkar, tessud i ixef nnec!” Řexdenni ikkar deɣya. 
Uca ẓrin t marra imezdaɣ n Lidda d Sarun, uca dewřen-dd ɣar AREBBI. 
Tuɣa di tendint n Yaffa ict n tmeḥḍart, qqaren as Tabita, maca s yiřes n Tyunanit qqaren as ‘Durka’, ixs ad yini ‘Ɣazala’. Ta tuɣa teccur s řexdayem tiṣebḥanin i tuɣa tᵉttegg u s ṣṣdaqi i tuɣa tessuffuɣ. 
Deg wussan nni tehřec uca temmut. Sirden tt uca ssarsen tt di tɣurfet. 
Maca imeḥḍaren sřin belli Cimɛun aqa-t di tendint n Lidda, tenni zzat n Yaffa. Xenni ssekken nitni tnayen n yeryazen ḥima ad zzayes ḥeccmen, ḥima war ittɛeṭṭař maḥend ad kidsen yuyur! 
Ikkar Cimɛun, yuyur akidsen. Řami dd-yiweḍ, nedhen t ɣar tɣurfet sennej. Beddent-i-dd ɣares marra tijjař, runt, sscanent as tcamirat d ijeǧaben i d asent tewca Tabita ařami tuɣa-tt ɛad teddar. 
Maca Cimɛun issuffeɣ i-tent marra ɣar barra, isjed, iẓẓuǧ uca inneqřeb-dd ɣar řxecbet inna: “Tabita, kkar!” Nettat tarzem tiṭṭawin nnes uca řami teẓra Cimɛun, teqqim. 
Isswiẓẓeḍ ɣares afus nnes, issnekkar i-tt-i-d, xenni iřaɣa-dd x imqeddasen d tijjař, isscen asen tt, belli aqa teddar. 
Iffeɣ-dd řexbar-a ɣar tendint marra uca aṭṭas umnen di Siditneɣ. 
Uca iqqim di Yaffa, war iǧi drus n wussan, ɣar ijj n weryaz nni tuɣa iɛeddeř iřmawen, qqaren as Cimɛun. 
