﻿Řexdayem n rrusul.
5.
Ijj n weryaz qqaren as Ananiyas, ak-d temɣart nnes, qqaren as Saffira, izzenz iyyar nnes. 
Netta iksi ijj n wezyen n tmenyat n ttaman n yeyyar, am tessen temɣart nnes man aya, uca issnufar i-t. Xas uca yiwi-dd ca n tmenyat n nnuqart zzayes, issars i-tt ɣar iḍaren n rrusul. 
Inna as Cimɛun: “A Ananiyas, mayemmi iccur cciṭan uř nnec ḥima ad tessxarqed x Arruḥ Iqeddsen u ḥima ad tnuffared ca n tmenyat deg iyyar? 
Ma war iǧi yiyyar nnec qbeř ittwammenz? U řami ittwammenz, tuɣa ṣṣulṭa x ttaman nnes ɛad deg ufus nnec! Min cek ideɛwen tᵉttegged man aya deg wuř nnec? Aqa cek war tessxarqed ca x iwdan maca x AREBBI.” 
Umi isřa Ananiyas awařen-a, iwḍa ɣar temmurt, immut, uca tedweř tiggʷudi temɣar x marra inni isřin aya. 
Kkaren ibřiɣen, cefnen t, arbun t ɣar barra, neḍřen t. 
Awarni řami ɛdunt ɛřaḥař třata n tsaɛɛetin, tudef-dd temɣart nnes, war tessin min imsaren. 
Inna as Cimɛun: “Ini ayi, ma aqa tezzenzem iyyar s wanect uya?” Tenna as: “Wah, s wanect uya!” 
Inna as Cimɛun: “Min kenniw ideɛwen tᵉttafqem jar awem maḥend ad tjarrbem Arruḥ n SIDI? Xzar, iḍaren n yinni ineḍřen aryaz nnem, aqa aten ɣar tewwart, ad cem ksin barra ɛawed.” 
Řexdenni tewḍa ɣar iḍaren nnes uca temmut. Udfen-dd ibřiɣen nni, ufin tt temmut, ksin tt, arbun tt ɣar barra uca neḍřen tt zzat i weryaz nnes, 
uca tedweř tiggʷudi temɣar ɣar marra tamesmunt u ɣar marra inni isřin man aya. 
Msarent waṭṭas n řeɛřamat d řeɛjayeb jar iwdan s ifassen n rrusul uca marra nitni tuɣa munen s wuř d ijjen deg useqqif ak-d ukulwar d ipilaren n Suliman. 
Maca zeg iwdan inneɣni war izɛim ḥed ad kisen igg azeǧif, maca řgens iweqqar ten aṭṭas. 
Mmarenyen-dd ktar ɛad ɣar yinni yumnen di SIDI, ibarruten n yeryazen d temɣarin, 
ařami tuɣa kessin imehřac barra ɣar zznaqi, ssrusan ten x tassut ḥima, xmi dd ɣa yas Cimɛun, balak ad tekk mɣir tiři nnes xasen. 
Usin-dd uřa d aṭṭas zi tneddam nneɣni i d as dd-innḍen i Urcalim, iwyen-dd imehřac nsen d yinni daysen řaryaḥ imengas, uca marra ggenfan. 
Arrays n ikehhanen d marra inni iǧan akides, inni iǧan zi tebridt n Iṣaduqiyyen, dewřen ccuren s řeḥsed. 
Nitni ssarsen ifassen x rrusul, ṭṭfen ten uca arrin ten di řeqyud di řeḥbes. 
Maca lmalak n SIDI yarzem tiwwura n řeḥbes s ǧiřet, issuffeɣ i-ten ɣar barra, inna asen: 
“Ruḥem, xenni tbeddem di Zzawect Tameqqrant, siwřem i řgens s marra awařen-a n Tudart!” 
Ffɣen-dd nitni ɣar wenqar n tfuct, udfen ɣar Zzawect Tameqqrant, bdan sseřmaden. Maca ikkar-dd arrays n ikehhanen d yinni akides iǧan, uca řaɣan x yinni ibedden akidsen u x imɣaren n ayt n Israil, uca ssekken imsexxaren nsen ɣar řeḥbes ḥima ad ten dd-awyen. 
Umi dd-ffɣen inni zzaysen dd-ittwassekken dinni, war ten ufin ca di řeḥbes, uca ɛeqben, nnan: 
“Aqa nufa řeḥbes ibelleɛ mliḥ u iɛessasen bedden barra ɣar tewwura, maca umi narzem tawwart, war din nufi ḥed daxeř.” 
Řami sřin imeqqranen n ikehhanen d imeqqranen n Zzawect Tameqqrant awařen-a, tbehten aṭṭas, iweddar asen min ɣa ggen. 
Uca yusa-dd ijj n weryaz ixebbar i-ten, iqqar: “Xzar, iryazen nni teggim di řeḥbes, aqa bedden di Zzawect Tameqqrant, sseřmaden iwdan!” 
Řexdenni ruḥen din řquyad ak-d iɛessasen, iwyen ten-dd, war t ggin s uɣiř minzi tuɣa ggʷeden aqa řgens ad ten iḥejjar. 
Umi ten dd-iwyen, ssbedden ten zzat i marra Jmaɛet Tameqqrant. Isseqsa ten arrays n ikehhanen, iqqar: 
“Ma war kenniw numur s jjehd maḥend war tessɣaram uřa d ijjen s Yisem-a? U xzar, aqa kenniw teccurem Urcalim s tɣuri nwem, kenniw texsem ad xaneɣ tarrem Idammen n Bnadem-a!” 
Cimɛun d rrusul arrin-dd, nnan: “Ittxeṣṣa aneɣ ad nᵉttaɛ AREBBI ktar zeg iwdan. 
AREBBI n řejdud nneɣ issnekkar-dd Yasuɛ wenni tenɣim kenniw, tuyřem t x tefřawt. 
AREBBI igga i-t d Azeǧif d wenni itticen Tudart, uca issgeɛɛed i-t ɣar ufus nnes ufusi maḥend ad iwc ttubet d weɣfar n ddnub i Israil. 
Neccin d řechud x man aya uca uřa d Arruḥ Iqeddsen, i yewca AREBBI i yinni dayes yumnen.” 
Řami sřin aya, hajen aṭṭas uca ttemcawaren ḥima ad ten nɣen. 
Maca ikkar ijjen zeg Ifarisiyyen, qqaren as Gamaliyal. Netta d amseřmad n Ccariɛa u marra řgens ittweqqar i-t. Yumur netta ḥima ad nedhen rrusul ɣar barra i cwayt n řweqt. 
Inna asen: “A iryazen, ayt n Israil, ḥḍam ixef nwem, xzarem mliḥ aqa marra min ɣa teggem s iwdan-a ad yiři s řḥeqq. 
Minzi qbeř řweqt-a tuɣa ikkar Tuddas, inna aqa netta d ca, řeṣqen dayes ɛřaḥař ca n arebɛa-mya n yeryazen. Aqa nɣin t u marra inni tuɣa t iḍeffaren, dewřen ttwazuzzaren, ikemmeř array nsen. 
Awarni man aya ikkar Yahuda Ajalili deg wussan n uzemmem i uxeǧeṣ n ḍḍariba i kuř uzeǧif i Zzawect Tameqqrant, uca isseɣwa aṭṭas n iwdan di řgens awarni as. Uca netta immut uca marra inni i-t-i-dd-iḍfaren, dewřen ttwazeǧɛen. 
Řexxu ad awem iniɣ: “Sbeɛɛdem ixef nwem x iwdan-a, jjem ten ad raḥen, minzi mařa axarreṣ-a niɣ řxedmet-a zeg iwdan i yeǧa, xenni ad iqḍa. 
Maca mařa tuɣa-t zi AREBBI, war tzemmarem ad t tbeṭṭřem, ḥima ad taɣ kenniw war tᵉttwifim d inni ittmenɣan ak-d AREBBI.” 
Ggin ad ttwassqenɛen zzayes uca awarni řami d řaɣan x rrusul, jjin ad ten hettken s urekkuḍ, ɛeřmen asen ḥima war ssiwiřen ɛad s Yisem n Yasuɛ, xenni arxun asen. 
Nitni ruḥen zzaysen, farḥen řami ufin belli nitni ttwaḥesben ad sdaheǧen abehdeř di ṭṭweɛ n Yisem nnes. 
War ssbedden ca zeg useřmad di mkuř ass di Zzawect Tameqqrant u di tudrin u zeg ubarreḥ s Siditneɣ Yasuɛ Lmasiḥ. 
