﻿Yuḥanna.
19.
Xenni ijja Pilaṭus ad hettken Yasuɛ s urekkuḍ. 
Awarni řami muden iɛeskariyyen ijj n ttaj s isennanen, ssarsen as tt x uzeǧif nnes uca yarḍen as ijj n useřham d arjuwani, 
nnan: “Sřam xak, a Ajeǧid n Wudayen!”, uca wtin t x igemmizen nnes. 
Iffeɣ-dd ɛawed Pilaṭus, inna asen: “Ad awem t-i-dd-ssuffɣeɣ, ḥima ad tessnem belli necc war dayes ufiɣ ssibbet i ucetci, uřa d ict.” 
Xenni iffeɣ-dd Yasuɛ s ttaj n isennanen d ujeǧab ajurwani. Inna asen Pilaṭus: “Xzarem, Bnadem!” 
Řami t ẓrin imeqqranen n ikehhanen d iɛessasen, sɣuyen, nnan: “Ṣellb i-t, ṣellb i-t” Inna asen Pilaṭus: “Awyem t-i-dd kenniw, ṣellbem t, minzi necc war dayes ufiɣ uřa d ijj n řɛib.” 
Arrin-dd xas Wudayen: “Ɣarneɣ Ccariɛa, u ɛlaḥsab Ccariɛa nneɣ ittxeṣṣa ad immet, minzi Netta ittarra Ixef nnes d Mmis n AREBBI.” 
Řami isřa Pilaṭus awař-a, yarni di tiggʷudi. 
Yudef ɛawed ɣar taddart n ccreɛ, inna i Yasuɛ: “Manis Cek?” Maca Yasuɛ war xas dd-yarri ca. 
Inna as Pilaṭus: “Ma war texsed ad kidi tessiwiřed? Ma war tessined ca aqa ɣari ṣṣulṭa ḥima ad ac ssarrḥeɣ u ɣari ṣṣulṭa ḥima ad Cek ṣellbeɣ?” 
Yarra-dd xas Yasuɛ: “War ɣarek tᵉttiři bu ṣṣulṭa xafi, mařa war d ac dd-temmewc zi sennej. S uya, wenni d ayi isellmen i cek, aqa xas ddenb imɣar zeg wenni i iǧan xak.” 
Zi řexdenni tuɣa Pilaṭus yarezzu ad as isarreḥ, maca Udayen sɣuyen, nnan: “Mařa tsarrḥed i Weryaz-a, war teǧid ca d ameddukkeř n qayṣar. Kuř ijjen wenni ittarran ixef nnes d ajeǧid, ittɛekkas qayṣar.” 
Řami isřa Pilaṭus i wawař-a, issuffeɣ Yasuɛ, iqqim x řkursi n ccreɛ deg wemcan umi qqaren ‘Azzay n luṣa’, maca qqaren as s Tɛibranit ‘Gpipta’. 
Tuɣa d ass n Usewjed i Tɣarṣt n Useɛdu. Tuɣa ɛřaḥař d tsaɛɛet wiss setta ɣar tuffut, řami inna i Wudayen: “Xzarem, Ajeǧid nwem!” 
Maca nitni sɣuyen: “Ksi t, ksi t, ṣellb i-t!” Inna asen Pilaṭus: “Ma ad ṣellbeɣ xenni Ajeǧid nwem?” Arrin-dd xas imeqqranen n ikehhanen: “War ɣarneɣ bu ujeǧid mɣir qayṣar!” 
Xenni isellem asen t ḥima ad t ṣellben. Uca nitni ksin Yasuɛ, iwyen t ssenni. 
Yarbu ṣṣalib nnes ɣar wemcan umi qqaren ‘Taceqquft’, maca s Tɛibranit qqaren as ‘Juljuta’.    
Ṣellben t dinni, uca ṣellben akides tnayen nneɣni, ijjen ɣar ijj n uɣezdis u wenneɣni ɣar uɣezdis nneɣni, u Yasuɛ di řwesṭ. 
Yura Pilaṭus ɛawed deg ict teřwiḥt, issars i-tt x ṣṣalib. Ammu i ittwari dayes: ‘Wanita d Yasuɛ Nnaṣiri, Ajeǧid n Wudayen’. 
Tira-ya ɣrin tent aṭṭas n Wudayen, minzi amcan mani tuɣa ṣellben Yasuɛ yudes-dd i tendint. Tira-ya ttwarint s Tɛibranit d Tlatinit d Tyunanit. 
Nnan imeqqranen n ikehhanen i Pilaṭus: “War ttari ca: ‘Ajeǧid n Wudayen’, maca aqa inna: ‘Necc d Ajeǧid n Wudayen!’” 
Yarra-dd Pilaṭus: “Min uriɣ, aqa uriɣ t.” 
Řami ṣellben iɛeskariyyen Yasuɛ, ksin arruḍ nnes, bḍan t x arebɛa n tseqqar, i kuř aɛeskari ict n tesɣart. Maca tcamir nnes tuɣa břa taxeyyaḍt, tᵉttwaxeyyeḍ qaɛ zi sennej. 
Nnan i wayawya: “War t nettcarrig ca, ad xas negg akeccuḍ, ad nẓar wi t ɣa yawyen!” Ammu i ittwakemmeř awař n Tira Iqeddsen i iqqaren: “Bḍan arruḍ inu jar asen u x tcamir inu ggin akeccuḍ.” Man aya i iggin iɛeskariyyen. 
Ɣar ṣṣalib n Yasuɛ tbedd yemmas, d učmas n yemmas, d Maryam tamɣart n Kliyupas, d Maryam n Majdala. 
Řami iẓra Yasuɛ yemmas d umeḥḍar wenni tuɣa ittexs, ibedd din, inna i yemmas: “A tamɣart, xzar, mmim!” 
Řexdenni inna i umeḥḍar nni: “Aqa-c yemmac!” Zi tsaɛɛet nni iksi tt umeḥḍar ɣar taddart nnes. 
Awarni man aya issen Yasuɛ aqa kuřci ittwakemmeř, řexdenni inna, ḥima ad yiři min yuran di Tira Iqeddsen: “Necc ffudeɣ!” 
Ittwamars din ijj n uɣarraf iccur s řxeǧ. Ssɣeḍṣen ict n spunxa n hisub s řxeǧ uca ggin tt x ijj n uɣanim n tɛelǧet, ssiwḍen as tt ɣar uqemmum nnes. 
Řami iqqas Yasuɛ řxeǧ, inna: “Aqa ittwakemmeř!” Uca issaḍar azeǧif nnes, isellem Arruḥ nnes. 
Umi tuɣa ass n Usewjed n Tɣarṣt n Useɛdu, nnan Wudayen: “War iɛeddeř ad qqiment arrimat nsen x ṣṣalib di ssebt, minzi ssebt yudes-dd!”, minzi ass nni n ssebt tuɣa d ass ameqqran. S uya ttaren Wudayen zi Pilaṭus, ḥima ad arẓen iḍaren n yinni ittwaṣellben, ad ten ssiggʷejen ssenni. 
Xenni usin-dd iɛeskariyyen, arẓin iḍaren n umezwaru u n wenneɣni i tuɣa ittwaṣelleb akides. 
Maca řami dd-usin ɣar Yasuɛ, war arẓin ca iḍaren nnes umi ẓrin aqa immut. 
Maca ijjen zeg iɛeskariyyen issnuqqeb i-t s ict n lansa deg uɣezdis nnes uca ffɣen-dd idammen d waman deɣya. 
Wenni iẓrin man aya, tuɣa iched u cchadet nnes d tidett uca netta issen, aqa inna tidett, ḥima ad tamnem uřa d kenniw. 
Timesřayin-a msarent, ḥima ad ttwakemmřent Tira Iqeddsen i iqqaren: “War zzayes ittareẓẓi yiɣes.” 
Uca ijj n wawař nneɣni zi Tira Iqeddsen iqqar: “Nitni ad ẓaren Wenni t issnuqqben.” 
Awarni man aya imsar aqa Yusuf zi Ramta, wenni tuɣa d ijj n umeḥḍar n Yasuɛ maca s tnuffra zi tiggʷudi zeg Wudayen, ittar as i Pilaṭus ttesriḥ ḥima ad iksi arrimet n Yasuɛ, uca Pilaṭus isarreḥ as. Xenni yusa-dd, iksi arrimet n Yasuɛ. 
Yusa-dd ɛawed Nikudimus wenni tuɣa dd-yusin qbeř ɣar Yasuɛ s ǧiřet, yiwi-dd akides axeǧeḍ n řefwaḥet n mirru d wecfir ɛřaḥař mya litru.    
Ksin nitni arrimet n Yasuɛ, řeḥḥfen tt di řecfun n řeqṭen azdad ak-d řeɛṭur, am mammec nnumen tteggen tt Wudayen i wenḍeř. 
Tuɣa din ijj n weḥwic deg wemcan mani ṣellben Yasuɛ, uca deg weḥwic ijj n wenḍeř n jdid, ɛemmarṣ war dayes ssarsen uřa d ijj. 
Ssarsen Yasuɛ din, minzi tuɣa yiweḍ-dd ssebt u minzi anḍeř nni tuɣa yudes. 
