﻿Yuḥanna.
10.
“S tidett, s tidett, Necc ad awem iniɣ: Wenni war ittidfen zi tewwart ɣar řkuri n wuǧi, maca ad igeɛɛed manis nneɣni, aqa-t d aceffar d axewwan. 
Maca wenni i ɣa yadfen zi tewwart, netta d ameksaw n tḥimart. 
Aɛessas n tewwart ad as yarzem i wanita uca ad tseř tḥimart i tmijja nnes. Netta ad iřaɣa i wuǧi nnes s ismawen nsen uca ad ten issuffeɣ ɣar barra. 
Awarni řami issuffeɣ marra taḥimart nnes, ad yuyur zzates, uca ad t-i-dd-ḍfaren wuǧi nnes, minzi ssnen tmijja nnes. 
Maca abarrani war t tḍeffar tḥimart ɛemmarṣ, maca ad zzayes tarweř, minzi war tessin tmijja n ubarrani.” 
Inna asen Yasuɛ amettiř-a, maca nitni war fhimen ca i tmesřayin min xef tuɣa akidsen issawař. 
Yasuɛ inna asen ɛawed: “S tidett, s tidett, Necc ad awem iniɣ: Necc d Tawwart n tḥimart. 
Marra inni dd-yusin qbeř inu aqa aten d iceffaren d ixewwanen. Maca taḥimart war d asen tesři ca. 
NECC d Tawwart. Wenni zzayi i ɣa yadfen, ad iddar. Netta ad yadef, ad iffeɣ uca ad yaf mani ɣa yarwes. 
Aceffar war dd-ittis mɣir ḥima ad yacar, ad ineɣ u ad isshellek. Necc maca usiɣ-dd ḥima ad ɣarsen tiři Tudart d ufeyyeḍ. 
NECC d Ameksaw Aṣebḥan. Ameksaw Aṣebḥan issrusa tudart nnes i tḥimart nnes. 
Maca amcaray, wenni war iǧi ca d ameksaw, war iǧi ca d bab n wuǧi, x minni i ɣa iẓar uccen yusa-dd, ad yejj taḥimart uca ad yarweř. Xenni ad dd-yas wuccen, ad ixḍef taḥimart uca ad tt izzuzar. 
Amcaray yarweř, minzi netta d amcaray, war t icqi taḥimart. 
NECC d Ameksaw Aṣebḥan. Ssneɣ uǧi inu uca uǧi inu ssnen ayi, 
am mammec i d ayi issen Baba, ammu i ssneɣ Necc Baba. Necc ad wceɣ tudart inu i tḥimart. 
Ɣari ɛad uǧi nneɣni, inni war iǧin ca zi řkuři-ya. Icuwwar ayi ad ten dd-ssmuneɣ ɛawed uca ad sřen i tmijja inu, uca ad dewřen marra d ict n tḥimart sadu ufus n ijj n Umeksaw. 
S man aya ittexs ayi Baba, minzi Necc wciɣ tudart inu ḥima ad tt-i-dd-ksiɣ ɛawed. 
Uřa d ijj war zzayi tt iksi, maca Necc wciɣ tt s řxaḍar inu. Ɣari ṣṣulṭa ḥima ad tt wceɣ u ɣari ṣṣulṭa ḥima ad tt-i-dd-ksiɣ ɛawed. Tawṣeyyet-a ṭṭfeɣ tt zi Baba.” 
Xenni imsar ɛawed ubeṭṭu jar Wudayen s ssibbet n wawařen-a. 
Aṭṭas zzaysen nnan: “Aqa dayes ijj n cciṭan, Netta d aṭemmes ameqqran. Mayemmi ɣares tᵉttesřam?” 
Inneɣni nnan: “Awařen-a war ǧin ca n ijj n umaryaḥ. Ma izemmar ijj n cciṭan ad yarzem tiṭṭawin n idarɣařen?” 
Yiweḍ-dd Řɛid n Udeccen n Zzawect Tameqqrant di Urcalim. Tuɣa d řmecta. 
Yasuɛ iggur di Zzawect Tameqqrant deg useqqif ak-d ukulwar d ipilaren n Suliman. 
Nnḍen as-dd Wudayen, nnan as: “Ař meřmi d aneɣ i ɣa tejjed nuyeř ɛad? Mařa Cek d Lmasiḥ, ini aneɣ t s bṭayṭay.” 
Yarra-dd Yasuɛ, inna asen: “Nniɣ awem t uca kenniw war tuminem. Řexdayem i ggiɣ s Yisem n Baba, cehhdent xafi. 
Maca kenniw war tuminem, minzi kenniw war teǧim ca d uǧi inu, am mammec tuɣa d awem nniɣ. 
Uǧi inu isřa ɣar tmijja inu u Necc ssneɣ asen uca nitni ad ayi-dd ḍfaren. 
Ad asen wceɣ Tudart ittduman uca war ttwahellken ɛemmarṣ qaɛ uca uřa d ijj war ten ixeṭṭef zeg ufus inu. 
Baba wenni d ayi ten iwcin, aqa-t d ameqqran x kuřci. Uřa d ijj war izemmar ad ten ixḍef zeg ufus n Baba. 
Necc d Baba d Ijjen.” 
Xenni ksin Wudayen ɛawed iẓra ḥima ad t arejmen. 
Yasuɛ inna asen: “Aqa ssecneɣ awem aṭṭas n řexdayem tiṣebḥanin zi Baba. I man řxedmet zzaysent i texsem ad ayi tarejmem?” 
Nnan as Wudayen: “War Cek narejjem x ict n řxedmet taṣebḥant, maca umi tekfared u tarrid Ixef nnec d AREBBI, waxxa Cek d bnadem i teǧid.” 
Inna asen Yasuɛ: “Ma war turi di Ccariɛa nwem: ‘Necc nniɣ, aqa kenniw d irebbiten’? 
Mařa Netta isemma ten ‘irebbiten’, yinni umi dd-yusa wawař n AREBBI, uca war izemmar ad ttwarẓent Tira Iqeddsen, 
mammec teqqarem kenniw x wenni ittwaqeddsen zi Baba u x wenni issekk i-t-i-dd ɣar ddunect: ‘Aqa Cek tekfared!’, minzi Necc nniɣ: ‘Aqa Necc d Mmis n AREBBI’? 
Mařa Necc war xeddmeɣ ca řexdayem n Baba, xenni war dayi ttimnem ca. 
Maca mařa xedmeɣ tent, amnem xenni di řexdayem, waxxa kenniw ɛad war dayi tuminem, ḥima ad tessnem aqa Baba dayi u Necc aqa ayi di Baba.” 
Arezzun ad t ṭṭfen ɛawed, maca ixtutteř asen jar ifassen nsen. 
Iruḥ ɣar ujemmaḍ n iɣzar n L’Urdun, ɣar wemcan mani tuɣa issɣeṭṭaṣ Yuḥanna deg umezwaru, uca iqqim dinni. 
Usin-dd ɣares waṭṭas n iwdan, nnan: “Yuḥanna war iggi uřa d ict n řeɛřamet, maca marra min inna x Weryaz-a d tidett!” 
Uca umnen dayes aṭṭas diha. 
