﻿Yuḥanna.
9.
Umi xasen dd-ikka, iẓra ijj n weryaz tuɣa d adarɣař zeg wami dd-ixřeq. 
Imeḥḍaren nnes sseqsan t, nnan: “A Amseřmad nneɣ, wi ixḍan, ma d wa niɣ lwalidin nnes, ařami dd-ixřeq d adarɣař?” 
Yasuɛ inna asen: “Uřa d netta war ixḍi uřa d lwalidin nnes, maca man aya aqa imsar, ḥima ad dayes ḍharent řexdayem n AREBBI. 
Icuwwar ad xedmeɣ řexdayem n Wenni d ayi dd-issekken maḥend ɛad d aziř. Ad dd-tas taǧest mani war izemmar uřa d ijj ad ixdem. 
Mintra Necc aqa ayi di ddunect, Necc d Tafawt n ddunect.” 
Awarni řami inna ammu, issusef di temmurt, igga abeǧaɛ zeg ikuffan nni uca iḥennec zzayes tiṭṭawin n udarɣař s ubeǧaɛ. 
Xas uca inna as: “Ruḥ, tessirded di tuyeřmamt n useɣḍeṣ n Siluwam!” Iruḥ, issird, idweř ittwařa. 
Jjiran d yinni tuɣa t iẓrin qbeř ittettar, nnan: “Ma war iǧi d wa d wenni tuɣa ittɣiman ittettar?” 
Ca zzaysen nnan: “Aqa d netta!” Nnan inneɣni: “Lla, maca ittawi-dd dayes!” Maca netta s yixef nnes inna: “Aqa d necc!” 
Nnan as: “Mammec temsar ttwarezment tiṭṭawin nnec?” 
Yarra-dd, inna asen: “Bnadem umi qqaren Yasuɛ, igga abeǧaɛ, iḥennec tiṭṭawin inu uca inna ayi: ‘Ruḥ ɣar tuyeřmamt n Siluwam, tessirded!’ Xenni ruḥeɣ, ssirdeɣ uca dewřeɣ ttwařiɣ.” 
Nnan as: “Mani iǧa Netta?” Inna: “War ssineɣ.” 
Awyen-dd wenni tuɣa iǧa qbeř d adarɣař, ɣar Ifarisiyyen. 
Tuɣa d ssebt řami igga Yasuɛ abeǧaɛ u yarzem as tiṭṭawin nnes. 
Sseqsan t Ifarisiyyen ɛawed: “Mammec tdewřed tᵉttwařid?” Yarra-dd xasen: “Igga abeǧaɛ x tiṭṭawin inu, xenni ssirdeɣ uca dewřeɣ ttwařiɣ.” 
Ca zeg Ifarisiyyen nnan: “Bnadem-a war iǧi ca zi AREBBI, minzi Netta war ittweqqar ca ssebt.” Ca nneɣni nnan: “Mammec izemmar ijj n bnadem d aɛeffan ad igg řeɛřamat am tina?” Uca imsar ubeṭṭu jar asen. 
Nnan ɛawed i udarɣař: “Min xas teqqared cek, ařami yarzem tiṭṭawin nnec?” Netta inna asen: “Aqa-t d anabi!” 
Maca Udayen war zzayes uminen ca belli netta tuɣa d adarɣař uca idweř ittwařa, ařami d řaɣan x lwalidin n wenni idewřen ittwařa. 
Sseqsan ten: “Ma wa d mmitwem min xef teqqarem aqa ittwaxřeq-dd d adarɣař? I mammec igga ittwařa řexxu?” 
Arrin-dd lwalidin nnes, nnan: “Neccin nessen belli wa d mmitneɣ, aqa ittwaxřeq-dd d adarɣař, 
maca mammec igga ittwařa řexxu, war nessin, u wi d as yarezmen tiṭṭawin nnes war t nessin ca ɛawed. Seqsam t simant nnes, netta aqa d abřiɣ, ad issiweř x yixef nnes.” 
Nnan lwalidin nnes ammu minzi ggʷeden zeg Wudayen, minzi Udayen mɛahaden belli wenni i ɣa icehden aqa Netta d Lmasiḥ, ad t mmenḍaren zi temzida. 
S uyenni nnan lwalidin nnes: “Netta aqa-t d abřiɣ, seqsam t simant nnes.” 
Xas uca řaɣan-dd wiss martayen x weryaz wenni tuɣa d adarɣař, nnan as: “Sɛuǧa AREBBI! Aqa nessen belli Aryaz-a d ijj n umednub.” 
Netta yarra-dd, inna asen: “Ma Netta d amednub war ssineɣ. Necc ssneɣ ict n tmesřact, aqa tuɣa ayi d adarɣař, řexxu ttwařiɣ!” 
Nnan as ɛawed: “Min zzayek igga? Mammec d ac igga yarzem tiṭṭawin nnec?” 
Inna asen: “Aqa nniɣ awem t, maca kenniw war tesřim. Mayemmi texsem ad t tesřem i twařa nneɣni? Ma texsem uřa d kenniw ad tdewřem d imeḥḍaren nnes?” 
Kkwaren t, nnan: “Cek d ameḥḍar nnes! Maca neccin aqa d imeḥḍaren n Musa. 
Neccin nessen aqa AREBBI issiweř ak-d Musa, maca Aryaz-a wanita war nessin ca manis Netta.” 
Yarra-dd weryaz, inna asen: “Aqa di man aya řeɛjeb, kenniw war tessinem ca manis Netta, waxxa Netta yarzem ayi tiṭṭawin inu. 
Neccin nessen, aqa AREBBI war ittesři ca ɣar imednab, maca mařa ca n ijjen ittweqqar i-t uca ittegg min ixs Netta, aqa Netta ad ɣares iseř. 
Ɛemmarṣ war ittwasři qaɛ, aqa ca n ijjen yarzem tiṭṭawin n ijjen ixřeq-dd d adarɣař. 
Meɛlik Wa war iǧi ca zi AREBBI, war izemmar ad igg man aya!” 
Arrin-dd, nnan as: “Cek txeřqed-dd tkemmřed di ddnub, ma xenni texsed ad aneɣ tesseřmaded?” Xenni nḍaren t ɣar barra. 
Isřa Yasuɛ belli nḍaren t ɣar barra, uca umi t yufa, inna as: “Ma tumned di Mmis n AREBBI?” 
Yarra-dd, inna: “Min iɛna Netta, a Sidi, ḥima ad dayes amneɣ?” 
Inna as Yasuɛ: “Aqa cek teẓrid t uřa d wenni akik issawařen aqa-t d Netta.” 
Netta inna: “Umneɣ, a Sidi!”. Uca iɛebd as. 
Yasuɛ inna: “I řḥukm i dd-usiɣ ɣar ddunect-a, ḥima ad ẓaren inni war ittwiřin, u ḥima inni ittwařan ad darɣřen.” 
Sřin ca n Ifarisiyyen i kides iǧan man aya, nnan as: “Ma aqa d neccin ɛawed d idarɣařen?” 
Inna asen Yasuɛ: “Maɛlik teǧam d idarɣařen war ɣarwem ittiři bu ddnub, maca řexxu teqqarem: ‘Aqa nettwařa!’ S uyenni ad iqqim ddnub nwem ibedd.” 
