﻿Yuḥanna.
8.
... 
Di ṣṣbeḥ yusa-dd ɛawed ɣar Zzawect Tameqqrant, usin-dd ɣares iwdan marra. Xenni am iqqim, ibda isseřmad i-ten. 
Imseřmaden n idlisen d Ifarisiyyen iwyen as-dd ict n temɣart, tᵉttwaṭṭef tᵉttegg zzina. Ssbedden tt di řwesṭ, 
nnan as: “A Amseɣɣar, tamɣart-a tᵉttwaṭṭef s bṭayṭay, tᵉttegg zzina. 
Iweṣṣa Musa di Ccariɛa ad narjem timɣarin am tanita. Min ɣa tinid Cek?” 
Nnan as aya ḥima ad t jarrben, ḥima ad ɣarsen tiři minzi xas i ɣa cetcan. Maca Yasuɛ yuḍar swadday, yura s uḍaḍ nnes di temmurt. 
Řami qqimen ammu t ttesseqsan, ibedd, inna asen: “Wi zzaywem iǧan břa ddnub, ad xas inḍar aẓru amezwaru.” 
Xenni yuḍar ɛawed swadday uca yura di temmurt. 
Řami sřin man aya, ffɣen ijjen awarni wenneɣni, imeqqranen d amezwaru. Tamɣart nni ibedden di řwesṭ jjin tt weḥḥdes. 
Řexdenni Yasuɛ ikkar, inna i temɣart: “Mani ǧan nitni? Ma war cem iḥakem uřa d ijjen?” 
Nettat tenna: “Uřa d ijj, a SIDI!” Yasuɛ inna as: “Uřa d Necc war cem ttḥakameɣ ca. Ruḥ, war ttɛawad ad tegged ddnub zi ssa tsawent!” 
Issiweř Yasuɛ ɛawed akidsen, inna: “NECC d Tafawt n ddunect. Wenni d ayi ɣa iḍfaren, war iggur ɛemmarṣ di taǧest, maca ad yaf Tfawt n Tudart.” 
Nnan as Ifarisiyyen: “Cek tcehhded x Yixef nnec, cchadet nnec war teǧi ca d tidett.” 
Yasuɛ yarra-dd, inna asen: “Ɛad mařa Necc cehhdeɣ x Yixef inu, cchadet inu aqa d tidett, minzi Necc ssneɣ manis dd-usiɣ u mani ɣa raḥeɣ, maca kenniw war tessinem ca manis dd-usiɣ uřa mani ɣa raḥeɣ. 
Kenniw tᵉttḥakamem ɛlaḥsab ddat, Necc war ttḥakameɣ uřa x ijjen. 
U Necc, mařa ḥakmeɣ, ad yiři řeḥkam inu d tidett, minzi Necc war ǧiɣ bu weḥḥdi, maca Necc d Baba wenni d ayi dd-issekken. 
Tura ɛawed di Ccariɛa nwem, belli cchadet n tnayen n iwdan d tidett. 
NECC d wenni icehhden x Yixef inu, uca uřa d Baba wenni d ayi-dd issekken, iched xafi.” 
Nitni nnan as: “Mani iǧa Babac?” Yasuɛ yarra-dd, inna asen: “Kenniw war d ayi tessinem ca u war tessinem Baba. Meɛlik kenniw d ayi tessnem, ad tiři tessnem uřa d Baba.” 
Inna awařen-a di mani tuɣa řexzen n ṣṣedqet, am tuɣa isseřmad di Zzawect Tameqqrant. War t iṭṭif uřa d ijj, minzi tasaɛɛet nnes tuɣa ɛad war dd-tiwiḍ. 
Yasuɛ inna asen ɛawed: “Necc ad raḥeɣ, kenniw ad xafi tarzum, ad temmtem di ddnub nwem. Mani ɣa raḥeɣ Necc, war tzemmarem kenniw ad dd-tasem.” 
Udayen nnan: “Ma ad ineɣ Ixef nnes řexxu, minzi Netta inna: ‘Mani ɣa raḥeɣ Necc, war tzemmarem kenniw ad dd-tasem’?” 
Netta inna asen: “Kenniw zi swadday, Necc zi sennej, kenniw zi ddunect-a, maca Necc war ǧiɣ ca zi ddunect-a. 
Necc nniɣ awem, ad temmtem di ddnub nwem, maɣar mařa war tuminem ca aqa d Necc, ad temmtem di ddnub nwem.” 
Udayen nnan: “Min teɛnid Cek?” Yasuɛ inna asen: “Waxxa Necc bdiɣ ad kidwem ssiwřeɣ - 
uca Necc ɣari aṭṭas n tmesřayin i xef zemmareɣ ad xawem ssiwřeɣ uca ad xawem ḥekmeɣ - ittxeṣṣa ɛad ad tessnem, aqa Wenni d ayi dd-issekken aqa-t d tidett, uca min zzayes sřiɣ, ad t iniɣ i ddunect.” 
Nitni war fhimen ca, belli tuɣa issawař akidsen x Babas. 
Yasuɛ inna asen ɛawed: “Xmi ɣa tessgeɛɛdem Mmis n bnadem, ad tfehmem belli aqa d Necc, u belli war tteggeɣ uřa d ict n řḥajjet zeg Ixef inu, maca ssawařeɣ am mammec d ayi isseřmed Baba. 
Wenni d ayi dd-issekken aqa-t akidi. Baba war d ayi ijji ca weḥḥdi, minzi tteggeɣ řebda min t yarḍan.” 
Umi tuɣa issawař x tmesřayin-a, umnen dayes aṭṭas. 
Xenni inna Yasuɛ i Wudayen nni dayes yumnen: “Mařa teqqimem tᵉṭṭfem deg wawař inu, ad tiřim s tidett d imeḥḍaren inu, 
uca ad tessnem tidett uca tidett ad kenniw tḥarr.” 
Nnan as: “Neccin d zzariɛet n Ibrahim, ɛemmarṣ war neɛbid ḥed s tesmuɣi. Mammec tzemmared ad tinid: ‘Kenniw ad tᵉttwaḥarrem’?” 
Yasuɛ yarra-dd xasen: “S tidett, s tidett, Necc ad awem iniɣ, marra wenni itteggen ddnub netta d amsexxar n ddnub. 
Amsexxar war ittɣimi ca di taddart řebda, maca Mmis ad din iqqim i řebda. 
Xmi kenniw i ɣa iḥarr Mmis, ad tiřim s tidett d iḥurriyyen. 
Necc ssneɣ, aqa kenniw d tarwa n Ibrahim, maca kenniw tarezzum ad ayi tenɣem, minzi awař inu war tzemmarem ad t tfehmem. 
Necc ssawařeɣ s min ẓriɣ zi Baba. Uřa d kenniw tᵉtteggem zi min teẓrim zi babatwem.” 
Arrin-dd, nnan as: “Babatneɣ d Ibrahim.” Inna asen Yasuɛ: “Maɛlik kenniw teǧim d tarwa n Ibrahim, ad yiři aqa tᵉtteggem řexdayem n Ibrahim. 
Maca řexxu tarezzum ad ayi tenɣem, Necc d ijj n Bnadem i tuɣa akidwem issawařen s tidett i sřiɣ zi AREBBI. Man aya war t iggi ca Ibrahim. 
Kenniw tᵉtteggem řexdayem n babatwem.” Nitni nnan as: “Neccin war dd-nexřiq ca zi farq-ccɣeř, aqa ɣarneɣ Ijjen wenni d Babatneɣ, aqa-t d AREBBI.” 
Inna asen Yasuɛ: “Maɛlik AREBBI d Babatwem, iři aqa texsem ayi, minzi Necc ffɣeɣ-dd zi AREBBI. Necc war dd-usiɣ ca zeg Ixef inu, maca Netta issekk ayi-dd. 
Mayemmi war tefhimem i wawařen inu? Minzi kenniw war tzemmarem ad tesřem i wawařen inu! 
Aqa kenniw teffɣem zi babatwem, ibřis, uca texsem ad teggem imeẓran n babatwem. Netta tuɣa ineqq iwdan zeg umezwaru u war ibedd di tidett, minzi war dayes bu tidett. Meřmi ma issawař s uxarriq, issawař s min dayes, minzi netta d bu-ixarriqen uřa d babas n uxarriq. 
Maca umi Necc qqareɣ awem tidett, kenniw war dayi tᵉttimnem ca. 
Wi zzaywem ad ayi isseqneɛ x ddnub? Umi qqareɣ tidett, mayemmi war dayi tᵉttimnem ca? 
Wenni iǧan zi AREBBI, ittesřa i wawařen n AREBBI. Minzi kenniw war teǧim ca zi AREBBI, s uyenni kenniw war tᵉttesřim ca.” 
Udayen arrin-dd, nnan as: “Ma war iǧi nican umi nenna, aqa Cek zi Samarya u dayek ijj n cciṭan?” 
Yasuɛ yarra-dd, inna: “Necc war dayi uřa d ijj n cciṭan, maca Necc ttweqqareɣ Baba, uca kenniw tesseḥqaram ayi. 
Necc war arezzuɣ ca aɛuǧi inu. Aqa din Ijjen i xas yarezzun d wenni i ɣa iḥekmen. 
S tidett, s tidett, Necc ad awem iniɣ: Mařa ca n yijjen iṭṭef deg wawař inu, ɛemmarṣ war ittwiři řmewt i řebda.” 
Nnan as Wudayen: “Řexxu nessen belli dayek ijj n cciṭan. Aqa Ibrahim d inabiyyen mmuten. Cek teqqared: ‘Mařa ca n yijjen iṭṭef deg wawař inu, ɛemmarṣ ad iqqas řmewt i řebda!’ 
Ma Cek temɣared x jedditneɣ Ibrahim wenni immuten, uřa x inabiyyen nni immuten? Min tḥesbed Ixef nnec?” 
Inna asen Yasuɛ: “Mařa Necc ssɛuǧiɣ Ixef inu, aɛuǧi inu war iǧi d walu. Baba, aqa issɛuǧa ayi, Wenni xef teqqarem: ‘Netta d AREBBI nneɣ!’ 
Kenniw war t tessinem, maca Necc aqa ssneɣ t. Mařa nniɣ: ‘War t ssineɣ!’, ad iřiɣ Necc d bu-ixarriqen am kenniw. Maca Necc ssneɣ t u ttᵉṭṭfeɣ deg wawař nnes. 
Jedditwem Ibrahim tuɣa ittraja s řefraḥet ḥima ad iẓar ass inu, uca iẓra i-t, ifarḥ.” 
Nnan as Wudayen: “Ɛad war ɣarek bu xemsin n iseggʷusa, mammec teggid teẓrid Ibrahim?” 
Inna asen Yasuɛ: “S tidett, s tidett, Necc ad awem iniɣ, qbeř ma tuɣa Ibrahim, tuɣa NECC ǧiɣ.” 
Xenni ksin iẓra ḥima ad t arejmen. Maca Yasuɛ issnuffar Ixef nnes uca iffeɣ zi Zzawect Tameqqrant am icuq di řwesṭ nsen, uca ammu i iruḥ. 
