﻿Yuḥanna.
1.
Deg umezwaru tuɣa iǧa Wawař, Awař tuɣa-t ɣar AREBBI u AREBBI tuɣa-t d Awař. 
Wanita d wenni iǧan ɣar AREBBI deg umezwaru. 
Zzayes Netta iǧa kuřci u břa Netta war teǧi uřa d ict n tmesřact zi marra min iǧan. 
Dayes i teǧa Tudart u Tudart teǧa Tafawt n iwdan. 
Tafawt tareqq di taǧest, taǧest war tt tᵉṭṭif. 
Tuɣa din ijj n bnadem issekk i-t-i-dd AREBBI, qqaren as Yuḥanna. 
Netta yusa-dd am ccahed ḥima ad iched i Tfawt, ḥima ad zzayes amnen marra. 
Netta war iǧi ca d Tafawt, maca tuɣa-t ḥima ad iched i Tfawt. 
Maɣar Tafawt nni, tuɣa d Tafawt n tidett i itticen tafawt i kuř bnadem i dd-ittasen ɣar ddunect. 
Netta tuɣa-t di ddunect u zzayes tᵉttwagg ddunect, maca ddunect war t tessin ca. 
Yusa-dd ɣar wi iǧan nnes, maca wi iǧan nnes war t qbiřen. 
Maca marra inni t iqebřen, iwca asen ṣṣulṭa, ḥima ad dewřen d tarwa n AREBBI, i yinni ittamnen deg Yisem nnes, 
inni war dd-ixřiqen uřa zeg idammen, uřa zi min ixs ddat n bnadem, uřa zi min ixs weryaz, maca zi AREBBI dd-ittwaxeřqen. 
Awař idweř d ddat, izdeɣ jar aneɣ, neccin neẓra aɛuǧi nnes, aɛuǧi n Uyenni n Mmis zi ɣar Babas i iccuren s arḍa d tidett. 
Iched xas Yuḥanna, iřaɣa, inna: “D Wa min xef nniɣ, aqa Netta ad dd-yas awarni ayi, waxxa Netta idweř zzati, minzi Netta tuɣa-t qbeř inu.” 
Zi řekmařet nnes niwi-dd marra, arḍa x arḍa. 
Ccariɛa temmewc x ufus n Musa, maca arḍa d tidett usin-dd zi Yasuɛ Lmasiḥ. 
Uřa d ijj war iẓri AREBBI. Ayenni n AREBBI i iǧan deg weḥsin n Babas, d Netta i zzayes issxebbaren. 
Ta d cchadet n Yuḥanna řami dd-ssekken Wudayen ikehhanen d Ilawiyyen zi Urcalim ḥima ad t sseqsan: “Min teɛnid cek?” 
Tuɣa iched, war issnuffar ca, iched: “Necc war ǧiɣ ca d Lmasiḥ.” 
Sseqsan t: “I min teɛnid cek xenni? Ma d cek d anabi Iliya?” Inna: “Lla, war ǧiɣ d necc!” “Ma d cek d anabi?” Yarra-dd: “Lla!” 
Xas uca nnan as: “Min teɛnid cek? Ittxeṣṣa aneɣ ad narr i yinni d aneɣ dd-issekken. Min teqqared x yixef nnec?” 
Inna: “Necc d tmijja i ittřaɣan di řexřa: ‘Seggmem abrid n SIDI nican!’, am mammec inna unabi Icaɛya.” 
Inni dd-ittwassekken, tuɣa aten zeg Ifarisiyyen. 
Nitni sseqsan t, nnan as: “Mařa war teǧid ca d Lmasiḥ uřa d Iliya uřa d anabi, i xenni mayemmi tᵉsseɣḍaṣed?” 
Yuḥanna yarra-dd, inna asen: “Necc sseɣḍaṣeɣ deg waman, maca aqa din di řwesṭ nwem wenni war tessinem ca. 
Netta d wenni i dd ɣa yasen awarni ayi, Netta iǧa qbeř inu, necc war sdiheǧeɣ ad as fesyeɣ ifiřan n sandaliyat nnes.” 
Man aya imsar di Baytɛanya x ujemmaḍ n L’Urdun, mani tuɣa Yuḥanna isseɣḍaṣ. 
Tiwecca nnes iẓra Yuḥanna Yasuɛ iggur-dd ɣares, inna: “Xzarem, aqa-t d Izmar n AREBBI i ittekksen ddnub x ddunect! 
D Wa min xef nniɣ: ‘Ad dd-yas awarni ayi ijj n Weryaz nni iǧan zzati, minzi Netta tuɣa-t qbeř inu.’ 
Necc war t ssineɣ ca, maca ḥima ad ittwassargeb ɣar Israil, x uyenni usiɣ-dd ḥima ad ssɣeḍṣeɣ deg waman.” 
Yuḥanna iched, inna: “Ẓriɣ Arruḥ ihwa-dd am yict n tedbirt zeg ujenna, tarsa xas. 
Necc war t ssineɣ ca, maca wenni d ayi dd-issekken ḥima ad ssɣeḍṣeɣ deg waman, Netta inna ayi: ‘Wenni teẓrid ihwa-dd xas Arruḥ uca yarsa xas, d Wa d wenni isseɣḍaṣen di Arruḥ Iqeddsen.’ 
U Necc ẓriɣ, cehdeɣ belli Wanita d Mmis n AREBBI.” 
Tiwecca nnes tuɣa Yuḥanna ibedd ak-d tnayen n imeḥḍaren nnes. 
Am tuɣa ixezzar ɣar Yasuɛ i din igguren, inna: “Xzarem, d Wa d Izmar n AREBBI!” 
Tnayen n imeḥḍaren nnes sřin as am tt iqqar uca ḍfaren Yasuɛ. 
Inneqřeb-dd Yasuɛ, iẓra i-ten ḍeffaren t-i-dd, isseqsa ten: “Min xef tarezzum?” Nitni nnan as: “A Amseřmad nneɣ, mani tzeddɣed?” 
Inna asen: “Araḥem-dd, ad tẓarem!” Ruḥen akides, ẓrin mani izdeɣ, qqimen akides ass nni. Tasaɛɛet tuɣa-tt ɛřaḥař d ɛecra, ixs ad yini ɛřaḥař tasaɛɛet wiss arebɛa n tmeddit. 
Andrawus, umas n Cimɛun, tuɣa-t d ijjen zeg yinni isřin aya zi Yuḥanna uca ḍeffaren Yasuɛ. 
D wa i iẓrin amezwaru umas Cimɛun, inna as: “Aqa nufa Lmasiḥ!” 
Issiweḍ i-t-i-dd ɣar Yasuɛ. Ixzar dayes Yasuɛ, inna: “Cek d Cimɛun, mmis n Yuna, ad ac řaɣan: ‘Kifa’, ixs ad yini ‘aẓru’ ”   
Tiwecca nnes tuɣa ixs Yasuɛ ad iraḥ ɣar Ljalil. Immeřqa ak-d Filippus, inna as: “Ḍfar ayi-dd!” 
Filippus s yixef nnes tuɣa zi Bayt-Ṣayda zi tandint n Andrawus d Cimɛun. 
Filippus yufa Natanayil, inna as: “Nufa wenni xef yura Musa di Ccariɛa uřa d Inabiyyen, aqa-t d Yasuɛ, mmis n Yusuf zi Nnaṣira.” 
Natanayil inna as: “Ma ad taɣ izemmar ad dd-teffeɣ zi Nnaṣira ca n tcuni?” Filippus inna as: “Araḥ-dd, texzared!” 
Yasuɛ iẓra Natanayil iggur-dd ɣares, inna xas: “Xzar, wa d ijj n mmis d tidett n Israil nni war dayes bu řɣecc!” 
Natanayil inna as: “Manis d ayi tessned?” Yasuɛ inna as: “Ẓriɣ cek swadday i wartu qbeř ma ad ac dd-iřaɣa Filippus.” 
Natanayil yarra-dd xas: “A Amseřmad inu, Cek d Mmis n AREBBI, Cek d Ajeǧid n Israil.” 
Yasuɛ inna as: “Ma tumned s minzi d ac nniɣ: ‘Aqa ẓriɣ cek swadday i wartu’? Ad tẓared min iǧan ktar zi man aya.” 
Inna as: “S tidett, s tidett, Necc ad awem iniɣ, zi ssa d tsawent ad tẓarem ajenna innurzem u lmalakat n AREBBI ttařyent hekkwant ɣar Mmis n bnadem!” 
