﻿Luka.
24.
Deg wass amezwar n ssimana ɣar ṣṣbeḥ, řami tuɣa ɛad d taǧest, ruḥent ɣar wenḍeř, ksint řeɛṭur i tuɣa ssewjdent, u tuɣa din ɛad timɣarin nneɣni akidsent. 
Aqa ufint, taṣḍart i tuɣa x wenḍeř, tᵉttwasseqnuni zzayes. 
Udfent, maca war ufint ca arrimet n Yasuɛ. 
Am tbehtent di man aya, xzar, aqa din tnayen n yeryazen deg warruḍ ittissiqen, bedden sennej nsent. 
Nitenti ggʷedent aṭṭas uca qbařent azeǧif nsent ɣar temmurt. Nitni maca nnan asent: “Mayemmi tarezzunt x Wenni iddaren jar imettinen? 
Aqa war da iǧi, minzi aqa ikkar! Ɛeqřent x min d akent inna umi t tuɣa ɛad di Ljalil, 
inna: ‘Aqa tura belli Mmis n bnadem ad immewc deg ifassen n imednab, ad ittwaṣelleb uca deg wass wiss třata ad dd-ikkar.’” 
Xenni ɛeqřent x wawařen nnes. 
Ɛeqbent-i-dd zeg wenḍeř uca xebbarent marra man aya i ḥiṭac u i inneɣni. 
Ina tuɣa d Maryam n Majdala d Yuḥanna d Maryam, yemmas n Yaɛqub, d min tuɣa iqqimen n temɣarin i iǧan akidsent, ḥajant nitenti man aya i rrusul. 
Nitni ḥesben awařen-a d aṭemmes uca war tent ttiqqen. 
Maca Cimɛun ikkar-dd, yuzzeř deɣya ɣar wenḍeř, ixezzar daxeř, iẓra taxeyyaḍt n řeqṭen azdad tᵉttwamars ɣar uɣezdis. Xenni iruḥ, ittebhet deg yixef nnes s min imsaren. 
U xzar, deg wass nni tuɣa tnayen zzaysen deg webrid ɣar ijj n dcar qqaren as Ɛimwas, iggʷej settin ‘istadiyyen’ x Urcalim, ɛřaḥař ḥiṭac kilumitr. 
Tuɣa ssawařen ak-d wayawya x marra min tuɣa imsaren. 
Am ssawařen nitni, ttemsawaḍen, iqarreb-dd ɣarsen Yasuɛ, yuyur akidsen. 
Ttwacebbarent tiṭṭawin nsen ařami war t ɛqiřen. 
Inna asen: “Man awařen-a i xef tessawařem ak-d wayawya deg webrid, am teggurem u ttbanent řxeẓrat nwem ceḍnent?” 
Ijjen zzaysen umi qqaren Kliyupas, inna as: “Ma Cek d ayenni n ubarrani di Urcalim i war issinen min din imsaren deg wussan-a?” 
Inna asen: “Min imsaren?” Nnan as: “Min imsaren i Yasuɛ zi Nnaṣira, tuɣa-t d anabi, tuɣa ɣares jjehd di min ittegg u di min issawař qibač i AREBBI d marra řgens. 
Sellmen t imeqqranen n ikehhanen d imɣaren n řgens i řḥukm s řmewt uca ṣellben t. 
Neccin tuɣa nessitim, aqa d Netta i ɣa isellken Israil, maca xzar, ass-a ɛdun ɛad třata n wussan zeg wami imsar man aya marra. 
Maca ca n temɣarin zzayneɣ ssḥeyyarent aneɣ ɛawed, maɣar nitenti ruḥent zic ɣar wenḍeř. 
Řami war din ufint arrimet nnes, usint-i-dd, nnant: “Aqa neẓra din lmalakat, u lmalakat nnant xas: ‘Aqa iddar!’” 
Ca zeg inni akidneɣ iǧan, ruḥen ɣar wenḍeř, ufin timesřayin am mammec xas nnant ɛawed temɣarin, maca Netta war t ẓrin ca.” 
Inna asen: “Mecḥař d ifɣař d ineḍqař n wuř i teǧam maḥend ad tamnem di marra min ssiwřen inabiyyen! 
Ma war ittxeṣṣi ad iweddeb Lmasiḥ ḥima ad yadef ɣar uɛuǧi nnes?” 
Xenni ibda zi Musa u zi marra inabiyyen, ittfessar asen x Yixef nnes zi marra Tira Iqeddsen. 
Umi dd-qarrben ɣar dcar i ɣar tuɣa gguren, igga Netta axmi tuɣa ixs ad yarni deg webrid ɣar ijj n wemcan iggʷejen. 
Maca nitni ggin xas bezzez, nnan: “Qqim akidneɣ, minzi tameddit ad tewḍa, aqa imeyyeř uziř.” Uca yudef, iqqim akidsen. 
Imsar ařami tuɣa akidsen iqqim ɣar umensi iksi aɣrum, ibarek i-t, yarẓa i-t, xenni iwca asen t. 
Deɣya nnurzment tiṭṭawin nsen, ɛeqřen t. Xas uca ittwammeksi zzaysen. 
Nnan ijjen i wenneɣni: “Ma war tuɣi ideqqeř wuř nneɣ ařami tuɣa akidneɣ issawař deg webrid, issefham aneɣ Tira Iqeddsen?” 
Di tsaɛɛet nni kkaren nitni, ɛeqben ɣar Urcalim, uca ufin ḥiṭac n rrusul munen, nitni d yinni akidsen. 
Uca nitni nnan: “D tidett, aqa ikkar-dd Siditneɣ, iban-dd i Cimɛun.” 
Uřa d nitni xebbaren ɛawed s min imsaren deg webrid u mammec t ɛeqřen ařami yarẓa aɣrum. 
Am tuɣa ssawařen nitni x man aya, ibedd Yasuɛ simant nnes di řwesṭ nsen, inna asen: “Sřam xawem, aqa d NECC, war tteggʷedem ca!” 
Maca nitni nnxeřɛen uca ggʷeden aṭṭas, ittɣiř asen belli ttwařan ijj n řexyař. 
Inna asen Yasuɛ: “Mayemmi tᵉttnexřiɛem, mayemmi tᵉtteggem ixarriṣen deg wuřawen nwem? 
Xzarem ifassen d iḍaren inu, aqa d Necc Necc. Ḥadam ayi, u snem belli ijj n řexyař war ɣares bu weysum uřa d iɣsan am mammec d ayi tᵉttwařam.” 
Umi inna aya, isscen asen ifassen nnes d iḍaren nnes. 
War uminen ɛad zi ssibbet n řefraḥet, qqimen ttbehten. Inna asen: “Ma ɣarwem da ca n macca?” 
Wcin as ict n tecwiḥt n wesřem icennfen d ca n tezřeft n tamment. 
Iksi tt uca icca i-tt qibač nsen. 
Inna asen: “Ina d awařen i zi kidwem ssiwřeɣ umi d ayi tuɣa ɛad akidwem, aqa ittxeṣṣa ad ittwakemmeř marra min xafi yuran di Ccariɛa n Musa, deg Inabiyyen u deg Izehhiden.” 
Xenni yarzem asen řeɛqeř nsen, ḥima ad fehmen i Tira Iqeddsen. 
Inna asen: “Ammu i tura u ammu i tuɣa ittxeṣṣa ad imarret Lmasiḥ u ad dd-ikkar zi taddart n imettinen deg wass wiss třata, 
ḥima ad ittwabarreḥ s ttubet i weɣfar n ddnub i marra řegnus s Yisem nnes, d amezwaru di Urcalim. 
Kenniw d řechud x man aya. 
Aqa Necc ad awem dd-ssekkeɣ lwaɛd n Baba. Qqimem maca di tendint n Urcalim ař ɣa tᵉttwassyarḍem s jjehd zi řuɛřa!” 
Xenni indeh i-ten ɣar tendint n Bayt-Ɛanya, issgeɛɛed ifassen nnes uca ibark i-ten. 
Awarni řami ten tuɣa ittbarak, imsar, aqa immsebḍa xasen uca iggeɛɛed ɣar ujenna. 
Sejden as uca ɛeqben ɣar Urcalim s řefraḥet temɣar. 
Tuɣa-ten řebda di Zzawect Tameqqrant, ssemɣaran u ttbaraken AREBBI. Amin. Aneggar n L’Injil Iqeddsen am mammec t ibarreḥ Luka. 
