﻿Luka.
21.
Xenni isweḍ Yasuɛ ɣar aytbab n wagřa ssrusan ṣṣdaqi nsen di ssenduq. 
Iẓra ɛawed ict n tajjač tamezřuḍt tessars dayes tnayen n uqiyyat, semman tent ‘camunat’. 
Inna asen: “S tidett, Necc ad awem iniɣ, aqa tajjač-a řmeskina tenḍar dayes ktar zzaysen marra. 
Minzi marra nitni nḍaren zi zziyada n wagřa nsen ict n ṣṣedqet deg wexxam n ṣṣdaqi n AREBBI, maca nettat zi řexṣeṣ nnes aqa tenḍar dayes marra min ɣares.” 
Ařami tuɣa ca n iwdan ssawařen x Zzawect Tameqqrant, tenni tzewweq s iẓra iṣebḥen d ṣṣdaqi, inna asen Yasuɛ: 
“Ma tᵉttwařam timesřayin-a? Ad dd-asen wussan war ittɣimi uřa d ijj n weẓru x weẓru nneɣni i war ittareddǧen.” 
Sseqsan t, nnan: “A Amseɣɣar, meřmi i ɣa yiři uya d man řeɛřamet aqa timesřayin-a udsent-i-dd?” 
Inna asen: “Ɛessem, war tᵉttwaɣarrem, minzi aṭṭas ad dd-asen s Yisem inu, ad inin: ‘Aqa Necc d Lmasiḥ!’ u: ‘Řweqt aqa tiweḍ-dd!’, maca war ggurem awarni asen. 
Mařa tesřim x řbaruḍ d iɣewwɣen, war ttnexřiɛem ca, minzi s uɣiř ad yiři uya d amezwar, maca war ittiři ɛad deɣya uneggar. 
Maɣar ijj n řgens ad dd-igeɛɛed ḍidd n ijj n řgens nneɣni u ict n tgeldit ḍidd n ict n tgeldit nneɣnit. 
Ad iřin inhezziyyen n temmurt mɣaren di ɛřam kuř imucan d řaẓ d jjrayeḥ d tiggʷudi d usnexřiɛ. Uca ad dd-banent řeɛřamat mɣarent zeg ujenna u ad din iřint tḥaryaḍin ijehden. 
Maca qbeř man aya marra ad xawem ssarsen ifassen, ad kenniw sellmen ɣar temzidawin d řeḥbusat, uca ad kenniw nedhen zzat i ijeǧiden d řḥukkam x ssibbet n Yisem inu. 
Maca man aya ad yarra kenniw ad tcehdem. 
Ggem deg wuřawen nwem maḥend war tarezzum ad třemdem mammec i dd ɣa tarrem. 
Minzi Necc ad awem wceɣ aqemmum d tiɣit i war zemmaren ad ten ssbedden marra řɛedyan nwem. 
Ad kenniw sellmem lwalidin nwem d tawmat nwem d řaǧ nwem d imeddukkař nwem uca ad nɣen ca zzaywem, 
u kenniw ad tᵉttwacarhem zi marra s ssibbet n Yisem inu. 
Waxxa amenni uřa d ijj n uẓeṭṭu n ucuwwaf n uzeǧif nwem war ittweddari ca, 
maca s ṣṣbar nwem ad tarebḥem řeɛmur nwem.” 
“Xmi ɣa tẓarem Urcalim aqa inneḍ as-dd řɛeskar, xenni snem belli aqa iqarreb-dd wareddeǧ nnes. 
Xenni ittxeṣṣa ad arewřen inni iǧan di Yahudiyya ɣar idurar, ejj inni iǧan di řwesṭ nnes ad zzayes ffɣen, ad arewřen, d yinni iǧan di dcurat, war tt ttidfen, 
minzi ina d ussan n nneqmet ḥima ad ittwakemmeř marra min yurin.    
Uct x temɣarin nni s ddeyset d tinni issuṭṭuḍen deg wussan nni, minzi ad din tiři řmeḥnet d tameqqrant x temmurt d weɣḍab x řgens-a. 
Nitni ad wḍan s řeqḍeɛ n ssif, ad ttwaḥebbsen am ttwanedhen jar marra řegnus, uca Urcalim ad xas ɛefsen řegnus ař ɣa kemmřent zzmanat n řegnus.” 
“Ad din iřint řeɛřamat di tfuct, di tziri u deg itran, uca x temmurt ad din tiři řmeḥnet di řegnus, ař d asen iweddar min ɣa ggen zeg unexřiɛ n zzhir ameqqran n řebḥar, 
u zeg wenhezzi n temmurt d ameqqran ad issnexřiɛ řeɛmar n iwdan zi tiggʷudi zi min i dd ɣa yasen x temmurt, u ṣṣulaṭat n ijenwan ad ttwanhezzent. 
Řexdenni ad ẓaren Mmis n bnadem, xmi dd ɣa yas deg iseynuten, s jjehd d uɛuǧi aṭṭas. 
Xmi ɣa bdant tmesřayin-a, ggem taryast, sgeɛɛdem izeǧifen nwem minzi asenjem nwem aqa yiweḍ-dd.” 
Iɛawed asen ijj n umedya: “Xzarem ɣar wartu n tazart u ɣar marra ticejjura. 
Xmi ɣa ssneḍyent, ad tessnem s man aya aqa anebdu yiweḍ-dd. 
Ammu ittxeṣṣa ɛawed kenniw, xmi ɣa tᵉttwařam timesřayin-a ttemsarant, snem xenni belli Tageldit n AREBBI tudes-dd. 
S tidett ad awem iniɣ, aqa war iɛeddu jjiř-a ař ɣa yiři uya kuřci. 
Ajenna d temmurt ad ɛeddun, maca awařen inu war ɛeddun ɛemmarṣ. 
Ḥḍam ixef nwem ḥima war tteḍqiřen wuřawen nwem zeg ufucceḥ d wescar d imunas n ddunect-a, u war xawem dd-iwḍi wass nni deɣya. 
Minzi ad dd-yas ass nni am řfex x marra inni iqqimen x uɣembub n temmurt. 
Ḥḍam xenni řebda, ẓaǧem ḥima ad tiřim tesdaheǧem maḥend ad tnejmem zi marra min ɣa imsaren, uca ad tbeddem zzat i Mmis n bnadem.” 
S uziř tuɣa isseřmad di Zzawect Tameqqrant, maca s ǧiřet tuɣa itteffeɣ, ittɣima ittnusa x wedrar umi qqaren: ‘Taddart n Zzitun’. 
Di ṣṣbeḥ zic tuɣa marra iwdan ttasen-dd ɣares di Zzawect Tameqqrant ḥima ad sřen Awař nnes. 
