﻿Luka.
12.
Umi munen ibarruten n řɣaci s waṭṭas, ařami bdan ɛřayen ɛeffsen ijj x wenneɣni, ibda iqqar i imeḥḍaren nnes: “Ɣar umezwar ḥḍam ixef nwem zeg wentun n Ifarisiyyen, aqa-t d nnifaq! 
Minzi war din min idřin, war ittᵉttwasseḍhar, u war din min inuffaren, war ittᵉttwissin. 
Minzi marra min tennam di taǧest, ad ittwaseř di tfawt, u min xef tessiwřem deg umezzuɣ deg wexxam n daxeř, ad ittwabarreḥ zzayes x tzeɣwin.” 
“Necc ad awem iniɣ, a imeddukkař inu: War teggʷdem ca zeg inni ineqqen arrimet, maca awarni man aya war zemmaren ad ggen ktar ɛad. 
Maca Necc ad awem ssecneɣ wenni zi ɣa teggʷedem: Ggʷedem zeg Wenni ɣar iǧa ṣṣulṭa, maḥend ad inḍar di jᵉhennama awarni řami inɣa. Wah, ad awem iniɣ, zeg Wanita i ɣa teggʷedem! 
Ma war ttmenzin xemsa n ẓẓawec s tnayen n iṣuldiyyen n nnḥas? Uca uřa d ijj zzaysen war ittᵉttwattu zzat i AREBBI. 
Maca zzaywem, ɛad iẓuṭṭan n ucuwwaf n uzeǧif nwem ttwaḥesben. S uyenni war teggʷdem ca, kenniw ḥsen zi ẓẓawec aṭṭas!”    
“Necc ad awem iniɣ, marra wi zzayi i ɣa icehden qibač i iwdan, ad zzayes iched ɛawed Mmis n bnadem zzat i lmalakat n AREBBI. 
Maca wi d ayi ɣa inkaren qibač i iwdan, uřa d netta s yixef nnes ad ittwankar qibač i lmalakat n AREBBI. 
Kuř ijj wenni i ɣa inin awař ḍidd n Mmis n bnadem, aqa ad as ittwaɣfar man aya. Maca wenni i ɣa iceqqfen di Arruḥ Iqeddsen war d as ittᵉttwaɣfar ca man aya!” 
“Xmi kenniw i ɣa nedhen ɣar temzidawin, zzat i řḥukkam d ayt n bu-ṣṣulṭa, war kessim ca s wemnus min zi i dd ɣa tarrem niɣ min ɣa tinim, 
minzi Arruḥ Iqeddsen ad awem isseřmed di tsaɛɛet nni min ittxeṣṣa ad tinim.” 
Inna as ijjen zi řɣaci: “A Amseɣɣar, ini as i uma, ḥima ad kidi ibḍa řwart.” 
Maca Yasuɛ inna as: “A bnadem, wi d ayi yarrin xawem d řqaḍi niɣ d řɛadeř?” 
Inna i imeḥḍaren nnes: “Ɣarwem, ḥḍam ixef nwem zi ṭṭmeɛ, maɣar tudart war teǧi deg ufeyyeḍ n wagřa.” 
Xas uca iḥaja asen ijj n umedya: “Tammurt n ijj n weryaz d bab n wagřa tiwyi as-dd ṣṣabet aṭṭas. 
Ixarreṣ deg ixef nnes: ‘Min ɣa ggeɣ?, minzi war ɣari bu řmarsi i di i ɣa yarweɣ marra řɣiǧet inu.’ 
Inna: ‘Ammu i ɣa ggeɣ: Ad hedmeɣ řemrasi inu, xenni ad bniɣ řemrasi d imeqqranen xasen uca ad daysen xezneɣ marra řɣiǧet d wagřa inu. 
Ad iniɣ i yixef inu: ‘A řeɛmar inu, ɣarek aṭṭas n wagřa i ittwaxzen din i waṭṭas n iseggʷusa. Areyyeḥ, tecced, teswed u tfarḥed!’ 
Maca inna as AREBBI: ‘A afɣuř, aqa ǧiřet-a ad zzayek ittwattar řeɛmar nnec. Xenni i umi ɣa yiři min tesswejded?’ 
Ammu i ɣa imsar i wenni iyarrwen řeknuz i yixef nnes, maca war iǧi d bab n wagřa di AREBBI.” 
Inna i imeḥḍaren nnes: “S uyenni Necc ad awem iniɣ: War kessim s wemnus i řeɛmar nwem min ɣa teccem, uřa i arrimet nwem min ɣa tyarḍem. 
Řeɛmar ktar zi macca u arrimet ktar zeg werruḍ. 
Xzarem ɣar ibaɣřiwen! Aqa war zarrɛen, war mejjaren, war ɣarsen tisrafin niɣ d řemrasi, maca AREBBI issecca i-ten. Mecḥař aṭṭas tsekkwim kenniw ktar x ijḍaḍ! 
Man wen zzaywem izemmar s wemnus nnes ad yarni di tuzzeggart nnes ijj n uɣiř waha? 
Mařa kenniw war tzemmarem uřa x min iǧan d ameẓyan qaɛ, mayemmi ɣa teksim s wemnus x min iqqimen?” 
“Xzarem mammec ɣemmyent tlillicin! War xeddment, war ttqareḍcent, maca Necc ad awem iniɣ, aqa uřa d Suliman di qaɛ aɛuǧi nnes war yarḍ ca am uřa d ict zzaysent. 
Mařa AREBBI issyarḍ ammu arbiɛ i iǧan ass-a deg iyyar uca tiwecca ad immenḍar di tefqunt, mecḥař iḥřa aṭṭas ad issyarḍ Netta kenniw i di iǧa drus n l’iman!” 
“S uyenni war arezzum ca x min ɣa teccem uřa x min ɣa teswem, war ttejjim ixarriṣen nwem ad ɣefřem x man aya. 
Minzi marra timesřayin-a arezzun daysent řegnus n ddunect, maca Babatwem issen belli teḥdajem tent. 
Maca arzum Tageldit n AREBBI uca timesřayin-a marra ad awem ttwammarnint.” 
“War tteggʷed, cem, a taḥimart tameẓyant, minzi yarḍa Babatwem ad awem iwc Tageldit. 
Zenzem min ɣarwem, wcem ṣṣedqet! Ggem i yixef nwem ticyarin n tmenyat i war yareccin, uca xemmřem ijj n řkenz i war iqeṭṭin deg ijenwan, mani war ittidef uceffar uřa d tcinda war tᵉttegg ssuss. 
Minzi mani ɣa yiři řkenz nwem, dinni i ɣa yiři ɛawed wuř nwem.” 
“Ad iřint tejɛinnatin nwem ḥezzmemt s ibuyas u řefnarat nwem areqqent. 
Iřim am iwdan i ittrajan sidi nsen xmi dd ɣa yeɛqeb zeg wexxam n wurar, ḥima, xmi dd ɣa yas, ad issqarqeb, zemmaren ad as arzmen deɣya. 
Sseɛd n imsexxaren nni, xmi dd ɣa yas siditsen, ad ten yaf faqen. S tidett, Necc ad awem iniɣ, aqa ad iḥezzem ixef nnes uca ad ten issɣim, xenni ad dd-yas ad xasen isexxar. 
Mařa yusa-dd ɣar ḥeṭṭu wiss tnayen n ǧiřet niɣ ɣar ḥeṭṭu wiss třata uca yufa i-ten ammu, sseɛd n imsexxaren nni. 
Maca ssnem aya: mařa bab n taddart issen di man tsaɛɛet i di ɣa ixecc uceffar, xenni ad yiři ifaq, war ittejji taddart nnes ad tt acaren. 
Iřim kenniw ɛawed twejdem, minzi Mmis n bnadem ad dd-yas deg ict n tsaɛɛet i war tᵉttrijim.” 
Inna as Cimɛun Buṭrus: “A Siditneɣ, ma i neccin i tɛawded amedya-ya niɣ i marra?” 
Inna as Yasuɛ: “Man wen iǧan xenni d awkiř amiɣis i di iǧa řaman, d wenni i ɣa yegg sidis x imsexxaren nnes ḥima ad asen iwc řeɛweč nsen di řweqt nnes? 
Sseɛd n umsexxar nni i ɣa yaf sidi nnes, xmi dd ɣa yas, ittegg ammu. 
S tidett, Necc ad awem iniɣ, belli ad t yegg x marra agřa nnes. 
Maca mařa amsexxar nni ad yini deg wuř nnes: ‘Aqa sidi inu iɛeṭṭař x weɛqab!’, uca ibda iccat imsexxaren d tiyya, ittett, isess, iscar, 
xenni ad dd-yas sidi n umsexxar nni deg ijj n wass war ittriji u deg ict n tsaɛɛet i war issin. Wanita ad t iqeṭṭes d iceǧiqen, ad igg tasɣart nnes ak-d iɣeddaren. 
Amsexxar nni issnen řxaḍar n sidi nnes uca war issewjed ixef nnes uřa war iggi ɛlaḥsab řxaḍar n sides, ad iksi tiyyita aṭṭas. 
Maca wenni war issinen řxaḍar n sides am igga ca min isdaheǧen tiyyita, ad ittwawwet s drus n tiyyita. Zi kuř ijjen umi immewc aṭṭas, ad zzayes ittwattar aṭṭas, u wi umi ittwakellef aṭṭas, ad zzayes ittwattar ktar.” 
“Usiɣ-dd ḥima ad nḍareɣ timessi x temmurt u meɛlik ufiɣ ad tiři tarɣa. 
Maca ɣari ijj n useɣḍeṣ i zi ɣa ttwassɣeḍṣeɣ, u ttwaḥṣareɣ aṭṭas ař d ɣa ittwakemmeř. 
Ma ittɣiř awem belli usiɣ-dd ḥima ad ssiwḍeɣ řehna x temmurt? Lla, ad awem iniɣ, d amezwar abeṭṭu. 
Minzi zi řexxu d tsawent ad mmsebḍan xemsa deg ict n taddart, třata ḍidd tnayen u tnayen ḍidd třata. 
Babas ad immsebḍa x mmis, u mmis x babas, u yemmas x yeǧis, u yeǧis x yemmas, u řallas x tesřit, u tasřit x řallas.” 
Inna i řɣaci: “Xmi ɣa tẓarem ijj n useynu igeɛɛed-dd zi řɣarb, deɣya ad tinim: ‘Ad yiři wenẓar!’ uca ammu i ɣa imsar! 
Xmi ɣa tẓarem asemmiḍ n ljanub ittsuḍ, xenni ad tinim: ‘Ad yiři řeḥmu!’, uca ammu i ɣa imsar. 
A imnafqen, aqa tessnem ad tmeyyzem udem n temmurt d ujenna. Ma zzman-a mammec war tzemmaren ad t tmeyyzem?” 
“Mayemmi war tḥekkmem s yixef nwem min iǧan d ṣṣaḥ? 
Minzi, xmi ɣa traḥed ɣar řḥakem ak-d weɣrim nnec, egg tizemmar am teǧid ɛad akis deg webrid maḥend ad zzayes tᵉttwafekked, ḥima war cek ittjarri ɣar řqaḍi uca řqaḍi ad cek isellem i wemxazni, xenni ad cek inḍar umxazni di řeḥbes. 
Ad ac iniɣ, cek war dd ssenni tᵉtteffɣed ař ɣa txeǧṣed aṣuldi aneggaru!” 
