﻿Luka.
10.
Awarni man aya iřeqqem Yasuɛ ɛawed sebɛin nneɣni zeg imeḥḍaren nnes uca issekk i-ten tyuya tyuya qibač i uɣembub nnes ɣar marra tineddam d jjwayeh mani tuɣa Netta igga ad iraḥ. 
Inna asen: “Tameyra aṭṭas, maca ixeddamen drus, s uyenni ttarem i Bab n tmeyra, ḥima ad issekk ixeddamen ɣar tmeyra nnes. 
Ruḥem! Aqa ad kenniw ssekkeɣ am wuǧi jar wuccanen. 
War kiwem kessim ticyarin řa d ttesṭayem uřa d sandaliyat, war ttseǧamem x ḥed deg webrid. 
Man ma taddart i ɣa tadfem, inim d amezwaru: ‘Řehna x taddart-a.’ 
Mařa din mmis n řehna, řehna nwem ad xas yarsa, mařa war iǧi amenni, řehna nwem ad ɣarwem dd-iɛqeb. 
Qqimem di taddart nni, ccem, swem zi min ɣarsen, minzi axeddam isdaheǧ řmunet nnes. S uya war ggurem ca zi taddart ɣar taddart nneɣni. 
Man tandint i ɣa tadfem uca ad kenniw qebřen, ccem din min d awem ɣa wcen. 
Sgenfam imehřac i din iǧan, inim asen: “Aqa tqarreb-dd ɣarwem Tgeldit n AREBBI.” 
Man ma tandint i ɣa tadfem, war kenniw qbiřen, ffɣem ɣar zznaqi nnes, inim: 
“Ɛad uřa d taɛejjajt i dayneɣ iřeṣqen x iḍaren nneɣ n tendint nwem, ad tt nezzerz xawem. Maca snem aya, aqa tqarreb-dd ɣarwem Tgeldit n AREBBI! 
Ad awem iniɣ belli deg wass nni ad yiři řḥař n Sadum ihwen zi tendint nni.” 
Uct xam, a Xurazin, uct xam, a Bayt-Ṣayda! Mři msarent di Ṣur d Ṣaydun řeɛjayeb i ittwaggen daykent, ad tiři tubent zi zzman am qqiment di txancet n wecḍan d yiɣɣeḍ x izeǧifen nsent. 
Maca ad yiři řḥař n Ṣur d Ṣaydun ihwen zi řḥař nkent di lḥisab. 
U cem, a Kafarnaḥum, tenni tuɣa ittwassgeɛɛden ɣar ujenna, aqa ad tᵉttwassehwid ɣar řaxart! 
Wi zzaywem i ɣa isřen, ad zzayi iseř, wi kenniw ɣa yagin, ad ayi yagi, u wi d ayi ɣa yagin, ad yagi wenni d ayi dd-issekken.” 
Xenni ɛeqben sebɛin nni s řefraḥet aṭṭas, nnan as: “A Siditneɣ, uřa d ccwaṭen ṭṭaɛen aneɣ s Yisem nnec.” 
Xas uca inna asen: “Ẓriɣ cciṭan iwḍa-dd amecnaw assam zeg ujenna. 
Xzar, Necc ad awem wceɣ ṣṣulṭa ḥima ad tɛefsem x ifiɣran d iɣarḍmiwen uřa d ṣṣulṭa x marra jjehd n řeɛdu. Uřa d ict n řḥajjet war kenniw tḍarri. 
Maca war farrḥem ca s uya, belli aqa ccwaṭen ad awem ṭṭaɛen, maca farḥem belli aqa ismawen nwem ttwazemmemen deg ijenwan.” 
Di tsaɛɛet nni ifarḥ Yasuɛ di Arruḥ Iqeddsen, inna: “Necc ttqadiɣ Cek, a Baba, Bab n ujenna d temmurt, minzi tessnuffared timesřayin-a x imiɣisen u x aytbab n řeɛqeř uca tessaregbed tent i iḥenjiren. Wah, a Baba, ammu i tuɣa ixs řxaḍar nnec!” 
Xas uca inneqřeb ɣar imeḥḍaren nnes, inna: “Kuřci immewc ayi zi Baba uca uřa d ijj war issin man wen d Mmis mɣir Babas uca uřa d ijj war issin man wen d Babas mɣir Mmis, d wenni umi ixs Mmis ad t issargeb.” 
Xenni inneqřeb-dd ɣar imeḥḍaren weḥḥedsen, inna: “Sseɛd n tiṭṭawin i ittwařan min tᵉttwařam kenniw. 
Minzi Necc ad awem iniɣ, aqa aṭṭas n inabiyyen d ijeǧiden tuɣa xsen ad ẓaren min tᵉttwařam kenniw, maca war tt ttwiřin, uřa ad sřen min tᵉttesřam, maca war tt sřin.” 
Xzar, ijj n umseřmad n idlisen ikkar ḥima ad t ijarreb, inna: “A Amseɣɣar, min ɣa ggeɣ ḥima ad warteɣ Tudart ittduman?” 
Yasuɛ inna as: “Mammec t yurin di Ccariɛa? Mammec teqqared?” 
Yarra-dd, inna as: “Ad texsed SIDI, AREBBI nnec s marra wuř nnec, s marra řeɛmar nnec, s marra jjehd nnec, s marra řeɛqeř nnec, uca ad texsed jjar nnec amecnaw ixef nnec.” 
Inna as Yasuɛ: “Aqa tarrid nican. Egg man aya uca ad teddared.” 
Maca netta ixs ad issegged ixef nnes, inna as: “Man wen iǧan d jjar inu?” 
Yarra-dd xas Yasuɛ, inna as: “Ijj n weryaz ihwa-dd zi Urcalim ɣar Ariḥa uca iwḍa deg ifassen n iceffaren, kksen as arruḍ, wtin t s weɛmud, xenni ruḥen, jjin t jar řmewt d tudart. 
Xenni ihwa-dd ijj n ukehhan ɣar webrid nni. Netta iẓra i-t, maca ikka xas. 
Ammu ɛawed uřa d ijj n Ulawi iɛdu-dd x wemcan nni, iẓra i-t, maca ikka xas. 
Maca ijj n weryaz Asamiri, tuɣa-t deg usafar, yiweḍ-dd ɣares, iẓra i-t uca iḥinn xas. 
Iqarreb-dd ɣares, icedd as iyezzimen nnes, iseyyeḥ xasen binu d zzect. Xenni issenya i-t x zzayřet nnes, yiwyi i-t ɣar wenwař, ithella dayes. 
Tiwecca nnes řami iruḥ, iwca tnayen dinar i bab n wenwař, inna as: ‘Thilla dayes u mařa txeǧṣed ktar zi man aya, ad cek xeǧṣeɣ xmi dd ɣa ɛeqbeɣ.’ 
Man wen zi třata nni tᵉttwařid d jjar n wenni iwḍan deg ifassen n iceffaren?” 
Inna as: “Wenni xas iḥinnen!” Inna as Yasuɛ: “Iwa uyur, uřa d cek tegged amenni!” 
Am tuɣa gguren nitni, yudef ɣar ijj n dcar, uca ict n temɣart, qqaren as Marta, tareḥḥeb zzayes di taddart nnes. 
Tuɣa ɣar ta ict n učmas, qqaren as Maryam, tenni tuɣa teqqim ɣar iḍaren n Siditneɣ uca tuɣa tessḥessa i wawař nnes. 
Maca Marta tuɣa tecɣeř aṭṭas s tsexxart. Nettat tusa-dd ɣares, tenna as: “A Sidi, ma war d ac icqi belli učma tejja ayi ttsexxareɣ weḥḥdi? Ini as ḥima ad ayi tɛawen.” 
Maca Yasuɛ yarra-dd, inna as: “Marta, Marta, cem tceɣřed u tqeǧiqed x waṭṭas n tmesřayin, 
maca ittxeṣṣa ict n řḥajjet waha! Aqa Maryam tixḍar tasɣart taṣebḥant tenni war zzayes ittwattekksen.” 
