﻿Luka.
2.
Deg wussan nni iffeɣ-dd ijj n řumur zi qayṣar Uɣustus ḥima ad ttwazemmemen marra imezdaɣ n řeḥkamet nnes. 
Azemmem-a tuɣa-t d amezwaru umi tuɣa Qiriniyus iḥekkem di Suriya. 
Kuř ijjen iřuḥ ɣar tendint nnes, ḥima ad ittwazemmem dinni. 
Igeɛɛed ɛawed Yusuf zi Nnaṣira, ict n tendint di Ljalil, ɣar Yahudiyya, ɣar tendint n Dawud tenni umi qqaren Bayt-Laḥm umi t tuɣa zi taddart u zi jjiř n Dawud, 
ak-d Maryam, tanexḍabt nnes, tenni tuɣa s ddeyset, ḥima ad ittwazemmem dinni. 
Uca imsar, ařami ten tuɣa dinni, qefřen wussan nnes ḥima ad taru. 
Turuw-dd Mmis amenzu, tessenneḍ i-t di teḥřucin uca tessars i-t di řkuri, minzi war ɣarsen bu wemcan mani zemmaren ad qqimen. 
Di jjwayeh nni tuɣa din ca n imeksawen, ḥeṭṭan tiḥimriwin nsen di ǧiřet. 
U xzar, lmalak n AREBBI ibedd-dd ɣarsen uca aɛuǧi n SIDI issarɣ xasen, inneḍ asen, uca třeḥḥef asen ict n tiggʷudi temɣar. 
Inna asen lmalak nni: “War tteggʷedem ca, ad awem barrḥeɣ řexbar aṣebḥan, ad tiři řefraḥet temɣar i ddunect marra. 
Aqa ittwaxřeq awem-dd ass-a Umsenjem, SIDI, Lmasiḥ, di tendint n Dawud. 
D wa d awem i ɣa yiřin d řeɛřamet: Ad tafem Aseymi ittwanneḍ di teḥřucin, immars di řkuri.” 
Řexdenni iban-dd ak-d lmalak ijj n řɣaci ameqqran n řɛeskarat n ujenna ttṣebbaḥen AREBBI, qqaren: 
“Aɛuǧi i AREBBI di řuɛřa, řehna x temmurt, u asitem d aṣebḥan i yewdan.” 
Umi xasen uyurent lmalakat ɣar ujenna, ssiwřen imeksawen ak-d wayawya, nnan: “Ejj aneɣ ad nraḥ ɣar Bayt-Laḥm, ḥima ad nẓar min imsaren min xef d aneɣ issargeb SIDI.” 
Usin-dd s tazřa, ufin Maryam d Yusuf d Useymi immars di řmedwed. 
Umi t ẓrin, ɛawden awař i d asen ittwannan x Uḥenjir. 
Marra inni isřin, tbehten s min d asen nnan imeksawen. 
Maca Maryam tuɣa txemmeř marra awařen-a, tᵉttxarraṣ daysen deg wuř nnes. 
Xenni ɛeqben-dd imeksawen, ttṣebbaḥen u ssemɣaran di AREBBI x marra min sřin d marra min ẓrin, nican am mammec d asen tuɣa ittwanna. 
Umi kemmřen tmenya n wussan, ḥima ad ittwaxten Useymi, semman t ‘Yeccu’, am mammec tuɣa t isemma lmalak qbeř i ɣa ittwaksi deg uɛeddis. 
Umi kemmřen wussan n usizdeg nsen ɛlaḥsab Ccariɛa n Musa, iwyen t ɣar Urcalim, ḥima ad t qeddmen zzat i SIDI 
- am mammec tura di Ccariɛa n SIDI: ‘Aqa kuř mmis amenzu i dd-ittwaxeřqen zeg uɛeddis n yemmas ad ittwasemma d amqeddas i SIDI!’ - 
u ḥima ad ḥḍaren taɣarṣt am mammec tᵉttwanna di Ccariɛa n SIDI: tnayen n idbiren niɣ tyuya n iwarruḍen n idbiren. 
Tuɣa di Urcalim ijj n weryaz qqaren as Cimɛun. Tuɣa aryaz-a nican d amsegged, ittraja afewwej n Israil uca tuɣa Arruḥ Iqeddsen xas. 
Tuɣa Arruḥ Iqeddsen iweḥḥa as-dd aqa war ittmetti ca qbeř i ɣa iẓar Lmasiḥ n SIDI. 
Yusa-dd ɣar Zzawect Tameqqrant am t iɛarren Arruḥ Iqeddsen, umi dd-udfen lwalidin s Uḥenjir Yasuɛ, ḥima ad as ggen ɛlaḥsab lqaɛida n Ccariɛa. 
Iksi t deg iɣaǧen nnes uca ibarek AREBBI, inna: 
“A Sidi inu, ejj amsexxar nnec ad iraḥ di řehna řexxu, ɛlaḥsab awař nnec, 
minzi tiṭṭawin inu ẓrint arreḥmet nnec, 
i tesswejded zzat i wudem n marra řegnus: 
Tafawt i ɣa tᵉttwasargeb i řegnus d uɛuǧi i řgens nnec Israil!” 
Itebhet Yusuf d yemmas s min xas ittwannan. 
Xenni ibark i-ten Cimɛun, inna i Maryam yemmas: “Aqa Wa immars i uweṭṭu d tnukra n waṭṭas di Israil u i řeɛřamet i ɣa ittwaɛekksen. 
Ad icuq ssif di řeɛmar nnem, ḥima ad dd-ttwasseḍharen ixarriṣen zeg waṭṭas n wuřawen.” 
Ict n tnabit, qqaren as Ḥanna, yeǧis n Fanwil, zi teqbič n Acir, tuɣa-tt uřa d nettat tewsar aṭṭas. Teddar ak-d weryaz nnes sebɛa n iseggʷusa zeg wami tt tuɣa ɛad d taɛzarect. 
Tuɣa-tt d tajjač i yijj n řmijař n arebɛa u-tmanyin n iseggʷusa, war tᵉttbeɛɛid ca x Zzawect Tameqqrant. Tuɣa tɛebbed AREBBI s uẓummi d tẓaǧit ǧiřet d wass. 
Ɣar tsaɛɛet nni tbedd nettat ɛawed, tᵉttṣebbaḥ i SIDI, tessawař xas ak-d marra inni ittrajan asenjem n Urcalim. 
Umi kemmřen nitni kuřci ɛlaḥsab Ccariɛa n SIDI, ɛeqben ɣar tendint nsen Nnaṣira di Ljalil. 
Tuɣa Aḥenjir iggam, yarenni dayes Arruḥ, idweř iccur s tiɣit, u arḍa n AREBBI aqa-t xas. 
Tuɣa řaǧ nnes ttraḥen kuř aseggʷas ɣar Urcalim di Řɛid n Tɣarṣt n Useɛdu. 
Umi ɣares yiweḍ tenɛac n iseggʷusa, geɛɛden ɣar Řɛid am mammec nnumen nitni. 
Awarni řami ɛdun wussan n Řɛid, ɛeqben-dd, maca Aḥenjir, Yasuɛ, iqqim awarni asen di Urcalim, umi Yusuf d yemmas war argiben ca x man aya. 
Ittɣiř asen aqa-t jar imsebriden. Awarni řami uyuren ict n ticři n wass, arezzun xas jar řaǧ nsen d yinni ten issnen. 
Umi war t ufin, ɛeqben ɣar Urcalim, arezzun xas. 
Awarni třata n wussan ufin t di Zzawect Tameqqrant, tuɣa iqqim di řwesṭ n imesɣaren n Ccariɛa, ittesřa ɣarsen, ittseqsa ten. 
Marra inni d as isřin tbehten di řefhamet d wawař i dd-ittarra. 
Řami t ẓrin, tbehten. Tenna as yemmas: “A Mmi, mayemmi d aneɣ teggid ammu? Aqa, babac d necc nedɛeq s tarezzut xak.” 
Inna asen: “Mayemmi xafi tarzum? Ma war targibem ca belli ittxeṣṣa ayi ad iřiɣ di Taddart n Baba?” 
Maca war fhimen awař i d asen inna. 
Uca ihwa-dd akidsen ɣar Nnaṣira, tuɣa ittegg asen array. Maca yemmas txemmeř marra awařen-a deg wuř nnes. 
Uca tuɣa Yasuɛ yarenni di tiddi nnes d tiɣit nnes u di arḍa ɣar AREBBI d yewdan. 
