﻿Markus.
10.
Ikkar, yuyur ssenni uca yiweḍ ɣar temmurt n Yahudiyya, ɣar wemcan n uẓekkwi n L’Urdun. Munen-dd xas řɣaci aṭṭas u ɛawed tuɣa isseřmad i-ten am mammec tuɣa innum. 
Usin-dd ɣares Ifarisiyyen, sseqsan t ḥima ad t jarrben: “Ma iḥeǧeř i weryaz ad iǧef i temɣart nnes?” 
Yarra-dd, inna asen: “Min xef tuɣa kenniw yumur Musa?” 
Nnan: “Musa iwca ttesriḥ ad tᵉttwari tebrat n waǧaf maḥend aryaz ad as iǧef.” 
Yarra-dd Yasuɛ, inna asen: “X ssibbet n řeqsaḥet n wuřawen nwem aqa yura awem tawṣeyyet-a, 
maca zi beddu zi mani tᵉttwagg ddunect, ixřeq i-ten-dd AREBBI d awtem d tewtemt. 
S uyenni ad ismeḥ weryaz di babas d yemmas, ad iqqen ɣar temɣart nnes, 
uca tnayen idsen xenni ad iřin d ict n ddat, uca ammu war ttiřin ɛad d tnayen, maca ad iřin d ict n arrimet. 
S uya min issmun AREBBI, war t ibeṭṭi bnadem.” 
Di taddart sseqsan t imeḥḍaren nnes ɛawed x man aya. 
Inna asen: “Wi ɣa iǧfen i temɣart nnes uca ad yawi tenneɣnit, aqa netta izna. 
U mařa tamɣart teǧef i weryaz nnes, uca xenni ad tiři i weryaz nneɣni, aqa nettat tezna.” 
Iwyen as-dd iḥenjiren ḥima ad ten iḥada, maca imeḥḍaren webbxen inni ten dd-yiwyen. 
Umi iẓra Yasuɛ man aya, ixeyyeq, inna asen: “Jjem iḥenjiren ad ɣari dd-asen, war ten mennɛem, minzi Tageldit n AREBBI n yinni iǧan am nitni. 
S tidett, Necc ad awem iniɣ: “Wi war iqebbřen Tageldit n AREBBI am yijj n uḥenjir, aqa ɛemmarṣ war ɣares ittidef.” 
Idarreɛ asen, uca am xasen issars ifassen nnes, ibark i-ten. 
Umi iffeɣ maḥend ad yuyur deg webrid, yuzzeř-dd ɣares ijjen, iwḍa as ɣar ifadden uca isseqsa t, inna: “A Amseɣɣar Aṣebḥan, min ɣa ggeɣ ḥima ad warteɣ Tudart ittduman?” 
Inna as Yasuɛ: “Mayemmi d ayi tᵉttřaɣid: ‘Aṣebḥan’? Uřa d ijj war iǧi d aṣebḥan, mɣir Ijjen waha: AREBBI! 
Cek tessned tiweṣṣa: ‘War zenni, war neqq, war tticar, war cehhed s ẓur, war ttɣecca, weqqar babac d yemmac.’” 
Yarra-dd, inna as: “Wah, a Amseɣɣar, aqa marra tina tuɣa ḍeffareɣ tent zi temẓi inu.” 
Ixzar dayes Yasuɛ uca issɛizz i-t, inna as: “Teqqim icten ɛad: Uyur, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ujenna. Xenni ksi ṣṣalib nnec, ḍfar ayi-dd!” 
Maca netta tuɣa iḥzen s wawař nni, uca iruḥ icḍen, minzi tuɣa ɣares aṭṭas n wagřa. 
Ixzar Yasuɛ ɣar imeḥḍaren nnes, inna asen: “Mecḥař iwɛar x yinni ɣar iǧa agřa ḥima ad adfen ɣar Tgeldit n AREBBI!” 
Tbehten imeḥḍaren zeg wawařen nnes. Maca Yasuɛ iɛawed iṭṭef deg wawař, inna asen: “A tarwa inu, mecḥař iwɛar x yinni ittcařan x wagřa nsen maḥend ad dd-adfen ɣar Tgeldit n AREBBI! 
Ihwen ad yadef weřɣem zi tiṭṭ n tsineft zeg wadaf n bu-wagřa ɣar Tgeldit n AREBBI.” 
Immarni daysen ɛad unexřiɛ, nnan i wayawya: “Wi izemmaren xenni ad ittwassenjem?” 
Ixzar daysen Yasuɛ, inna: “Ɣar iwdan war izemmar, maca ɣar AREBBI war iǧi amenni, minzi aqa ɣar AREBBI kuřci di tzemmar nnes.” 
Ibda Buṭrus ad yini: “Xzar, aqa neccin nejja kuřci, neḍfar i Cek-dd.” 
Yarra-dd xas Yasuɛ, inna: “S tidett, Necc ad awem iniɣ: War din iǧi uřa d ijjen wenni isemḥen di taddart niɣ deg aytmas niɣ di yessmas niɣ di babas niɣ di yemmas niɣ di temɣart niɣ di tarrawt uřa deg iyyaren di ṭṭweɛ inu u di ṭṭweɛ n Řexbar Aṣebḥan, 
i war ikessin mya n tseqqar. Řexxu di řweqt-a ad iksi tudrin d aytmas d yessmas d tyemmatin d tarrawt d yeyyaren ak-d umarret, uca di zzman i dd ɣa yasen ad iksi Tudart ittduman. 
Maca aṭṭas n yinni iǧan d imezwura ad iřin d ineggura, uca inni iǧan d ineggura ad iřin d imezwura.” 
Tuɣa-ten deg webrid maḥend ad geɛɛden ɣar Urcalim u Yasuɛ tuɣa izwar asen. Nitni tuɣa ttbehten uca ggʷeden umi t-i-dd-ḍeffaren. Iksi tenɛac ɣar uɣezdis uca ibda iqqar asen x min d as ɣa imsaren, inna: 
“Xzar, neccin ad ngeɛɛed ɣar Urcalim u Mmis n bnadem ad immewc deg ifassen n imeqqranen n ikehhanen d imseřmaden n idlisen, u nitni ad xas ḥekmen s řmewt, ad t sellmen i řegnus. 
Ad t sseḥqaren, ad t hettken s urekkuḍ, ad xas ssusfen, ad t nɣen, uca deg wass wiss třata ad ikkar.” 
Yusa-dd ɣares Yaɛqub d Yuḥanna, tarwa n Zabdi, nnan as: “A Amseɣɣar, nexs ad aneɣ tegged marra min zzayek ɣa nettar.” 
Inna asen: “Min texsem ad awem ggeɣ?” 
Nnan as: “Ewc aneɣ ad neqqim, ijjen ɣar ufusi nnec u wenneɣni ɣar uzeřmaḍ nnec, deg uɛuǧi nnec.” 
Maca Netta inna asen: “Aqa war tessinem ca min tᵉttarem. Ma tzemmarem ad teswem řkas i zi ɣa sweɣ Necc niɣ ad tᵉttwassɣeḍṣem s useɣḍeṣ i zi ɣa ttwassɣeḍṣeɣ Necc?” 
Nnan as: “Nzemmar!” Inna asen Yasuɛ: “Řkas i ɣa sweɣ Necc, ad t teswem, u aseɣḍeṣ i zi ttwassɣeḍṣeɣ Necc, ad zzayes ttwassɣeḍṣem,    
maca aɣimi x yefus inu niɣ x uzeřmaḍ inu, war ɣari iǧi deg ufus inu maḥend ad t wceɣ, maca ad immewc i yinni umi ittwassewjed.” 
Řami sřin ɛecra n imeḥḍaren man aya, xeyyqen x Yaɛqub d Yuḥanna. 
Xenni iřaɣa asen-dd Yasuɛ ɣares, inna asen: “Kenniw tessnem belli inni ittwaḥesben d řḥukkam n řegnus, aqa ḥekkmen xasen, u imeqqranen nsen, aqa ttṣeǧaḍen xasen. 
War ittiři ammu jar awem, maca wenni ixsen ad idweř d ameqqran jar awem, aqa netta ad yiři d amsexxar nwem, 
u wenni ixsen ad yiři d amezwaru jar awem, aqa netta ad yiři d amsexxar i marra. 
Minzi ɛawed Mmis n bnadem war dd-yusi, ḥima ad xas sexxaren, maca ḥima ad ixdem, ad iwc tudart nnes d aṣřaḥ i waṭṭas n iwdan.” 
Iwḍen-dd ɣar Ariḥa. Řami dd-iffeɣ Yasuɛ zi Ariḥa ak-d imeḥḍaren nnes d waṭṭas n řɣaci, tuɣa Timawus, mmis n Timawus, ijj n weryaz d adarɣař, iqqim deg webrid, ittettar. 
Umi isřa belli Yasuɛ Nnaṣiri aqa-t din, ibda isɣuyyu, iqqar: “A, Mmis n Dawud, arḥem ayi!” 
Webbxen t aṭṭas ḥima ad isqar, maca netta iqqim isɣuyyu ktar: “A Mmis n Dawud, arḥem ayi!” 
Ibedd Yasuɛ uca yumur ad xas dd-řaɣan. Řaɣan-dd i udarɣař, nnan as: “Egg uř! Kkar, aqa ittřaɣa-dd xak!” 
Inḍar udarɣař ajeǧab nnes, ikkar uca yusa-dd ɣar Yasuɛ. 
Yarra-dd Yasuɛ, inna as: “Min texsed ad ac t ggeɣ?” Inna as udarɣař: “A Amseřmad inu, ḥima ad twařiɣ.” 
Inna as Yasuɛ: “Xzar, l’iman nnec iwca ac Tudart!” Řexdenni idweř ittwařa, uca iḍfar i-t deg webrid. 
