﻿Markus.
6.
Iffeɣ ssenni, yusa-dd ɣar tendint nnes, uca ḍfaren t-i-dd imeḥḍaren nnes. 
Řami dd-tiweḍ ssebt, ibda isseřmad di temzida. Aṭṭas n yinni d as isřin, tbehten, nnan: “Zi manis dd-usint tmesřayin-a ɣar Wanita? Mana tiɣit-a i d as immewcen ařami msarent x ifassen nnes řeɛjayeb am tina? 
Ma war iǧi Wa d anejjar, mmis n Maryam, d umas n Yaɛqub d Yusis d Yahuda d Cimɛun? Ma war ǧint suyᵉtmas da akidneɣ?” U nitni nderfen dayes. 
Maca Yasuɛ inna asen: “Anabi ɛemmarṣ war iǧi břa ccan mɣir di tendint nnes, jar řaǧ nnes u di taddart nnes.” 
Uca Netta war izemmar ad din igg uřa d ijj n řeɛjeb, illa issars afus nnes x drus n imehřac waha uca issgenfa i-ten. 
Tuɣa ittebhet zi tikkest n l’iman nsen. Xenni iruḥ, ittsara dcurat yudsen, isseřmad. 
Iřaɣa-dd i tenɛac n rrusul, ibda issekk i-ten tyuya tyuya uca iwca asen ṣṣulṭa x řaryaḥ imengas, maḥend ad ten ssuffɣen. 
Yumur i-ten ḥima war kessin walu deg webrid mɣir taɣɣarct waha, lla ttesṭim, lla aɣrum, lla tipyisin n nnḥas di tecyarin nsen, 
maca iwc asen ttesriḥ maḥend ad qqnen sandaliyat, maca war yarrḍen tyuya n tcamirat. 
Inna asen: “Mani ma tudfem ɣar ca n taddart, qqimem dayes, ař ssenni i ɣa teffɣem. 
Ɣar marra inni war kenniw iqbiřen u war ɣarwem ttesřin, zzerzem taɛejjajt zeg iḍaren nwem d cchadet i nitni. S tidett, Necc ad awem iniɣ, ad yiři řḥař ihwen i temmurt n Sadum d Ɛamurra deg wass n lḥisab zi tendint nni.” 
Uca ruḥen, barrḥen ḥima ad tuben. 
Ssuffɣen aṭṭas n ccwaṭen, dehnen imehřac aṭṭas s zzect uca ssgenfan ten. 
Isřa xas ujeǧid Hirudus, minzi Isem nnes idweř icneɛ, inna: “Aqa Yuḥanna Amseɣḍaṣ ittwassnekkar-dd zi taddart n imettinen, s uyenni ttwaggent zzayes řeɛjayeb nni.” 
Inneɣni nnan: “Aqa-t d Iliya!”, u inneɣni nnan ɛawed: “Aqa-t d nnabi am yijjen zeg inabiyyen!” 
Řami isřa Hirudus man aya, inna: “Wa d Yuḥanna wenni umi qesseɣ azeǧif, aqa netta ittwassnekkar-dd zi taddart n imettinen.” 
Minzi Hirudus simant nnes, tuɣa issekk-dd ɣares uca iḥebbes Yuḥanna, icarf i-t di řeḥbes x ssibbet n Hirudiyya, tamɣart n umas Filippus, tenni i-k-d imřec Hirudus.    
Minzi Yuḥanna tuɣa iqqar i Hirudus: “War d ac iḥeǧeř ad ɣarek tiři temɣart n umac.” 
S uyenni tuɣa Hirudiyya tenḍar dayes tiṭṭawin uca tarezzu ad t tneɣ, maca war tzemmar, 
minzi Hirudus tuɣa itteggʷed zi Yuḥanna, issen belli netta d aryaz d amseggad d amqeddas u iḥeṭṭa xas. Isřa zzayes aṭṭas n tmesřayin, x min tuɣa ittegg, uca ifarḥ ad as iseř. 
Deg ijj n wass ittwassnen igga Hirudus ict n zzardet deg wass n třařit nnes i řḥukkam nnes i ɣarsen řemɣaret aṭṭas, i arruyas x wařef n řɛeskar u i imeqqranen n Ljalil. 
Uca tudef-dd yeǧis n Hirudiyya, tecḍeḥ, teɛjeb as i Hirudus d yinni iqqimen akides. Xenni inna as ujeǧid i tḥenjirt: “Ttar zzayi marra min texsed, ad am t wceɣ!” 
Ijjuǧ as: “Mecḥař ma zzayi i ɣa tᵉttared, ad am t wceɣ, waxxa ař azyen n tgeldit inu!” 
Teffeɣ-dd nettat, tenna i yemmas: “Min d as i ɣa ttareɣ?” Tenna as tanita: “Azeǧif n Yuḥanna Amseɣḍaṣ.” 
Tudef deɣya s tazřa ɣar ujeǧid, tenna as: “Xseɣ ad ayi dd-tessarsed di tsaɛɛet-a azeǧif n Yuḥanna x ijj n ṭṭebṣi.” 
Icḍen ujeǧid aṭṭas, maca x ssibbet n tjaǧit u x ssibbet n inewjiwen i iqqimen ɣar ṭṭabřa, war ixs ad tt iqemmeɛ, 
u řexdenni issekk ujeǧid ijj n uɛessas ɣar řeḥbes s ssif, yumur ḥima ad dd-yawi azeǧif n Yuḥanna. Wanita iruḥ, iqess as azeǧif i Yuḥanna di řeḥbes. 
Xas uca yiwi-dd azeǧif nnes x ṭṭebṣi, iwca as t i tḥenjirt u taḥenjirt tewc as t i yemmas. 
Řami sřin imeḥḍaren nnes man aya, usin-dd, ksin řxecbet nnes, ssarsen tt deg wenḍeř. 
Munen rrusul ɛawed ɣar Yasuɛ, xebbaren t x kuřci, x min ggin d x min tuɣa sseřmaden.    
Inna asen: “Asem-dd, ejj aneɣ ad nraḥ weḥḥedneɣ ɣar ijj n wemcan ixřan, ḥima ad tareyyḥem cwayt!” Minzi tuɣa din aṭṭas n yinni dd-yusin d n yinni iruḥen, ařami war iwiḍen ad ccen. 
Xenni ruḥen weḥḥedsen di tɣarrabut ɣar ijj n wemcan ixřan. 
Maca řɣaci iẓra i-ten ffɣen-dd di tɣarrabut uca aṭṭas i-t ɛeqřen. Uca izwaren as am ttazzřen x iḍaren ɣar dinni zi marra tineddam. 
Umi dd-iḍra Yasuɛ, iẓra aṭṭas n řɣaci, zziǧzen as, minzi tuɣa aten am wuǧi břa ameksaw. Xenni ibda ad ten isseřmed aṭṭas. 
Rami iruḥ wass ad iqḍa, qarrben-dd ɣares imeḥḍaren nnes, nnan as: “Amcan-a ixřa u řweqt teɛdu. 
Sekk i-ten ḥima ad raḥen ɣar řeɛraṣiyyat u ɣar dcurat yudsen, ḥima ad sɣen aɣrum i yixef nsen, minzi war ɣarsen min ɣa ccen.” 
Maca Netta inna asen: “Wcem asen kenniw min ɣa ccen!” Nnan as: “Ma ad nraḥ maḥend ad asen nseɣ aɣrum s mitayen dinar uca ad asen newc min ɣa ccen?” 
Inna asen: “Ruḥem, xzarem mecḥař n tecnifin i ɣarwem danita!” Umi argben, nnan as: “Xemsa n tecnifin n weɣrum d tnayen n iseřman.” 
Yumur i-ten ad ten ssɣimen marra di tɛurricin x arbiɛ aziza. 
Uca qqimen di tɛurricin n mya u di tɛurricin n xemsin. 
Umi iksi Yeccu xemsa n tecnifin d tnayen n iseřman nni, issgeɛɛed tamuɣři nnes ɣar ujenna, ibarek uca yarẓa ticnifin, iwca i-tent i imeḥḍaren nnes, ḥima ad tent ssarsen zzatsen. Ammu i farqen nitni ɛawed tnayen n iseřman i marra. 
Ccin marra, jjiwnen. 
Xenni řeqḍen iřeqqʷaz iceṭṭen, ccuren tenɛac n tsuǧatin, uřa d iseřman iceṭṭen. 
Inni iccin zi tecnifin tuɣa aten di xemsa-ařaf n yeryazen. 
Řexdenni iziyyar x imeḥḍaren nnes maḥend ad adfen ɣar tɣarrabut, ad as izwaren ɣar ujemmaḍ, ɣar Bayt-Ṣayda am isqad Netta řɣaci. 
Uca awarni řami ten isqad, iruḥ ɣar wedrar ḥima ad iẓẓaǧ. 
Řami dd-tewḍa tmeddit tuɣa taɣarrabut di řbuɣaz uca Netta tuɣa weḥḥdes x řbarr. 
Iẓra belli nitni ttemqetmaren s uqeddef n tɣarrabut, minzi asemmiḍ yusa asen-dd deg uɣembub. Ɣar ḥeṭṭu wiss arebɛa n ǧiřet yusa-dd ɣarsen Yasuɛ, iggur x wawan n řebḥar, uca tuɣa ixs ad ten iɛdu. 
Umi t ẓrin iggur di řebḥar, ittɣiř asen d řexyař aɣeddar uca sɣuyen, 
minzi marra ẓrin t uca nnxeřɛen. Řexdenni issiweř akidsen, inna asen: “Ggem uř! Aqa d NECC, war teggʷedem ca!” 
Inyi-dd ɣarsen di tɣarrabut uca yarsa usemmiḍ. Tuɣa nitni ttbehten, arewwɛen aṭṭas deg yixef nsen, 
minzi war fhimen walu i lmuɛjiza n tecnifin, minzi uř nsen tuɣa iqseḥ. 
Awarni řami ẓwan ɣar ujemmaḍ, usin-dd ɣar temmurt n Jinnisaret. 
Umi dd-ffɣen zi tɣarrabut, ɛeqřen t iwdan deɣya. 
Uzzřen ɣar marra jjwayeh nni uca bdan ad dd-awyen inni tuɣa iheřcen aṭṭas di tassut ɣar wemcan mani sřin aqa-t Netta. 
Mani ma dd-yusa, di tendint niɣ di ředcur niɣ di řeɛraṣiyyat, ssrusan as-dd imehřac deg ibriden uca ttzawagen t ad asen ismeḥ ad ḥadan mɣir abeḥřuř n ujeǧab nnes, u marra inni t iḥadan, ggenfan. 
