﻿Markus.
3.
Uca yudef-dd Yasuɛ ɛawed ɣar temzida. Tuɣa din ijj n weryaz, afus nnes iqucceḥ. 
Bdan ḥeṭṭan t, ma ad taɣ ad t issgenfa di ssebt, ḥima zemmaren ad zzayes cetcan. 
Inna as i weryaz wenni ɣar iǧa afus iqucceḥ: “Bedd di řwesṭ.” 
Xenni inna asen ɛawed: “Ma iḥeǧeř i bnadem di ssebt, maḥend ad igg řxar niɣ řɣar, ad issenjem ijj n řeɛmar niɣ ad t yareddeǧ?” Maca nitni sqaren. 
Ixzar ɣar yinni d as dd-innḍen s tefqeḥt zi ssibbet n řeqsaḥet n wuřawen nsen, uca inna i weryaz: “Swiẓẓeḍ afus nnec!” Isswiẓẓeḍ i-t-i-dd, idweř ufus nnes iṣeḥḥ ɛawed. 
Řexdenni ffɣen Ifarisiyyen ak-d ca zi taddart n Hirudus, uca mcawaren xas, mammec ɣa ggen ad t areddǧen. 
Iffeɣ Yasuɛ ak-d imeḥḍaren nnes ɣar řebḥar, uca yarni iḍeffar i-t-dd řɣaci aṭṭas zi Ljalil, zi Yahudiyya, 
zi Urcalim, zi Idumiya, zeg ujemmaḍ n L’Urdun, zi Ṣur u zi Ṣaydun. Aqa ijj n řɣaci d ameqqran yusa-dd ɣares, minzi nitni sřin marra min igga. 
Inna i imeḥḍaren nnes maḥend ad awyen ict n tɣarrabut ɣares s ssibbet n řɣaci, ḥima war t ddeḥḥsen. 
Minzi tuɣa issgenfa din aṭṭas, ařami xas wḍan ḥima ad t awḍen ad t ḥadan. 
Inni ittwajeyyḥen zi řaryaḥ imengas, wḍan zzates ɣar iḍaren nnes, řami t ẓrin, sɣuyen, nnan: “Aqa Cek d Mmis n AREBBI.” 
Maca iweṣṣa ten aṭṭas ḥima war xas ssuffuɣen řexbar. 
Xas uca yuři ɣar wedrar, iřaɣa-dd ɣares inni ixs, uca usin-dd ɣares. 
Ifarz zzaysen tenɛac ḥima ad kides iřin u ḥima ad ten issekk maḥend ad barrḥen 
u maḥend ad ɣarsen tiři ṣṣulṭa x usgenfi n řehřac u x usuffeɣ n ccwaṭen. 
Cimɛun igga as Buṭrus, isem wanita ixs ad yini ‘aẓru’, 
d Yaɛqub, mmis n Zabdi, d Yuḥanna, umas n Yaɛqub, isemma aten ‘Buwanirjis’, min ixs ad yini ‘ayt n wajjaj’, 
uca ifarz ɛawed Andrawus d Filippus d Bar-Tulumawus d Matta d Tuma d Yaɛqub, mmis n Ḥalfa, d Tadday d Cimɛun, wenni umi ttkennan Amɛessab, 
d Yahuda Isxariyuṭi wenni t i ɣa iɣdaren. 
Usin-dd ɣar taddart uca inneyru din ɛawed řɣaci, ařami war ufin tawwart x macca n weɣrum. 
Umi sřin řaǧ nnes man aya, ffɣen-dd, ḥima ad t ṭṭfen, minzi nnan: “Aqa ibbuhři.” 
Maca imseřmaden n idlisen inni dd-ihwan zi Urcalim nnan: “Aqa dayes ‘Bᵉɛalzabub’!” uca nnan: “S umeqqran n ccwaṭen issuffuɣ ccwaṭen.” 
Iřaɣa asen-dd uca issiweř akidsen s imedya: “Mammec izemmar cciṭan ad issuffeɣ cciṭan? 
Maɣar mařa temsebḍa ict n tgeldit x yixef nnes, war tzemmar tgeldit nni ad tbedd. 
Mařa temsebḍa ict n taddart x yixef nnes, war tzemmar taddart nni ad tbedd. 
Mařa ikkar cciṭan ḍidd i yixef nnes, xenni war ittiři d ijjen, uca war izemmar ad ibedd, maca ad yiři man aya d aneggar nnes. 
War izemmar ḥed ad yadef ɣar taddart n wenni ijehden maḥend ad ikecceḍ řeqcuɛ nnes, mařa war icarf wenni ijehden amezwar. Xenni izemmar ad ikecceḍ taddart nnes. 
S tidett, Necc ad awem iniɣ belli ad asen ttwaɣfaren i tarwa n bnadem marra ddnub nsen uřa d aceqqef i zi ɣa ceqqfen, 
maca wenni i ɣa iceqqfen di Arruḥ Iqeddsen war ɣares bu weɣfar qaɛ, maca aqa ittwaḥkem xas s řḥukm ittduman.” 
Minzi nitni nnan: “Aqa dayes řaryaḥ amengus.” 
Řexdenni tusa-dd yemmas d aytmas, bedden barra i taddart, ssekken-dd ɣares, řaɣan as-dd maḥend ad ɣarsen dd-yas. 
Uca řɣaci qqimen nnḍen as-dd, nnan as: “Xzar, yemmac d aytmac aqa aten di barra, arezzun xak.” 
Yarra-dd xasen, inna: “Man ten i iǧan d yemma u man yen i iǧan d aytma?” 
Uca umi ixzar ɣar yinni ɣares iqqimen, inna: “Xzar, aqa yemma d aytma, 
minzi wenni itteggen min ixs AREBBI d netta d uma d učma d yemma.” 
