﻿Matta.
27.
Ɣar ṣṣbeḥ zic, aqa marra imeqqranen n ikehhanen d imɣaren n řgens mcawaren x Yasuɛ, mammec i t ɣa nɣen. 
Uca nitni carfen t, iwyen t uca sellmen t i lɛamil Arumani, qqaren as Pilaṭus. 
Umi iẓra Yahuda, aɣeddar, belli Yasuɛ ittwaḥkem, indem, uca yarra-dd třatin n řweznat n nnuqart ɣar imeqqranen n ikehhanen d imɣaren n řgens. 
Inna: “Necc xḍiɣ, aqa ɣdareɣ idammen imezdagen.” Maca nitni nnan: “Min d aneɣ iruḥen? Xzar-dd cek.” 
Awarni řami inḍar řweznat n nnuqart di Zzawect Tameqqrant, iffeɣ uca iruḥ, yuyeř ixef nnes. 
Imeqqranen n ikehhanen ksin řweznat n nnuqart, nnan: “War icuwwar ad ten nessars deg wexxam n ṣṣdaqi, minzi řweznat nni d ttaman n usizzeř n idammen.” 
Kksen awař jar asen maḥend ad zzayes sɣen iyyar n bu-třaxt, maḥend ad yiři i imeḍřan n ibarraniyyen.    
S uyenni ittwasemma iyyar nni ‘Iyyar n idammen’ ař ass n řexxu. 
Řexdenni ittwakemmeř min ittwannan zeg unabi i innan: “Ksiɣ třatin n řweznat n nnuqart, řqedd n Wenni iɣřan, mixef inni zi tarwa n Israil kksen awař, 
uca necc wciɣ tent i iyyar n bu-třaxt, am mammec i d ayi yumur SIDI.” 
Yasuɛ tuɣa ibedd qibač i lɛamil. Lɛamil isseqsa as, inna: “Ma Cek d Ajeǧid n Wudayen?” Yasuɛ inna as: “Cek aqa tennid t!” 
Uca řami t tehmen imeqqranen n ikehhanen d imɣaren n řgens, yarra-dd s walu. 
Xenni inna as Pilaṭus: “Ma war tesřid mecḥař xak cehhden?” 
Netta war xas dd-yarri uřa s ijj n wawař, ařami iqqim lɛamil ittebhet aṭṭas. 
Tuɣa lɛamil innum yarexxu di kuř řɛid i yijj n umeḥbus i řɣaci, wenni ixsen nitni. 
Tuɣa ɣarsen deg wussan nni ijj n umeḥbus ittwassen, qqaren as Bar-Abbas. 
Řami munen, inna asen Pilaṭus: “Wi texsem ad awem dd-arxuɣ, Bar-Abbas niɣ Yasuɛ wenni umi qqaren Lmasiḥ?” 
Minzi Pilaṭus issen aqa nitni sellmen t zi řeḥsed. 
Am tuɣa lɛamil iqqim x řkursi n řḥukm, tessekk-dd ɣares temɣart nnes, tenna: “Barra ixef nnec zeg Umseggad nni, minzi aqa ass-a ttwaɛeddbeɣ aṭṭas di tarjit inu di ssibbet nnes.” 
Maca imeqqranen n ikehhanen d imɣaren n řgens ssqenɛen řɣaci, ḥima ad ttaren Bar-Abbas u ḥima ad areddǧen Yasuɛ. 
Lɛamil yarra-dd, inna asen: “Man wen zi tnayen-a i texsem ad arxuɣ i kenniw?” Nnan: “Bar-Abbas!” 
Pilaṭus inna asen: “Min ɣa ggeɣ xenni ak-d Yasuɛ umi qqaren Lmasiḥ?” Nnan as marra: “Ṣellb i-t!” 
Inna asen lɛamil: “Man tuɛeffna i igga?” Sɣuyyen s jjehd ktar, nnan: “Ṣellb i-t.” 
Řami iẓra Pilaṭus belli war yiweḍ ɣar walu, mahu ad ikkar uɣuwweɣ, iksi aman, issird ifassen nnes qibač i řɣaci, inna: “Necc war tturseɣ ca deg idammen n Umseggad-a, xzarem kenniw!” 
Řgens marra yarra-dd, inna: “Ejj idammen nnes ad xaneɣ iřin u x tarwa nneɣ.” 
Xenni yarxu asen-dd i Bar-Abbas, maca awarni řami ihettek Yasuɛ s urekkuḍ, isellem i-t ḥima ad ittwaṣelleb. 
Řexdenni iwyen iɛeskariyyen n lɛamil Yasuɛ ɣar Taddart n Ccraɛ, umi qqaren ‘Prituriyum’, uca ssmunen xas marra řkumpaniyyet n řɛeskar. 
Kksen as-dd arruḍ, uca arḍen as ijj n ujeǧab d azeggʷaɣ. 
Nitni muden as ijj n ttaj s isennanen, ssarsen t x uzeǧif nnes uca ggin as ijj n uɣanim deg ufus nnes afusi, xenni wḍan ɣar iḍaren nnes zzates, qqimen ttbuṣaren xas, nnan: “Azul xak, a Cek, a Ajeǧid n Wudayen!” 
Ssusfen as x uɣembub nnes, ksin aɣanim uca wtin t zzayes ɣar uzeǧif. 
Awarni řami t deǧen, ksin xas aseřham, arḍen as arruḍ nnes uca nedhen t, maḥend ad t ṣellben. 
Am ffɣen ɣar barra n tendint, ufin ijj n weryaz zi Qayrawan, qqaren as Cimɛun, uca ziyyaren xas ḥima ad yarbu ṣṣalib nnes. 
Ařami iwḍen ɣar wemcan umi qqaren ‘Juljuta’, min ixs ad yini ‘Taceqquft’, 
wcin as řxeǧ ixeǧḍen s tarzugi uca umi t iqqas, yugi ad isu. 
Awarni řami t ṣellben, bḍan arruḍ nnes jar asen umi xas ggin akeccuḍ, 
am qqimen dinni, ttɛessan xas. 
Ggin as sennej i uzeǧif nnes ict n tira mayemmi xas ḥekmen s řmewt: ‘Wa d Yasuɛ, Ajeǧid n Wudayen.’ 
Xenni ṣellben akides tnayen n ixewwanen, ijjen ɣar ufusi nnes u ijjen ɣar uzeřmaḍ nnes. 
Inni tuɣa ittekkan, ttceqqafen dayes, tthezzan azeǧif nsen, 
nnan: “A Cek, wenni ihedmen Zzawect Tameqqrant u di třata n wussan ad tt tebnid ɛawed, senjem Ixef nnec. Mařa Cek d Mmis n AREBBI, hwa-dd xenni zi ṣṣalib.” 
Uřa d imeqqranen n ikehhanen ak-d imseřmaden n idlisen d imɣaren n řgens d Ifarisiyyen stehzan zzayes amenni, nnan: 
“Issenjem inneɣni maca war izemmar ad issenjem xef nnes. Mařa Netta d Ajeǧid n Israil, ejj i-t ad dd-ihwa zi ṣṣalib, ad zzayes namen. 
Ittceř x AREBBI. Ejj i-t Netta ad t issenjem mařa yarḍa xas, minzi inna: ‘Necc d Mmis n AREBBI’.” 
Uřa d ixewwanen, inni tuɣa ittwaṣellben akides, tuɣa ssfeṭṭaḥen zzayes amenni. 
Zi tsaɛɛet wiss setta, aqa-tt d ḍḍhur, tewḍa-dd taǧest x marra tammurt ař tasaɛɛet wiss tesɛa, aqa-tt d třata n uɛecci. 
Jjwayeh n tsaɛɛet wiss tesɛa isɣuy Yasuɛ s tmijja ijehden, inna: “A AREBBI inu, a AREBBI inu, mayemmi dayi tsemḥed?”    
Řami d as sřan inni din ibedden, nnan ca zzaysen: “Ittřaɣa x Iliya.” 
Deɣya yuzzeř-dd ɣares ijjen zzaysen, iksi spunxa, issuff i-tt s řxeǧ, igga i-tt x ijj n uɣanim uca iwca as ad isu. 
Inneɣni nnan: “Ejj i-t, ad nẓar, ma ad dd-yas Iliya ḥima ad t issenjem.” 
Isɣuyy Yasuɛ ɛawed s tmijja ijehden uca issarxu Arruḥ nnes. 
Xzar, ařeḥḥaf n wadaf ɣar Zzawect Tameqqrant ittwacarreg x tnayen zi sennej ař swadday, tammurt tenhezz, tiṣuḍar feǧqent,    
imeḍřan ttwarezmen uca aṭṭas n arrimat n imqeddasen inni tuɣa iṭṭṣen din, ttwassnekkarent-dd. 
Nitni ffɣen zeg imeḍřan, uca awarni i tnukra nnes udfen ɣar tendint iqeddsen uca banen-dd i waṭṭas. 
Řami řqebṭan x mya d yinni tuɣa akides iḥeṭṭan Yasuɛ, ẓrin anhezzi n temmurt d min imsaren, ggʷeden aṭṭas, nnan: “S tidett tuɣa Wa d Mmis n AREBBI.” 
Tuɣa din aṭṭas n temɣarin tinni tuɣa ixezzaren zi řaggʷaj, ḍfarent Yasuɛ zi Ljalil ḥima ad xas sexxarent. 
Jarasent Maryam n Majdala d Maryam, yemmas n Yaɛqub d Yasi, d yemmas n ayt n Zabdi. 
Řami dd-tiweḍ tmeddit, yusa-dd ijj n weryaz zi Ramta, qqaren as Yusuf. Netta tuɣa ɛawed d ameḥḍar n Yasuɛ. 
Iruḥ ɣar Pilaṭus, ittar as arrimet n Yasuɛ. Řexdenni iweṣṣa Pilaṭus, maḥend ad as wcen arrimet 
Yusuf iksi arrimet inneḍ i-tt deg ict n txeyyaḍt n řeqṭen azdad iṣfan, 
issars i-tt deg ijj n wenḍeř n jdid i tuɣa iɣza, uca awarni řami isseqnunni ict n teṣḍart ḥima ad iqfeř tawwart n wenḍeř, iruḥ. 
Tuɣa din Maryam n Majdala d Maryam nneɣnit qqiment qibač i wenḍeř. 
Tiwecca nnes awarni ass n Usewjed, munen imeqqranen n ikehhanen d Ifarisiyyen ɣar Pilaṭus, 
nnan: “A siditneɣ, neɛqeř belli aɣeccac-a, am tuɣa ɛad iddar, inna: ‘Awarni třata n wussan ad kkareɣ!’ 
S uya umur, ḥima ad ḍemnen anḍeř ař ass wiss třata, ḥima ad taɣ imeḥḍaren nnes war dd-ttisen s ǧiřet ad t acaren, xenni ad inin i řgens, aqa ikkar-dd zi taddart n imettinen, uca ammu i ɣa yiři uweddar aneggaru ktar x umezwar.” 
Inna asen Pilaṭus: “Aqa ɣarwem iɛessasen, ruḥem, ḍemnen t am mammec tᵉttwařam.” 
Ruḥen ḥima ad ɛessen x wenḍeř uca ḍemnen aẓru, nitni jmiɛ ak-d iɛessasen. 
