﻿Matta.
26.
Awarni řami ikemmeř Yasuɛ awařen-a, inna i imeḥḍaren nnes: 
“Tessnem belli awarni tnayen n wussan ad tiři Řɛid n Tɣarṣt n Useɛdu u řexdenni ad immewc Mmis n bnadem, ḥima ad ittwaṣelleb.” 
Řexdenni munen imeqqranen n ikehhanen d imseřmaden n idlisen d imɣaren n řgens di řemraḥ n arrays n ikehhanen, wenni umi qqaren Qayafa, 
uca mcawaren mammec ɣa ṭṭfen Yasuɛ s teḥraymect uca ad t nɣen, 
nnan: “War ittiři di Řɛid ḥima war ittekkar uɣewweɣ di řgens.” 
Řami tuɣa Yasuɛ di Bayt-Ɛanya, di taddart n Cimɛun, wenni di iǧa řbarṣ, 
tusa-dd ɣares ict n temɣart s ijj n uɣarraf n alabaster iccur s zzect iɣřan i wedhan, uca tfarreɣ i-tt x uzeǧif nnes am iqqim Yasuɛ ɣar ṭṭabřa. 
Umi ẓrin imeḥḍaren man aya, iqqes asen řḥař aṭṭas, nnan: “Min umi teǧa txessart-a? 
Tuɣa izemmar ad temmenz zzect-a n wedhan s ttaman d ameqqran, uca xenni ad temmewc i imezřaḍ.” 
Maca Yasuɛ tuɣa issen man aya, inna: “Mayemmi tziyyarem x temɣart-a, minzi nettat tegga ayi ict n řxedmet teṣbeḥ. 
Minzi imezřaḍ aqa aten řebda akidwem, maca Necc war kiwem ttiřiɣ i řebda. 
Minzi nettat, mařa tfarreɣ-dd zzect-a i wedhan x arrimet inu, aqa tegga man aya i usewjed n wenḍeř inu. 
S tidett, Necc ad awem iniɣ: Mani ma i ɣa ittwabarreḥ zi Řexbar-a Aṣebḥan xafi di marra ddunect, ad ssiwřen ɛawed x min dayi tegga, d řiḍaret i nettat.” 
Řexdenni iřuḥ ijjen zi tenɛac, qqaren as Yahuda Isxariyuṭi, ɣar imeqqranen n ikehhanen, 
inna: “Min d ayi ɣa tewcem maḥend ad awem sellmeɣ Yasuɛ?” Uca waɛden t s třatin n řweznat n nnuqart. 
Ssenni tuɣa yarezzu ict n tewwart ḥima ad t isellem. 
Deg wass amezwaru n Weɣrum břa Antun, usin-dd imeḥḍaren ɣar Yasuɛ, nnan: “Mani texsed ad nessewjed i Cek maḥend ad tecced amensi n Useɛdu?” 
Inna asen: “Uyurem ɣar tendint ɣar ijj n fřan, inim as: ‘Amseřmad nneɣ iqqar: Aqa řweqt inu tiweḍ-dd, ad ɣarek ggeɣ amensi n Useɛdu ak-d imeḥḍaren inu.’” 
Imeḥḍaren ggin am mammec ten iweṣṣa Yasuɛ uca ssewjden i umensi n Useɛdu. 
Řami dd-tiweḍ tmeddit, iqqim ɣar umensi ak-d tenɛac n imeḥḍaren nnes. 
Am ttᵉtten nitni, inna: “S tidett, Necc ad awem iniɣ, ijjen zzaywem ad ayi iɣdar.” 
Nitni dewřen ceḍnen aṭṭas uca kuř ijjen zzaysen ibda ad as yini: “Ma war iǧi d necc, a Sidi?” 
Yarra-dd xasen, inna: “Wenni issisnen afus akidi di ṭṭebṣi d netta i d ayi ɣa iɣdaren. 
Mmis n bnadem ad iraḥ am mammec xas tura, maca uct x bnadem nni i ɣa iɣdaren Mmis n bnadem. Iḥřa as i bnadem nni war dd-ixřiq ɛemmarṣ.” 
Yahuda, aɣeddar, yarra-dd, inna: “Ma war iǧi d necc, a Amseřmad inu?” Netta inna as: “Aqa cek tennid t.” 
Am tuɣa ttᵉtten, iksi Yasuɛ aɣrum u awarni řami ibarek, yarẓa i-t, iwca i-t i imeḥḍaren, inna: “Ksim, ccem, ta d Arrimet inu.” 
Iksi řkas, iqada uca iwca asen t, inna: “Swem zzayes marra idwem, 
minzi wa d Idammen inu n Řɛahd n Jdid inni i ɣa ittwassizřen i weɣfar n ddnub. 
Necc ad awem iniɣ, zi řexxu tsawent war sesseɣ ɛad zi řɣiǧet n tzayart ař ass i di tt ɣa sweɣ zi jdid akidwem di Tgeldit n Baba.” 
U awarni řami ɣennjen izři n ttesbiḥ, ffɣen ɣar wedrar n Zzitun. 
Xenni inna asen Yasuɛ: “Marra kenniw ad dayi tenderfem di ǧiřet-a, minzi aqa tura: ‘Ad wteɣ Ameksaw, uca iḥuřiyyen n tḥimart ad ttwazuzzaren.’ 
Maca awarni řami i dd ɣa ttwassnekkareɣ, ad awem izwareɣ ɣar Ljalil.” 
Maca Buṭrus yarra-dd, inna as: “Mařa dayek i ɣa nderfen marra, necc war dayek ttendrifeɣ ca ɛemmarṣ!” 
Inna as Yasuɛ: “S tidett, Necc ad ac iniɣ, di ǧiřet-a, qbeř i ɣa issquqeɛ uyaẓiḍ, ad ayi tenkared třata n twařawin.” 
Buṭrus inna as: “Waxxa tuɣa ittxeṣṣa ayi ad mmteɣ akidek, necc war Cek nekkareɣ ɛemmarṣ.” Ammu i nnan marra imeḥḍaren ɛawed. 
Řexdenni iruḥ Yasuɛ akidsen ɣar ijj n wemcan qqaren as Xitsimaniy, inna i imeḥḍaren nnes: “Qqimem danita, am i ɣa ẓẓaǧeɣ din.” 
Am kis yiwi Buṭrus d tnayen n iḥenjiren n Zabdi, ibda ittnexřaɛ, iggʷed aṭṭas. 
Xenni inna asen: “Řeɛmar inu issḥissif aṭṭas ař řmewt. Qqimem da, ḥḍam akidi.” 
Xenni iɛzeř cwayt ktar, iwḍa x uɣembub nnes, ittẓaǧa, inna: “A Baba, mařa iɛeddeř, ejj ad xafi iɛdu řkas-a! Maca war ittiři am mammec xseɣ Necc, maca am mammec texsed Cek.” 
Řexdenni idweř-dd ɣar imeḥḍaren nnes uca yufa i-ten ṭṭṣen. Inna i Buṭrus: “Ma war tzemmarem ad kidi teḥḍam uřa d ict n tsaɛɛet? 
Ḥḍam, ẓẓaǧem, ḥima war dd-tᵉttidfem deg ujarreb. Arruḥ aqa iwjed, maca ddat teḍɛef.” 
Yuyur ɛawed i umur wiss tnayen uca iẓẓuǧ, inna: “A Baba, mařa řkas-a war izemmar ad xafi yekk mɣir mařa Necc swiɣ t, aqa ad yiři min texsed Cek!” 
Řami dd-idweř, yufa i-ten ɛawed ṭṭṣen, minzi tiṭṭawin nsen tuɣa ḍeqqřent. 
Ijja i-ten, yuyur ɛawed uca iẓẓuǧ i twařa wiss třata, iqqar awařen-a ɛawed. 
Řexdenni idweř-dd ɣar imeḥḍaren nnes, inna asen: “Kemmřem x yiḍeṣ nwem řexxu, areyyḥem. Xzarem, aqa tsaɛɛet tiweḍ-dd aqa Mmis n bnadem ad immewc deg ifassen n imednab. 
Kkarem, ad nraḥ. Xzarem, wenni d ayi ɣa iɣdaren, yudes-dd.” 
Am tuɣa issawař ɛad, yusa-dd Yahuda, aɣeddar, ijjen zi tenɛac, ak-d ijj n řɣaci ameqqran s řesyuf d iɛumad, usin-dd zeg imeqqranen n ikehhanen d imɣaren n řgens. 
Yahuda, aɣeddar, aqa iwca asen ict n řeɛřamet, inna: “Wenni i ɣa ssudmeɣ d wenni Netta, ṭṭfem t.” 
Řexdenni dd-iqarreb ɣar Yasuɛ, inna: “Sřam xak, a Amseřmad inu!”, uca issudem i-t. 
Xas uca Yasuɛ inna as: “A ameddukkeř inu, min xef dd-tusid da?” Řexdenni qarrben-dd ɣares, ḥarten x Yasuɛ uca ṭṭfen t. 
U xzar, ijjen zeg inni iǧan ak-d Yasuɛ, isswiẓẓeḍ afus nnes, ijbed ssif uca iwta amsexxar n arrays n ikehhanen, iqess as amezzuɣ. 
Xenni inna as Yasuɛ: “Arr ssif ɣar wemcan nnes, minzi marra inni ikessin ssif ad mmten s ssif. 
Niɣ ittɣiř ac belli Necc war zemmareɣ ad ẓẓaǧeɣ i Baba, aqa Netta ad d ayi dd-issekk řexxu ktar zi tenɛac n ilixiyunen n lmalakat? 
Mammec xenni i ɣa ttwakemmřent Tira Iqeddsen i iqqaren belli ittxeṣṣa ad imsar ammu?” 
Di tsaɛɛet nni ɛawed issiweř Yasuɛ ak-d řɣaci: “Axmi x ijj n uqṭaṭɛiy i dd-teffɣem s řesyuf d iɛumad maḥend ad ayi tᵉṭṭfem. Kuř ass tuɣa qqimeɣ ɣarwem, sseřmadeɣ di Zzawect Tameqqrant, war dayi tᵉṭṭifem. 
Maca man aya marra imsar, ḥima ad ttwakemmřent Tira n inabiyyen.” Řexdenni semḥen dayes marra imeḥḍaren uca arewřen. 
Inni iṭṭfen Yasuɛ, iwyen t ɣar Qayafa, arrays n ikehhanen, wenni ɣar tuɣa munen imseřmaden n idlisen d imɣaren n řgens. 
Cimɛun Buṭrus iḍfar i-t-i-dd zi řaggʷaj ařami d yiweḍ ɣar řemraḥ n arrays n ikehhanen u řami yudef, iqqim jar iɛessasen ḥima ad iẓar mammec i ɣa teffeɣ. 
Imeqqranen n ikehhanen d imɣaren n řgens u marra Jmaɛet Tameqqrant, tuɣa arezzun icehhaden issxarriqen x Yasuɛ, maḥend ad t nɣen. 
Maca war zemmaren ad tt afen, waxxa usin-dd aṭṭas n řechud issxarriqen. Ɣar uneggar usin-dd tnayen 
i innan: “Wa aqa inna: ‘Necc zemmareɣ ad hedmeɣ Zzawect Tameqqrant n AREBBI u di třata n wussan ad tt bniɣ ɛawed.’” 
Arrays n ikehhanen ikkar-dd, inna as: “Ma war dd-tarrid s walu? Min xak cehhden ina?” 
Maca Yasuɛ isqar. Inna as arrays n ikehhanen: “Necc ad Cek jjeɣ ad tejjaǧed s AREBBI iddaren, belli Cek ad aneɣ tinid, ma xenni Cek d Lmasiḥ, Mmis n AREBBI?” 
Inna as Yasuɛ: “Cek tennid t. Maca Necc ad awem iniɣ: ‘Zi ssa tsawent ad tẓarem Mmis n bnadem iqqim x ufusi n jjehd xmi dd ɣa yas x iseynuten n ujenna.” 
Řexdenni icarreg arrays n ikehhanen arruḍ nnes, inna: “Netta aqa iceqqef di AREBBI, mayemmi neḥdaj ɛad řechud? Xzarem, řexxu aqa tesřim i uceqqef nnes. 
Min d awem ittɣiř kenniw?” Nitni arrin-dd xas, nnan: “Netta isdaheǧ řmewt.” 
Xenni bdan ssusufen as x uɣembub, ccaten t s řpuniyyat x uzeǧif u inneɣni wtin t ɛawed, 
nnan: “Nabb aneɣ, a Cek, Lmasiḥ, wi Cek iwtin?” 
Buṭrus iqqim ɣar barra di řemraḥ. Tqarreb-dd ɣares ict n tayya, tenna: “Uřa d cek tuɣa cek ak-d Yasuɛ, zi Nnaṣira.”    
Maca netta inkar zzat i marra, inna: “War ssineɣ min xef tessawařed.” 
Am iggur ɣar usqif n tewwart, teẓra i-t ict n tayya nneɣni, tenna asen i yinni din iqqimen: “Uřa d wa tuɣa ak-d Yasuɛ zi Nnaṣira.” 
Netta inkar ɛawed s ict n tjaǧit, inna: “War ssineɣ Bnadem nni.” 
Cwayt ɣar zzat qarrben-dd inni din ibedden ɣar Buṭrus, nnan: “Nican, uřa d cek d ijjen zzaysen, minzi řhard nnec issbeyyen i cek.” 
Xenni ibda ineɛɛeř, ittjjaǧa: “Necc war ssineɣ Bnadem nni.” Řexdenni issquqeɛ uyaẓiḍ 
uca iɛqeř Buṭrus awař i d as inna Yasuɛ: “Qbeř i ɣa issquqeɛ uyaẓiḍ, ad ayi tenkared třata n twařawin.” Uca iffeɣ, iru s imeṭṭawen imerzagen. 
