﻿Matta.
16.
Usin-dd ɣares Ifarisiyyen d Iṣaduqiyyen, sseqsan t ḥima ad t jarrben, maḥend ad asen isscen ca n řeɛřamet zeg ujenna. 
Maca Netta yarra-dd, inna asen: “Ɣar tmeddit ad tinim: ‘Aqa řḥař iffeɣ!’, minzi ajenna d azeggʷaɣ. 
U ɣar řefjar ad tinim: ‘Aqa ass-a ad isuḍ usemmiḍ!’, minzi ajenna d azeggʷaɣ ař abarcan. A imnafqen, kenniw tessnem ad tfarzem udem n ujenna, maca řeɛřamat n zzman-a war tzemmarem ad tent tfarzem. 
Jjiř aɛeffan izennan yarezzu ict n řeɛřamet, maca war d as ittmewci uřa d ict n řeɛřamet mɣir řeɛřamet n Yunus, anabi!” Xenni ijja i-ten, iruḥ. 
Řami dd-iwḍen imeḥḍaren nnes ɣar ujemmaḍ n řebḥar, ttun ad kisen dd-awyen aɣrum. 
Inna asen Yasuɛ: “Ḥḍam ixef nwem zeg wentun n Ifarisiyyen d Iṣaduqiyyen.” 
Nitni mcawaren jar asen x man aya, nnan: “Aqa inna man aya minzi war d niwi ca aɣrum!” 
Yasuɛ, am tuɣa issen man aya, inna asen: “A kenniw i di iǧa drus n l’iman, mayemmi temcawarem jar awem aqa man aya iǧa umi war dd-tiwyem aɣrum? 
Ma ɛad war tefhimem ca? Ma war teɛqiřem ca x xemsa n iřeqqwaz n weɣrum i xemsa-ařaf, u mecḥař n tsuǧatin i tyarwem? 
Niɣ x sebɛa n iřeqqwaz n weɣrum i arebɛa ařaf, u mecḥař n tsuǧatin i tyarwem? 
Ma ɛad war tefhimen ca belli Necc war kiwem ssiwřeɣ ca x weɣrum umi d awem nniɣ: ‘Ḥḍam ixef nwem zeg wentun n Ifarisiyyen d Iṣaduqiyyen’?” 
Ssenni fehmen aqa Netta war d asen inni, maḥend ad ḥḍan ixef nsen zeg wentun n weɣrum, maca zi tɣuri n Ifarisiyyen d Iṣaduqiyyen. 
Řami dd-yiweḍ Yasuɛ ɣar temmurt n Qayṣariya-Filippus, isseqsa imeḥḍaren nnes: “Min ɛniɣ Necc, Mmis n bnadem, ɛlaḥsab min qqaren iwdan?” 
Nnan as: “Ca qqaren ‘D Yuḥanna Amseɣḍaṣ’, u wenneɣni: ‘D Iliya’, u wenneɣni ɛawed: ‘D Irmiya’ niɣ ‘D ijjen zeg inabiyyen’.” 
Inna asen: “Maca kenniw, min xafi teqqarem?” 
Yarra-dd xas Cimɛun Buṭrus, inna: “Cek d Lmasiḥ, Mmis n AREBBI iddaren.” 
Yarra-dd xas Yasuɛ, inna as: “Sseɛd nnec, a Cimɛun, mmis n Yuna, minzi war iǧi d aysum niɣ d idammen i d ac imřen man aya, maca d Baba i iǧan deg ijenwan. 
Ɛawed Necc ad ac iniɣ, aqa cek d ‘Buṭrus’, d aẓru, u x weẓru-ya ad bniɣ tamesmunt inu uca tiwwura n řaxart war d as zemmarent. 
D Necc ad ac wceɣ tisarutin n Tgeldit n ijenwan, u marra min ɣa tcedded di temmurt, ad yiři icedd deg ijenwan, u marra min ɣa tfesyed di temmurt, ad yiři ifsi deg ijenwan.” 
Řexdenni yumur imeḥḍaren nnes, ḥima war xebbaren ḥed belli Netta d Lmasiḥ. 
Ssenni ibda Yasuɛ ad isscen i imeḥḍaren nnes belli ittxeṣṣa as ad iraḥ ɣar Urcalim, ad iweddeb aṭṭas zeg imɣaren n řgens u zeg imeqqranen n ikehhanen d imseřmaden n idlisen, ad ittwaneɣ uca ad dd-ittwassnekkar deg wass wiss třata. 
Maca Buṭrus yiwyi t weḥḥdes, ibda ittwebbex i-t, inna: “War ittiři, a Sidi! Man aya war d ac ittemsar ɛemmarṣ.” 
Maca Netta inneqřeb, inna i Buṭrus: “Ffeɣ xafi, a cciṭan, cek d ict n tɛenkrift i Necc, minzi war cek icqi min iǧan n AREBBI, maca min iǧan n iwdan.” 
Řexdenni inna Yasuɛ i imeḥḍaren nnes: “Mařa ca n ijjen ixs ad ayi iḍfar, ad inkar ixef nnes, ad iksi ṣṣalib nnes uca ad ayi iḍfar. 
Minzi wenni ixsen ad issenjem tudart nnes, ad tt iweddar, maca wenni i ɣa iweddaren tudart nnes di ṭṭweɛ inu ad tt yaf. 
Minzi man řefḍeř i ɣares ɣar bnadem mařa yarbeḥ ddunect marra, maca iřqef i-t druct di řeɛmar nnes? Niɣ min ɣa iwc bnadem i weṣřaḥ n řeɛmar nnes? 
Minzi Mmis n bnadem ad dd-yas s uɛuǧi n Babas ak-d lmalakat nnes, uca xenni ad ixeǧeṣ kuř ijjen ɛlaḥsab min igga. 
S tidett Necc ad awem iniɣ, aqa ca zeg ina i da ibedden, war ttqisin ca řmewt ař ɣa ẓaren Mmis n bnadem ittas-dd di Tgeldit nnes.” 
