﻿Matta.
15.
Řexdenni usin-dd imseřmaden n idlisen d Ifarisiyyen zi Urcalim ɣar Yasuɛ, nnan: 
“Mayemmi ttɛeddan imeḥḍaren nnec x tubbart n imɣaren nneɣ. Nitni war ssiriden ca ifassen nsen qbeř i ɣa ccen aɣrum!” 
Yarra-dd Yasuɛ, inna asen: “Mayemmi kenniw ɛawed tᵉttɛeddam x tewṣeyyet n AREBBI zi ssibbet n tubbart nwem? 
Minzi AREBBI tuɣa inna: ‘Weqqar babac d yemmac!’ u: ‘Wenni i ɣa ixzan babas niɣ yemmas, ittxeṣṣa as ad immet!’ 
Maca kenniw teqqarem: ‘Marra wi ɣa yinin i babas niɣ i yemmas: Marra min tzemmarem ad zzayi tnefɛem, aqa ggiɣ t d tawhibt i Arebbi! Ammu netta war iḥdij ɛad ad iweqqar babas niɣ yemmas s marra man aya!’ 
Ammu tbeṭṭřem awař n AREBBI di ṭṭweɛ n tubbart nwem. 
Kenniw, a imnafqen! Icaɛya tuɣa ittnabba xawem s ṣṣeḥ, inna: 
‘Řgens-a ittcenneɛ ayi s iyencicen nsen, maca uř nsen iggʷej xafi. 
Aqa nitni cennɛen ayi baṭeř, minzi nitni sseřmaden tiɣuriwin nni iǧan d tiweṣṣa n iwdan.’” 
Řami d iřaɣa-dd x řɣaci ɣares, inna asen: “Sřem mliḥ, fehmem! 
War iǧi min ittadfen deg uqemmum issexmej bnadem, maca min i dd-itteffɣen zeg uqemmum d man aya i issexmajen bnadem.” 
Řexdenni usin-dd ɣares imeḥḍaren nnes, nnan as: “Ma tessned belli Ifarisiyyen nderfen di man aya, řami t sřin?” 
Maca Netta yarra-dd, inna asen: “Kuř aɣeddu, war t iẓẓu Baba, wenni iǧan deg ijenwan, ad ittwaqřeɛ. 
Ejj i-ten! Nitni d idarɣařen neddhen idarɣařen. Mařa adarɣař ineddeh adarɣař, ad wḍan s tnayen idsen deg weḥfur.” 
Yarra-dd Cimɛun Buṭrus, inna as: “A Sidi, fessar aneɣ amedya-ya!” 
Maca Yasuɛ inna asen: “Ma kenniw ɛad břa řefhamet ař řexxu? 
Ma war tefhimem ca belli marra min ɣa yadfen deg uqemmum, ad iraḥ ɣar uɛeddis uca ssenni ad ittwassuffeɣ barra i usizdeg? 
Maca min i dd-itteffɣen zeg uqemmum ittas-dd zeg wuř, aqa d man aya i issxemmajen bnadem. 
Minzi zeg wuř n iwdan i dd-tteffɣen ixarriṣen iɛeffanen, zzina, anɣay, farq-ccɣeř, tuceffra, cchadat s ẓur d uceqqef. 
Aqa d man aya min issxemmajen bnadem, maca macca s ifassen war issirden war tessxemmij ca bnadem.” 
Řexdenni iffeɣ-dd Yasuɛ ssenni, iruḥ ɣar jjwayeh n Ṣur d Ṣaydun. 
U xzar, ict n temɣart zeg ayt n Kenɛan zi jjwayeh nni tesɣuy, tenna: “A Sidi, a Mmis n Dawud, arḥem ayi! Yeǧi aqa dayes cciṭan issnexřaɛen.” 
Maca Netta war xas dd-yarri ca, uřa s yijj n wawař. Usin-dd ɣares imeḥḍaren nnes, ttaren zzayes, nnan: “Aẓẓeř xas, minzi nettat teḍfar aneɣ-dd s iɣuyyan.” 
Netta yarra-dd, inna asen: “Necc ttwassekkeɣ-dd ɣar wuǧi iweddaren n taddart n Israil waha.” 
Maca nettat tusa-dd, tesjed as, tenna: “A Sidi, ɛawen ayi!” 
Maca Netta yarra-dd, inna: “War iɛeddeř ad immeksi weɣrum n iḥenjiren, maḥend ad immenḍar i yiṭan.” 
Maca nettat tenna: “Wah, a Sidi, maɣar uřa d iṭan ttᵉtten iřeqqwaz i dd-iweṭṭan zi ṭṭabřa n siditsen uca ttɣiman ddaren.” 
Řexdenni inna as Yasuɛ: “A tamɣart, l’iman nnem imɣar! Ad yiři am mammec řxaḍar nnem.” Uca yeǧis teggenfa di tsaɛɛet nni. 
Uca yuyur Yasuɛ ssenni, yiweḍ-dd ɣar tma n řebḥar n Ljalil, igeɛɛed ɣar wedrar, iqqim dinni. 
Yusa-dd ɣares ijj n ubarru ameqqran n řɣaci, iwyen-dd akidsen ineɛḍaben d idarɣařen d ignawen d iqejdaḥen d inneɣni aṭṭas, ssarsen ten ɣar iḍaren n Yasuɛ uca issgenfa ten, 
ařami itebhet řɣaci, aqa ẓrin ignawen ssawařen, iqejdaḥen ggenfan, ineɛḍaben gguren, idarɣařen ttwařan, uca ssɛuǧen AREBBI n Israil. 
Yasuɛ iřaɣa-dd x imeḥḍaren nnes, inna asen: “Ḥinneɣ x řɣaci minzi qqimen akidi třata n wussan, war ɣarsen min ɣa ccen. War xseɣ ca ad ten ssqebbḍeɣ ttẓuman, ḥima war tteḍɛifen ca deg webrid.” 
Nnan as imeḥḍaren nnes: “Manis d ɣa nawi aɣrum di řexřa-ya i zi ɣa nessecc ijj n řɣaci d ameqqran am wanita?” 
Inna asen Yasuɛ: “Mecḥař ɣarwem d aɣrum?” Nnan as: “Sebɛa n tecnifin d ca n iseřman imeẓyanen.” 
Xenni yumur řɣaci, ḥima ad qqimen di temmurt. 
Iksi sebɛa n tecnifin d iseřman nni, iqada, yarẓa i-tent uca iwca i-tent i imeḥḍaren nnes uca imeḥḍaren wcin tent i iwdan. 
Marra ccin, jjiwnen. Xenni yarwen-dd iřeqqwaz iceṭṭen: tuɣa din sebɛa n tsuǧatin ɛemmarent. 
Inni tuɣa iccen aqa aten di arebɛa ařaf n yeryazen břa timɣarin d iḥenjiren. 
Awarni řami issqebbeḍ řɣaci, inya deg uɣarrabu uca yiweḍ ɣar weymir n jjwayeh n Magdu. 
