﻿Matta.
12.
Di řweqt nni icuq Yasuɛ deg iyyaren n zzariɛet n imendi di ssebt. Tuɣa imeḥḍaren nnes ǧuẓen uca bdan řeqqḍen tidrin, ccin zzaysent. 
Ařami ten ẓrin Ifarisiyyen, nnan as: “Xzar imeḥḍaren nnec tteggen min war iɛeddřen di ssebt!” 
Yarra-dd xasen: “Ma war teɣřim ca min igga Dawud umi iǧuẓ netta d yinni akides? 
Mammec yudef ɣar Taddart n AREBBI, icca aɣrum n wescan zi Tzewḍa n SIDI i war iḥeǧřen macca nnes i netta uřa i yinni akides, maca mɣir i ikehhanen waha. 
Niɣ war teɣrim ca di Ccariɛa belli ikehhanen inni iǧan di Zzawect Tameqqrant di ssebt, xeṭṭan di tewṣiyyet n ssebt, waxxa amenni war xasen ibin řɛib? 
Necc ad awem iniɣ, wenni iǧan d ameqqran x Zzawect Tameqqrant, aqa-t danita! 
Maca mařa tuɣa tfehmen min ixs ad yini: ‘Necc xseɣ arreḥmet, war iǧi d taɣarṣt!’, xenni ad tiři war tᵉttḥasabem ca x imezdagen, 
minzi Mmis n bnadem d Bab n ssebt.” 
Yasuɛ yuyur ssenni, yudef ɣar temzida nsen. 
Tuɣa din ijj n weryaz, afus nnes iqucceḥ. Sseqsan t maḥend zemmaren ad zzayes cettcan, nnan: “Ma iɛeddeř usgenfi di ssebt?” 
Inna asen: “Man bnadem i dinni jar awem wenni ɣar iǧa izmar i iwḍan di tesraft di ssebt, war t itteṭṭef, ḥima ad t-i-dd issuffeɣ? 
Mecḥař iɛdu bnadem x izmar! S uyenni iɛeddeř ad ittwagg min iṣebḥen di ssebt.” 
Řexdenni inna as i bnadem nni: “Swiẓẓeḍ afus nnec!” Isswiẓẓeḍ afus nnes uca idweř iggenfa am wenneɣni. 
Ifarisiyyen ffɣen-dd ɣar barra, mcawaren xas, mammec ɣa ggen ad t nɣen. 
Maca Yasuɛ issen aya uca yuyur ssenni. Iḍfar i-t-i-dd ijj n řɣaci d ameqqran, issgenfa i-ten marra. 
Yumur i-ten s jjehd maḥend war xas ssuffuɣen řexbar, 
ḥima ad ittwakemmeř wawař i innan unabi Icaɛya: 
“Xzar, Amsexxar inu, wenni farrzeɣ, Amɛizz inu, wenni di ufiɣ arḍa inu. Ad xas ssarseɣ Arruḥ inu u Netta ad ibarreḥ s řḥukm i řegnus. 
War ittemcubbuc, war isɣuyyu, uřa d ijj war ittesři tmijja nnes deg ibriden. 
Aɣanim yarẓen war t yareẓẓi, uřa d taftič idduxxunen, war tt issxessi ař dd ɣa issuffeɣ řeḥkam i ɣa inedhen i uɣelleb, 
uca ad ssitmen řegnus deg Yisem nnes.” 
Řexdenni iwyen as-dd ijj n umeryaḥ, tuɣa-t d adarɣař d aynaw, uca Netta issgenfa i-t, ařami wenni tuɣa iǧan d aynaw d adarɣař idweř issawař u ittwařa. 
Itebhet řɣaci marra, nnan: “Ma Wanita xenni war iǧi d Mmis n Dawud?” 
Maca sřin Ifarisiyyen man aya, nnan: “Wanita issuffuɣ ccwaṭen mɣir s webrid n Bᵉɛalzabub, ameqqran n ccwaṭen.”    
Maca Yasuɛ issen ixarriṣen nsen, inna asen: “Kuř tageldit ittemsebḍan x yixef nnes ad tᵉttwahellek, u kuř taddart niɣ tandint ittemsebḍan x yixef nnes war tᵉttɣimi ca. 
Mařa aqa-t d cciṭan issuffuɣ cciṭan, aqa netta ittemsebḍa x yixef nnes, xenni mammec ɣa teqqim tgeldit nnes? 
Mařa Necc ssuffuɣeɣ ccwaṭen s webrid n Bᵉɛalzabub, s min zi ten i ɣa ssuffɣen tarwa nwem? S uyenni nitni ad iřin d řquḍat xawem. 
Maca mařa Necc ssuffuɣeɣ ccwaṭen s Arruḥ n AREBBI, aqa tudes awem-dd Tgeldit n AREBBI. 
Niɣ mammec izemmar ḥed ad yadef ɣar taddart n wenni ijehden maḥend ad ikecceḍ řeqcuɛ nnes, mařa war icarf wenni ijehden amezwar? Xenni izemmar ad ikecceḍ taddart nnes. 
Wenni war iǧin akidi, aqa-t ḍidd inu, wenni war kidi issmunan, aqa ittzeǧaɛ waha. 
S uyenni ad awem iniɣ: marra ddnub d uceqqef ad ittwaɣfar i iwdan, maca aceqqef di Arruḥ war ittwaɣfar ca i iwdan. 
Wenni i ɣa inin awař d aɛeffan x Mmis n bnadem ad as ittwaɣfar, maca wenni i ɣa inin awař d aɛeffan x Arruḥ Iqeddsen war d as ittwaɣfar ca, uřa di řweqt-a uřa di řweqt i dd ɣa yasen. 
Ḥesbem tacejjart d taṣebḥant uřa d řɣiǧet nnes d taṣebḥant, niɣ ḥesbem tacejjart texsar uřa d řɣiǧet nnes texsar, minzi tacejjart tᵉttwassen zi řɣiǧet nnes.”    
“A tarwa n ifiɣran, mammec ɣa teggem ad tessiwřem x min iṣebḥen, waxxa kenniw d iɛeffanen, minzi zeg uɛemmar n wuř ad issiweř uqemmum. 
Bnadem aṣebḥan issuffuɣ-dd min iṣebḥen zi řkenz aṣebḥan n wuř nnes uca bnadem aɛeffan issuffuɣ-dd zi řkenz aɛeffan nnes min iɛeffnen. 
Maca Necc ad awem iniɣ, belli kuř awař ixwan ad zzayes ssiwřen iwdan, ad zzayes ttwaḥasben deg wass n lḥisab. 
Minzi s wawařen nnec ad tᵉttwaseggded uca s wawařen nnec ad tᵉttwaḥasbed.” 
Ca n imseřmaden n idlisen d Ifarisiyyen, arrin-dd xas: “A Amseɣɣar, neccin nexs ad nẓar ict n řeɛřamet zzayek.” 
Maca Netta yarra-dd xasen: “Jjiř aɛeffan izennan ittettar ict n řeɛřamet, war d as ittmewci uřa d ict n řeɛřamet mɣir řeɛřamet n Yunus. 
Minzi am mammec tuɣa Yunus třata n wussan jar ǧyaři d wussan deg uɛeddis n wesřem, ammu i ɣa yiři uřa d Mmis n bnadem deg wuř n temmurt třata n wussan jar ǧyaři d wussan. 
Iryazen n Ninwa ad dd-kkaren deg wass n lḥisab ak-d jjiř-a, ad t ḥasben, minzi nitni tuben s tbarreḥt n Yunus, uca xzarem, aqa da Wenni iǧan d ameqqran x Yunus! 
Tajeǧidt n ljanub ad tekkar deg wass n lḥisab ak-d jjiř-a, ad xas teḥkem minzi nettat tusa-dd zeg uneggaru n ddunect, ḥima ad tseř i tiɣit n Suliman, uca xzarem, aqa da Wenni iǧan d ameqqran x Suliman!” 
“Ařami iffeɣ řaryaḥ amengus zi bnadem, ibda ittsara deg imucan war daysen bu waman, yarezzu arraḥet, war tt ittif. 
Řexdenni ad yini: ‘Ad dewřeɣ ɣar taddart inu manis dd-ffɣeɣ!’ Uca iruḥ, yufa i-tt texwa, tfarḍ, tsettef. 
Řexdenni yuyur uca yiwi akides sebɛa n řaryaḥ nneɣni, d iɛeffanen ktar zzayes, ad dd-adfen, ad raḥen ad zedɣen dayes, uca aneggaru n bnadem nni ad idweř mahu x umezwaru. Ammu i ɣa yiři ɛawed ak-d jjiř-a aɛeffan.” 
Řami tuɣa ɛad issawař ak-d řɣaci, xzar, yemmas d aytmas bedden barra, arezzun ad kides ssiwřen. 
Inna as ijjen: “Xzar, yemmac d aytmac bedden di barra, arezzun ad kidek ssiwřen.” 
Maca Netta yarra-dd x wenni tuɣa d as t innan, inna: “Min teɛna yemma d min ɛnan aytma?” 
Xas uca isswiẓẓeḍ s ufus nnes ɣar imeḥḍaren nnes, inna: “Xzar, yemma, xzar, aytma! 
Minzi man wen itteggen min ixs Baba i iǧan deg ijenwan, aqa netta d uma d učma d yemma.” 
