﻿Matta.
2.
Řami dd-ixřeq Yasuɛ di Bayt-Laḥm di Yahudiyya deg wussan n ujeǧid Hirudus, usin-dd ca n imusnawen n itran zi manis d tneqqar tfuct ɣar Urcalim. 
Nnan: “Mani iǧa wenni dd-ixeřqen d Ajeǧid n Wudayen? Aqa neẓra itri nnes di ccarq, nusa-dd ad as nesjed.” 
Řami isřa ujeǧid Hirudus man aya, inneḥweř netta d qaɛ Urcalim akides. 
Issmun-dd zi řgens marra imeqqranen n ikehhanen d imseřmaden n idlisen uca isseqsa ten x mani ɣa ixřeq Lmasiḥ. 
Nnan: “Di Bayt-Laḥm di Yahudiyya, minzi d man aya i yuran s ufus n unabi: 
‘Uřa d cem, Bayt-Laḥm di temmurt n Yahuda, cem war teǧid ca d tameẓyant jar ijeǧiden n Yahuda, minzi zzayem dd ɣa iffeɣ Ujeǧid wenni i ɣa yarewsen řgens inu, Israil.’” 
Řexdenni iřaɣa Hirudus x imusnawen n itran s tnuffra uca yiweḍ ad zzaysen issen řweqt i di tuɣa d asen dd-iffeɣ itri. 
Xenni issekk i-ten ɣar Bayt-Laḥm, inna: “Ruḥem dinni, tarzum mliḥ x Uḥenjir. Mařa tufim t, asem-dd, xebbarem ayi, ḥima uřa d necc ad dd-aseɣ, ad as sejdeɣ.” 
Awarni řami sřin i wawař n ujeǧid, ruḥen uca xzar, itri i ẓrin di ccarq iggur zzatsen ařami dd-yiweḍ uca ibedd sennej i wemcan mani iǧa Uḥenjir. 
Řami ẓrin itri, farḥen s řefraḥet tameqqrant aṭṭas. 
Udfen ɣar taddart, ẓrin Aḥenjir ak-d Maryam, yemmas, wḍan ɣar temmurt uca sejden as. Xenni arezmen řeknuz nsen uca qeddmen as tirzifin: ureɣ, mirru d řefwaḥet n řebxur. 
Umi d asen dd-iweḥḥa di tarjit ḥima war ttɛiqqiben ɣar Hirudus, ɛeqben ɣar temmurt nsen zeg ijj n webrid nneɣni. 
Umi ruḥen, iḍhar-dd lmalak n SIDI ɣar Yusuf di tarjit, inna: “Kkar, awi-dd Aḥenjir d yemmas, arweř ɣar Miṣra u qqim din ař cek i ɣa xebbareɣ, minzi Hirudus yarezzu x Uḥenjir ḥima ad t isshellek.” 
Uca ikkar-dd Yusuf, yiwi Aḥenjir d yemmas s ǧiřet uca yarweř ɣar Miṣra. 
Iqqim dinni ařami immut Hirudus, ḥima ad ittwakemmeř min ittwannan zi SIDI zeg unabi i innan: “Řaɣiɣ-dd x Mmi ḥima ad iffeɣ zi Miṣra.” 
Řami iẓra Hirudus belli imusnawen cemten t, ixeyyeq aṭṭas, uca issekk, inɣa marra iḥenjiren n Bayt-Laḥm d qaɛ jjwayeh i d as dd-yudsen, marra iḥenjiren zi tnayen n iseggʷusa swadday ɛlaḥsab řweqt i yiweḍ ad issen zeg imusnawen. 
Řexdenni ittwakemmeř min ittwannan zeg unabi Irmiya, umi inna: 
“Tmijja tᵉttwaseř di Rama, imeṭṭawen d tɣuyyit n wecḍan aṭṭas. Rahil tᵉttru x iḥenjiren nnes, war tᵉttexs ad tᵉttwaɛezza, minzi nitni war qqimen ɛad!” 
Řami immut Hirudus, iḍhar-dd lmalak n SIDI di tarjit i Yusuf di Miṣra, 
inna: “Kkar, awi-dd Aḥenjir d yemmas uca ruḥ ɣar temmurt n Israil, minzi inni tuɣa yarezzun ad nɣen Aḥenjir, aqa mmuten.” 
Řexdenni ikkar, yiwi-dd Aḥenjir d yemmas uca yusa-dd ɣar temmurt n Israil. 
Maca ařami isřa belli Arxilawus idweř d ajeǧid di Yahudiyya deg wemcan n babas Hirudus, iggʷed ad iraḥ dinni. Xenni iweḥḥa as-dd Arebbi di tarjit maḥend ad iraḥ ɣar jjwayeh n Ljalil. 
Řami dd-yiweḍ, izdeɣ di tendint qqaren as Nnaṣira, ḥima ad ittwakemmeř min ittwannan zeg unabi i innan: “Ad t semman Nnaṣiri!” 
