﻿Ṣafanya.
2.
Sdewřem-dd ixef nwem ɣar řeɛqeř, dewřem-dd ɣar řeɛqeř, a řgens břa aseḍḥi, 
qbeř i ɣa iffeɣ řḥukm - ass am uřum iɛeddu - qbeř i xawem dd ɣa yas řḥaduq n weɣḍab n SIDI, qbeř i xawem dd ɣa yas wass n weɣḍab n SIDI. 
Arzum x SIDI, marra imwaḍɛen n temmurt, inni itteggen řḥeqq nnes! Arzum tasegda, arzum awaḍeɛ, ad taɣ ad tennuffarem kenniw deg wass n weɣḍab n SIDI. 
Maɣar Ɣazza ad tᵉttwajj, Acqalun ad tedweř d ict n temmurt ittwareddǧen, Acdud ad xas azzřen ɣar wezyen n wass, uca Ɛaqrun ad tᵉttwaqřeɛ. 
Uct x imezdaɣ n tma n řebḥar, řgens n Ikaritiyyen. Awař n SIDI ad xawem yiři, a Kenɛan, tammurt n Ifilisṭiniyyen! Necc ad kenniw hellkeɣ, war ittiři umezduɣ ɛad. 
Tammurt nni x tma n řebḥar ad tiři d ddmani n tarewsa, uřa d wanuten i imeksawen d řkurit i wuǧi. 
Ad tiři temmurt i min iqqimen n taddart n Yahuda, ḥima ad dayes arewsen tiḥimriwin nsen. Di tudrin n Acqalun ad din arsen ɣar tmeddit, maɣar SIDI, AREBBI nsen, ad ɣarsen yarzef, u Netta issneqřeb tameḥbast nsen. 
Necc sřiɣ i useḥqar n Mu’ab d uceqqef n ayt n Ɛammun, i zi ssḥeqaren nitni řgens inu, u ssgeɛɛden ixef nsen aṭṭas ḍidd i temmurt nsen. 
S uya, s tidett am ddareɣ Necc, iqqar SIDI n řɛeskarat, AREBBI n Israil: Mu’ab ad tedweř am Sadum, u ayt n Mu’ab am Ɛamurra, zi ssibbet n uɣemmuy n tzeggʷart u zi ssibbet n wanuten n tmeǧaḥt, ict n temmurt ittwareddǧen i řebda. Min iqqimen n řgens inu ad ten ikecceḍ u inni iqqimen n řgens inu ad ṭṭfen tasɣart nsen d řwart. 
Aya ad ten iřqef zi ssibbet n nnfaxet nsen, maɣar nitni tuɣa sseḥqaren u arzmen aqemmum nsen x řgens n SIDI n řɛeskarat. 
Issaggʷad ad ɣarsen iffeɣ SIDI, maɣar Netta ad iqḍa x marra irebbiten zi temmurt, u nitni ad as bendqen, kuř ijj zeg wemcan nnes, marra tigzirin n řegnus. 
Kenniw ɛawed, a ayt n Kuc, ttwassnuqqben nitni zi ssif inu. 
Netta ad isswiẓẓeḍ s ufus nnes ɣar ccamal, Netta ad yareddeǧ Accur, u ad yarr Ninwa d ict n temmurt ittwareddǧen, tuẓeɣ am řexřa. 
Di řwesṭ nnes ad geyyrent tḥimriwin, marra řmař nnes, aqa tteggen am yijj ubarru n n řgens. Uřa d bu-iɛuqqan, wah uřa d twuct n ǧiřet ad ssensen x izeǧifen n ipilaren nnes. Tmijja nsen ad tɣennej zi řkazi, areddeǧ ad yiři x tnebdat nnes, maɣar tafrewt n tengelt tᵉttwaɛarra. 
D ta d tandint isřiwřiwen, tenni iqqimen di řaman, tenni innan deg wuř nnes: ‘Necc d tenni, war teǧi d tenneɣni!’ Mammec tedweř d ict n řqecɛet n unexřiɛ, ict n wemcan n arraḥet i řmař n řexřa! Marra inni xas ɣa ikken, ad xasen iṣeffar u s useḥqar ad issenhezz afus nnes. 
