﻿Ḥabaqquq.
3.
Taẓaǧit n Ḥabaqquq, anabi, deg waṭṭas n tmijjiwin. 
A SIDI, umi sřiɣ řexbar nnec, tuɣa tteggʷedeɣ. A SIDI, sneddar řxedmet nnec ɛawed di řwesṭ n iseggʷusa, seccen i-tt di řwesṭ n iseggʷusa, deg weɣḍab ɛqeř x řeḥnunect nnec. 
Arebbi yusa-dd zi Tayman u Amqeddas zeg wedrar n Faran. Silah. Lɛaḍama nnes tedřa ijenwan u aṣebbeḥ nnes iccur tammurt. 
Tuɣa din ict n tessiqt am tfawt, ffɣent-i-dd fřitcat n wassam zeg ufus nnes, aqa-tent ɣares, u daysent tnuffar tzemmar nnes. 
Ṭṭaɛun ittizwar i wudem nnes, řḥaduq n tmessi iffeɣ-dd zeg iḍaren nnes. 
Netta ikkar uca yarra tammurt tᵉttenhezza, Netta iẓra u igga ad arjijen řegnus! Idurar n zic ttwařebzen ařami dewřen d taɛejjajt, tiwririn zi mecḥař uya ɣensent! Ibriden ittduman i řebda aqa aten nnes. 
Necc ẓriɣ iqiḍan n Kucan ttwaḥṣaren, tijartiřin n iqiḍan n temmurt n Midyan ittawi tent usemmiḍ s jjehd. 
Ma yarɣa weɣḍab n SIDI x iɣezran? Ma tuɣa aɣḍab nnec ḍidd i iɣezran? Ma tuɣa aduqqez nnec n ufugem ḍidd i řebḥar, řami tnedhed x yeysan nnec, x ikarruten nnec n usenjem? 
Řqews nnec ittwaɛarra marra, tijaǧitin i tessiwřed tuɣa atent d iɛumad necc i useqsaḥ. Silah. Tfeǧqed tammurt s iɣezran. 
Řami Cek ẓrin idurar, iřqef i-ten řewjeɛ, řḥemřet n waman tuɣa tɛeddu, aman ihewřen arrin tmijja nsen tᵉttwaseř, geɛɛden ifassen nsen ɣar ujenna. 
Tafuct, uřa d uyur, qqimen bedden di tzeddiɣt nsen. Aqa ruḥen zi ssibbet n tfawt n fřitcat n řqews nnec, zi ssibbet n tissiqt n lansa nnec itteḥduduqen. 
S wesxeḍ teṣṣurufed tiwa i temmurt, s weɣḍab nnec tɛefsed x řegnus. 
Cek teffɣed i usenjem n řgens nnec, i usenjem n umedhun nnec. Aqa cek tqeǧɛed tazeqqa n taddart n uɛeffan, tɛarrid dsas ař iri. Silah. 
Azeǧif n iɛeskariyyen nnes imezwura, aqa tessnuqqbed i-t s lansat nsen. Nitni usin-dd ɛeřfen-dd maḥend ad ayi zeǧɛen. Aqa d meẓri nsen mařa zemmaren ad ccen řmeskin s tnuffra. 
Ak-d iysan nnec tᵉṭṭfed abrid di řebḥar, akuffu n waman imeqqranen. 
Řami sřiɣ, yarjij uɛeddis inu. Umi sřiɣ řḥess nni, arjijen iyencicen inu, axessar yudef ɣar iɣsan inu, u necc arjijeɣ deg wemcan inu. Waxxa amenni ad rajiɣ di řxaḍar x wass n řeḥṣaret, xmi ɣa issgeɛɛed x řgens, u ad aneɣ iḥṣar ak-d bandiyyat nnes. 
Waxxa war ittnuwwar wartu, u war din tᵉttiři ɛad řɣiǧet ɣar tzayart, waxxa řɣiǧet n zzitun ad tefceř uřa d iyyaren war ttɣimin tticen řmacuř, u ad ttwaqeḍɛen wuǧi zi řkuři u war ttiřin ɛad ifunasen d tfunasin di řkurit, 
ɛad amenni necc ad sřiweřweɣ i SIDI, ad farḥeɣ zi AREBBI n usenjem inu. 
SIDI, Sidi inu, Netta d jjhed inu. Netta ittegg iḍaren inu fsusen am yiḍaren n tudadin, Netta ittejja ayi ṣṣurufeɣ x řegɛudi. I umeqqran n imeɣnajen. Ak-d uzenzun inu x ifiřan. 
