﻿Yunus.
2.
Issewjed SIDI ijj n wesřem ameqqran ḥima ad isseɣri Yunus uca Yunus ikka třata n wussan d třata n ǧiyaři deg uɛeddis n wesřem. 
Uca iẓẓuǧ Yunus i SIDI, AREBBI nnes, zeg uɛeddis n wesřem. 
inna: ”Zi řeḥṣaret inu řaɣiɣ i SIDI u Netta yarra-dd xafi. Zeg weḥwic n řaxart řaɣiɣ uca Cek tesřid i tmijja inu. 
Tuɣa tenḍared ayi di řaǧaɣ, deg wuř n řebḥur, tennḍen ayi-dd řemwaj. Marra zzhir nnec d řemwaj nnec kkin-dd xafi sennej. 
Nniɣ: ‘Necc ttwassuffɣeɣ zi zzat i wudem nnec. Ɛad ad twařiɣ ɛawed Zzawect nnec Tameqqrant Iqeddsen.’ 
Ṭṭfen ayi waman ař mani iwḍen ɣar řeɛmar inu, aman ihewřen nnḍen ayi-dd, iřṣeq-dd arbiɛ n řebḥar deg uzeǧif inu. 
Hwiɣ ɣar ṭṭrufa yuǧɣen qaɛ n idurar, ttwabellɛen zzekrunat n temmurt xafi sennej i řebda, maca Cek tessgeɛɛded tudart inu zi turṣuḍi deg waman, a SIDI, AREBBI inu! 
Umi idewwex řeɛmar inu dayi, fekkareɣ di SIDI, u taẓaǧit inu tgeɛɛed ɣarek, di Zzawect nnec Tameqqrant Iqeddsen. 
Nitni ṭṭfen di l’aṣnam ibeṭṭřen d iɣeccen, semḥen di tmexsiwt nsen icewwaren. 
Maca necc ad Cek ḥemdeɣ s yict n tmijja teccur s uqadi. Min waɛdeɣ, ad t qefřeɣ. Asenjem zi SIDI.” 
Issiweř SIDI ak-d wesřem uca iɛuqq-dd Yunus di řbar. 
