﻿Ɛubadya.
1.
Řewḥiy n Ɛubadya. “Ammu i iqqar Sidi inu, SIDI, x Idum: ’Neccin nesřa ijj n řexbar zi SIDI, u ijj n umsekki ittwassekk ɣar řegnus: Kkar, jjem aneɣ ad xas nɣewweɣ, ad nemmneɣ ak-d Idum!’ 
Xzar, Necc ggiɣ cek d ameẓyan jar řegnus, cek tᵉttwasseḥqarad aṭṭas. 
Nnfaxet n wuř nnec tecmet i cek, cek d wenni din izeddɣen deg imucan n udurri jar řejruf, di tzeddiɣt nnec yuɛřan, cek d wenni iqqaren deg wuř nnec: ‘Man wen d ayi ɣa iɣeḍřen ɣar temmurt?’ 
Mařa tessgeɛɛded ixef nnec am ugider, niɣ teggid řɛucc nnec jar itran, Necc ad cek dd ssenni ssehwiɣ, ammu i iqqar SIDI.” 
“Mařa udfen-dd ɣarek iceffaren, niɣ ixewwanen s ǧiřet, - a, mammec i ɣa tᵉttwaředdǧed ař ṭṭarf - Ma war ttacaren ař ɣarsen i ɣa yiři min ikfan? Mařa usin-dd ɣarek inni i ɣa iřeqḍen aḍiř, ma ad jjen ca min ittwařeqḍen awarni asen? 
A mammec i ɣa arzun di Ɛisu, mammec i ɣa beqqcen řeknuz nnes nnufaren! 
Marra iryazen nni iggin ijj n řɛahd akidek, ɛarnen cek ɣar weymir, iryazen nni tuɣa akidek iddaren di řehna, cemten cek, nitni zemmaren xak. Aɣrum zzayek ggin t d tareḥsit swadday nnec. ‘Aqa netta war dayes bu řefhamet.’    
Ma war ittiři deg wass nni, iqqar SIDI, aqa Necc ad areddǧeɣ imiɣisen zi Idum, u řefhamet zeg idurar n Ɛisu? 
Ayt n bu-teɣruḍt nnec ad ttwaḥṣaren zi tiggʷudi, a Tayman, ḥima kuř ijjen zeg idurar n Ɛisu ad ittwaqḍeɛ s wenɣay.” 
“Zi ssibbet n lɛunf x umac Yaɛqub, ad cek tdeř řefḍiḥet, u ad tᵉttwakksed i řebda. 
Deg wass i di tuɣa xas tbedded, deg wass i di ibarraniyyen iwyen-dd agřa nnes u udfen řbarrani ɣar tewwura nnes, u nḍaren taqedduḥt x Urcalim, tuɣa cek am yijjen zzaysen. 
Maca war d ac iɛeddeř ad teqqimed txezzared deg wass n umac, deg wass n wectab nnes abarcan, war d ac iɛeddeř ad tfarḥed x iḥenjiren n Yahuda, deg wass n wareddeǧ nsen u war d ac iɛeddeř ad tarezmed aqemmum nnec aṭṭas deg wass n řeḥṣaret nsen. 
War iɛeddeř ad tadfed ɣar tewwart n řgens inu deg wass n uhellek nsen war d ac iɛeddeř ad teqqimed txezzared ɛawed deg wass n uḍeyyeɛ nsen u war d ac iɛeddeř ad teqqimed tesswiẓẓḍed ifassen nnec ɣar wagřa nnes deg wass n uḍeyyeɛ nnes, 
war d ac iɛeddeř ad tbedded ɣar mani ttmeřqan ibriden, maḥend ad tᵉtteḥḥid inni inejmen u war d ac iɛeddeř ad tsellmed inni tuɣa yarewřen deg wass n řeḥṣaret.” 
“Maɣar yudes-dd ass n SIDI x marra řegnus! Am teggid cek, ad zzayek ittwagg, axeǧeṣ nnec ad dd-idweř x uzeǧif nnec. 
Maɣar am mammec teswim kenniw x wedrar inu iqeddsen, ammu ad swen marra řegnus řebda, wah, ad swen ad sekkfen, ad dewřen axmi ɛemmarṣ war tuɣa ǧan. 
Maca x wedrar n Ṣihyun ad yiři min innejmen, u wanita ad yiři d amqeddes, u inni n taddart n Yaɛqub ad ṭṭfen tiseqqař n řwart nsen. 
Taddart n Yaɛqub ad tiři d timessi, u taddart n Yusuf d aceɛɛař, uca taddart n Ɛisu ad tiři am yiɣeǧ u nitni ad asen sscemḍen u ad ten ccen, ařami war iqqim uřa d ijj iddar di taddart n Ɛisu, maɣar SIDI aqa issiweř.” 
“Inni n Temmurt n Ljanub ad ṭṭfen idurar n Ɛisu d tasɣart, u yinni n Temmurt Iwaṭan ad ṭṭfen tammurt n Ifilisṭiniyyen d řwart wah, nitni ad ṭṭfen iyyar n Ifrayim d yeyyar n Samarya d řwart, u Binyamin ad iṭṭef Jilɛad d řwart, 
u imenfiyyen zi řɛeskar-a inni iǧan ɣar ayt n Israil ad ṭṭfen tammurt n ayt n Kenɛan d řwart ař Ṣarfat, u imenfiyyen zi Urcalim nni iǧan di Ṣafarad, ad ṭṭfen tineddam n Temmurt n Ljanub d řwart. 
Imsellken ad geɛɛden adrar n Ṣihyun, ḥima ad ḥakmen adrar n Ɛisu, uca tagelda ad tiři n SIDI.” 
