﻿Yuwil.
1.
Awař n SIDI i dd-yusin ɣar Yuwil, mmis n Fatu’il. 
“Sřem aya, a iwessura, sḥessem, marra kenniw imezdaɣ n temmurt! Ma imsar uya ɛemmarṣ deg wussan nwem niɣ deg wussan n řejdud nwem? 
Ḥajam iḥenjiren nwem x uya u jjem iḥenjiren nwem ad t ḥajan i iḥenjiren nsen u iḥenjiren nsen i jjiř i dd ɣa yasen. 
Min ijja bu-weqḍeɛ, tecca i-t tmurɣi, min tejja tmurɣi, icca i-t bu-weřsaḥ, min ijja bu-weřsaḥ, icca i-t bu-uṣard.” 
“Faqem, kenniw iskarjiyyen, trum, sɣuyyem, marra inni isessen binu, zi ssibbet n binu ẓemmen t jdid, maɣar ittwaqḍeɛ zeg uqemmum nwem. 
Maɣar ijj n řgens igeɛɛed ḍidd i temmurt inu. Ɣares tizemmar u řqedd nnes břa řeḥsab. Tiɣmas nnes am teɣmas n wayraden u tiɣmas n teɣmart nnes am tinni n teyradt. 
Aqa yarra tzayart inu d ict n řqecɛet n unexřiɛ u yarza wartu inu, yarra i-t qaɛ d aqeccar uca inḍar i-t, tiseḍwin nnes dewřent d ticemřařin. 
Cetcat am yict n teɛzarect tenni ibeysen s ict n txancet n wecḍan x weryaz n temẓi nnes. 
Tᵉttwaqḍeɛ tewhibt n řɣiǧet d tewhibt n useyyeb zi Taddart n SIDI. Ikehhanen, imsexxaren n SIDI, ceṭṭen. 
Aqa ittwareddeǧ yiyyar, tecḍen temmurt, minzi imendi iḍeyyeɛ, yuẓeɣ binu n jdid, tejmed zzect. 
Seḍḥam, kenniw ifeǧaḥen, sɣuyem, kenniw ayt n tzayart, x yirden d imendi, maɣar ṣṣabet n yiyyar tweddar. 
Tazayart tuẓeɣ, artu n tazart isřaw, tacejjart n aremman, uřa d tini d tcejjart n tteffaḥt, wah, marra ticejjura n yiyyar sřawent, ɛad řefraḥet n tarwa n bnadem truḥ.” 
“Beysem ixef nwem u wtem agejdur, kenniw ikehhanen! Syuyyem kenniw imsexxaren n uɛalṭar, asem-dd u tessensem di txuncay n wecḍan, kenniw imsexxaren n AREBBI, maɣar tawhibt n řɣiǧet d tewhibt n useyyeb ttwakksent i Taddart n AREBBI nwem. 
Ɛeřmem i yijj n uẓummi iqeddes, barrḥem s yijj n umuni ifarzen, smunem imɣaren d marra imezdaɣ n temmurt di Taddart n SIDI, AREBBI nwem, u řaɣam ɣar SIDI.” 
“Wih, ass nni! Minzi yudes-dd wass n SIDI u ad dd-yas ass nni am yijj n ureddeǧ n Uzemmar x kuřci. 
Ma war d aneɣ tᵉttwakkes macca jar tiṭṭawin nneɣ? Uřa d řefraḥet d arcuq zi Taddart n AREBBI nneɣ. 
Iɛeqqayen n zzariɛet uẓɣen sadu ibursa, ixxamen n řexzen ttwareddǧen, řehrit hedmen, minzi imendi inẓeɣ. 
Mammec issmuhrut řmar! Tiḥimriwin n ifunasen d tfunasin qqiment ḥayar, maɣar war ɣarsent bu ddemnet n tarewsa! Uřa d tiḥimriwin n wuǧi fnant.” 
“Ɣarek i ttřaɣiɣ necc, a SIDI, minzi timessi tecca ddmani n řexřa u yijj n uceɛɛař aqa issecmeḍ marra ticejjura n yiyyar.” 
Ura d řmař deg iyyar sekkʷḍen-dd ɣarek, minzi tɣezratin uẓɣent u timessi tecca ddmani n řexřa.” 
