﻿Ḥuciɛa.
14.
“Samarya ad tᵉṭṭef axeǧeṣ, minzi tɣewweɣ x AREBBI nnes. Ad wḍan s ssif. Iḥenjiren imeẓyanen nsen ad ttwařebzen u timɣarin nsen s ddeyset ad ttwacarrgent. 
A Israil, dweř-dd ɣar SIDI, AREBBI nnec, maɣar tenderfed s řmuɛṣiyyet nnec. 
Ksim awařen-a n ttubet akidwem u dewřem-dd ɣar SIDI. Inim as: Ksi xaneɣ řmuɛṣiyyet marra u qbeř zzayneɣ min icnan, xenni ad nawi s tidett ifunasen d taḍḥiyet ɛlaḥsab řwuɛud n iyencicen nneɣ. 
Accur war d aneɣ issenjam, war neggur x yeysan u war neqqar i tmegga n ifassen nneɣ: ‘Arebbi nneɣ’, maɣar zzayek i ɣa ittwarḥem uyujiř.’” 
“Necc ad ten ssgenfiɣ zi tɣennant nsen, ad ten ttexseɣ s řxaḍar, maɣar aɣḍab inu iḥeyyed xas. 
Necc ad iřiɣ i Israil am nnda. Netta ad inuwwar am tnewwact n tellilict, ad iwwet Israil iẓewran nnes am idurar n Lubnan. 
Řefruɛ nnes ad zzuggarten u aweqqar nnes ad yiři am uzemmur u řefwaḥ nnes am řefwaḥ n tcejjura x idurar n Lubnan. 
Nitni ad dd-dewřen, ad qqimen di tiři nnes, ad sseddaren imendi, ad newwaren am tzayart. Řidaret nnes ad tiři axmi binu n Lubnan. 
A Ifrayim ad yini: ‘Min ɣari ɛad ak-d řexyařat n l’aṣnam?’ Necc sřiɣ as u ad xas ssijjeɣ. Ad iřiɣ am yict n tcejjart n umerzi aziza, zzayi i tᵉttwaf řɣiǧet nnec.” 
“Man wen iǧan d amiɣis d afehham di tmesřayin-a, man wen i ɣar teǧa řefhamet u man wen i tent issnen? Wah, ibriden n SIDI nican i yeǧan u imseggaden ad daysen uyuren, maca inni iɛeddan ad daysen nnderfen.” 
