﻿Ḥuciɛa.
11.
“Ařami tuɣa Israil ɛad d aḥenjir, tuɣa ttexseɣ t u Necc řaɣiɣ-dd i mmi zi Miṣra. 
Uřa d inabiyyen inu řaɣan xasen, maca xenni aggʷejen nitni deɣya x iɣembab nsen maḥend ad awyen tiɣarṣa i ‘Ibaɛlen’ d tewhibin n řebxur i řexyařat nsen ineqcen. 
D Necc i tuɣa isseřmaden ticři i Ifrayim, wah, Netta iksi ten x iɣaǧen nnes, maca nitni war ssinen ca aqa Necc d wenni i ten issgenfan. 
S tesɣunin n bnadem jebdeɣ ten-dd ɣari, s tmurar n tmexsiwt, u Necc tuɣa i nitni am wenni dd-issgeɛɛaden zzayřet zeg iɣesmiren nsen, u Necc sswiẓẓḍeɣ as ifassen inu maḥend ad as wceɣ ad icc.” 
“Netta war dd-ittarri s uzeǧif ɣar Miṣra. Accur, netta ad yiři d ajeǧid nnes, maɣar nitni ugin ad dd-dewřen. 
Ssif ad inneḍ di tneddam nsen uca ad yareddeǧ iɛumad nnes n ubelleɛ n tewwura u ad ten yecc zi ssibbet n ixarriṣen n yixef nsen. 
Maɣar řgens inu iqqim ittneqřab xafi. Nitni ttřaɣan jmiɛ ɣar sennej, maca Netta war ten issɛuǧi ca.” 
“Mammec zemmareɣ Necc ad cek sellmeɣ, Ifrayim? Mammec zemmareɣ Necc ad cek sellmeɣ, Israil? Mammec zemmareɣ Necc ad cek sellmeɣ am Adama, ad cek ggeɣ d amedya am Ṣabuyim? Uř inu inneḥweř zzayi, aziǧez inu ittextux jmiɛ. 
Necc war tejjiɣ ad arxuɣ řḥaduq n weɣḍab inu, Necc war dd-ddikkwiřeɣ ca maḥend ad areddǧeɣ Ifrayim, maɣar Necc d Arebbi u Necc war ǧiɣ d bnadem, Necc d Amqeddas di řwesṭ nnec, war dd-ttiseɣ ca s tmessi n lɣaḍab inu. 
Nitni ad gguren awarni i SIDI. Netta ad issmuhrut am yijj n weyrad, maɣar ad issmuhrut Netta uca iḥenjiren ad dd-asen ttarjijin zi tma n řebḥar. 
Am ijḍaḍ ad dd-asen ttarjijin zi temmurt n Miṣra u am tedbirt zi temmurt n Accur u Necc ad ten sszedeɣ di tudrin nsen, iqqar SIDI.” 
