﻿Ḥizqiyal.
47.
Awarni aya yiwi ayi ɛawed ɣar wadaf n Taddart, u xzar, zi sadu tanebdat n Taddart tteffɣen waman ɣar ccarq, minzi aɣezdis n zzat n Taddart tuɣa-t ɣar ccarq u tuɣa ttazzřen hekkwan aman zi swadday n uɣezdis azeřmaḍ n Taddart, ɣar uɣezdis n ljanub n uɛalṭar. 
Issuffeɣ ayi-dd zeg ukulwar n řebni n tewwart n ccamal uca indeh ayi ɣar tebridt nni ɣar barra, jjihet n tewwart n barra, ɣar ukulwar nni ixezzaren ɣar ccarq, u xzar, aman ttazzřen zi teɣmart n zzat afusi. 
Umi dd-iffeɣ weryaz ɣar ccarq, tuɣa ɣares afiřu n řeɛbar deg ufus nnes uca iɛbar ařef n iɣaǧen. Isseẓwa ayi x waman uca aman iwḍen ař ticeɛbin. 
Iɛbar ɛawed ařef n iɣaǧen uca isseẓwa ayi x waman uca aman iwḍen ař ifadden. Ɛawed iɛbar ařef n iɣaǧen uca isseẓwa ayi ɛad ktar uca aman iwḍen ař tijɛinnatin. 
Iɛbar twařat nneɣni ařef n iɣaǧen uca aman dewřen d ijj n iɣzar war zmireɣ ad t ẓwiɣ x iḍaren, maɣar aman geɛɛden ařami tuɣa ittxeṣṣa ad iɛumm bnadem, aqa-t d ijj n iɣzar i war izemmar ḥed ad t iẓwa x iḍaren. 
Netta inna ayi: “Ma teẓrid tt, a mmis n bnadem?” Xenni indeh ayi am ggureɣ nnec uca yarra ayi ɣar tma n iɣzar. 
Umi dd-dewřeɣ necc, xzar, beddent din aṭṭas n tcejjura x tma n iɣzar, am ɣar tma-ya am ɣar tma nni. 
Xenni inna ayi: “Aman-a ttazzřen ɣar jjihet n ccarq uca hekkwan ɣar Řewḍa uca ttakkwaḍen ɣar Řebḥar Immuten. Xenni ttazzřen di řebḥar uca ad ttwassggenfan aman ɛawed. 
Ad imsar, belli kuř řeɛmar i din ittenhezzan ad iddar, mani ma i dd ɣa yawḍen tnayen n iɣezran. Ad din iřin iseřman aṭṭas, minzi aman-a ttazzřen dinni uca ad ttwassgenfan waman n řebḥar. Mani ma i dd ɣa yas yeɣzar-a, ad din tiři tudart. 
Ad imsar belli ad iřin iyemmaren n iseřman zi Ɛayn-Jadyi ař Ɛayn-Ɛiglayim. Ad din iřin imucan i ujeffaf n traccawin. Asřem nsen ad yiři ɛlaḥsab marka nnes, am wesřem n Řebḥar Ameqqran, aṭṭas s waṭṭas, 
maca tindat nnes d iyeřmamen nnes war ttwaggenfan, ad qqimen meǧḥen. 
Ɣar yeɣzar, x tma nnes, x tma-ya u x tma nni, ad iřin ɛřam kuř ticejjura, maḥend ad zzaysent ccen, tinni umi tafart nsent war tᵉttisřaw u řɣiǧet nsent war t qeṭṭi ca. Kuř ayur ad wcent řɣiǧet d ṭṭri, maɣar aman n yeɣzar ffɣen-dd zi Zzawect Iqeddsen. Řɣiǧet nsent ad tiři i macca d tafart nsent i ugenfu.” 
“Ammu i iqqar Sidi inu, SIDI: ‘Wa ad yiři d aymir i x i ɣa tewcim tammurt d řwart i tenɛac n tqebbař n Israil. Yusuf ad iksi tnayen n tseqqar. 
Kenniw ad tt twartem, ijj am wenneɣni, i uya ssgeɛɛdeɣ afus inu uca jjuǧeɣ ad tt wceɣ i řejdud nwem. Tammurt-a ad tiři d tasɣart nwem. 
Wa ad yiři d aymir n temmurt: ɣar uɣezdis n ccamal, zi Řebḥar Ameqqran x webrid ɣar Ḥitlun ař dd-tusid ɣar Ṣadad, 
xenni ɣar Ḥamat, Bayruta, Sibrayim nni yeǧa jar weymir n temmurt n Dimacq d weymir n temmurt n Ḥamat, xenni ɣar Ḥaṣr-Hatixun nni yeǧa ɣar weymir n Ḥawran. 
Zi řebḥar ad dd-iffeɣ weymir ɣar Ḥasr-Ɛaynun, x uɣezdis n weymir n Dimacq uca xenni ɣar ccamal, ɣar ccamal u x uɣezdis n weymir n Ḥamat. Wa ad yiři d aɣezdis n ccamal. 
Aɣezdis n ccarq ittekk zi jar Ḥawran d Dimacq u zi jar Jilɛad d temmurt n Israil x L’Urdun. Kenniw ad t tɛebbarem zeg weymir ař řebḥar n ccarq. Wa ad yiři d aɣezdis n ccarq. 
Aɣezdis n ljanub, aqa-t ɣar ljanub zi Tamar ař aman n Maribut-Qadac uca ittekk x Teɣzurt n Teɣzart n Miṣra ař Řebḥar Ameqqran. Wa ad yiři d aɣezdis n ljanub ɣar ljanub. 
Aɣezdis n řɣarb d Řebḥar Ameqqran, zeg weymir nni iǧan ɣar ljanub ař arendad n webrid ɣar Ḥamat, wa ad yiři d aɣezdis n lɣarb.’” 
“Ad tebḍam tammurt-a jar awem ɛlaḥsab tiqebbař n Israil. 
Kenniw ad tt jjen d řwart i kenniw u i ibarraniyyen di řwesṭ nwem, inni urwen iḥenjiren di řwesṭ nwem. Nitni ad awem iřin am yinni dd-ittwaxeřqen di temmurt jar ayt n Israil. Ad asen tiři tasɣart akidwem di řwesṭ n tqebbař n Israil. 
Ɣar teqbič i ɣar ɣa izdeɣ am ubarrani, din ad as tewcem tasɣart nnes! Ammu i ɣa tiři, iqqar Sidi inu, SIDI.’” 
