﻿Ḥizqiyal.
45.
“Xmi ɣa tebḍam tammurt d řwart s tqedduḥt, ad twehhbem ict n tewhibt n usgeɛɛed i SIDI, ict n tesɣart iqeddsen zi temmurt: tuzzeggart nnes ad tiři xemsa u-ɛicrin-ařef n iɣunam n řeɛbar d tiru nnes ɛecra-ařaf n iɣunam n řeɛbar. Marra tammurt i d as dd-innḍen ad tiři tqeddes. 
Xemsa-mya di xemsa-mya n iɣunam n řeɛbar ɣar arebɛa iɣezdisen nnes ad zzayes iřin i Zzawect Iqeddsen. Uca deg wenneḍ nnes xemsin n iɣaǧen ad iřin d ddmani n tarewsa. 
S řeɛbar-a ad teɛbared di tuzzeggart xemsa u-ɛicrin-ařef u di tiru ɛecra-ařaf n iɣunam n řeɛbar u Zzawect Iqeddsen ad dayes tiři, ixs ad yini Aqdas x Uqeddas. 
Ad tiři d ict n temmurt iqeddsen. Ad tiři i ikehhanen nni ittsexxaren di Zzawect Iqeddsen, inni dd-iqarrben maḥend ad sexxaren i SIDI. Ad tiři i nitni d amcan n tzeddiɣin nsen d ijj n wemcan iqeddsen i Zzawect Iqeddsen. 
Ict n temmurt s ict n tuzzeggart n xemsa u-ɛicrin-ařef u s ict n tiru n ɛecra-ařaf n iɣunam n řeɛbar ad tiři i Ilawiyyen nni ittsexxaren di Taddart, ad tiři d řmulk i nitni, s ɛicrin n řebniyyat n ixxamen. 
Ad tewcem ict n temmurt s ict n tiru n xemsa-ařaf u s ict n tuzzeggart n xemsa u-ɛicrin-ařef n iɣunam n řeɛbar d tammurt i tendint, zzat i temmurt n tewhibt iqeddsen n usgeɛɛed. Ad tiři i marra taddart n Israil. 
Tasɣart n temmurt n řḥakem ad tiři ɣar ijj n uɣezdis uřa ɣar uɣezdis nneɣni n temmurt n tewhibt iqeddsen n usgeɛɛed u n tesɣart n temmurt n tendint, zzat i tewhibt iqeddsen n usgeɛɛed u zzat i tesɣart n temmurt n tendint, zeg uɣezdis n řɣarb ɣar řɣarb u zeg uɣezdis n ccarq ɣar ccarq. Tuzzuggart ad tiři nican zzat i uɣezdis n icten zi tseqqař n řwart, zeg weymir i iǧan ɣar řɣarb ař weymir i iǧan ɣar ccarq. 
Tammurt ad tiři nnes, tasɣart nnes di Israil. U řḥukkam inu war ḥessaren ɛad řgens inu, maca ad wcen tammurt i taddart n Israil, i tqebbař nsen.” 
“Ammu i iqqar Sidi inu, SIDI: ‘Cfa awem, a kenniw, řḥukkam n Israyil! Sbeɛɛed xawem lɛunf u ggem řḥeqq d tsegda uca kksem ibeɛɛaj nwem x řgens inu, ammu i iqqar Sidi inu, SIDI. 
Ittxeṣṣa ad ɣarwem yiři ijj n řmizan nican d ijj n ifa nican d ijj n ubatu nican.    
Ittxeṣṣa ad yiři řeɛbar n ifa d řeɛbar n ubatu d řeɛbar d ijj, ḥima ad yiři ubatu d ict zi tɛeccart n uḥumir, uca ict n tɛeccart n uḥumir ad teswa ifa. Řeqyas n řeɛbar nsen ad yiři zeg uḥumir. 
Aciql aqa-t ɛicrin jira. Ɛicrin ciqlu, xemsa u-ɛecrin ciqlu, xemmesṭac ciqlu, ad awem yiři ijjen mina.’” 
“Ta d tewhibt n usgeɛɛed nni i ɣa tessgeɛɛdem: ict n tsittut n ijj n ifa zeg ijj n uḥumir n yirden uca ad tewcem uřa d ict n tsittut n ijj n uḥumir n imendi. 
X tewṣeyyet n zzect, tawṣiyyet n řqedd n ubatu n zzect: aqa ict n teɛcart n ubatu n ijj n ukuru, akuru nni isekkwin ijj n uḥumir n ɛecra ibatuten, minzi ɛecra ibatuten d ijj n uḥumir. 
Xenni ijj zeg wuǧi x mitayen n wuǧi zi ddmani n tarewsa n temmurt n Israil i ifeyyḍen s waman, am tewhibt n řɣiǧet u am tɣarṣt n wecmaḍ u am tewhibt n řehna, maḥend ad tegged aṣřaḥ i nitni, ammu i iqqar Sidi inu, SIDI. 
Marra řgens n temmurt, marra nitni ad carcen di tewhibt n usgeɛɛed i řḥakem di Israil. 
Ad yiři x řḥakem maḥend ad yegg tiɣarṣa n wecmaḍ d tewhibt n řɣiǧet d tɣarṣt n useyyeb di řeɛyudat u deg wussan n uyur n jdid u x wussan n ssebt, wah, x marra ussan n řeɛyudat n taddart n Israil. Netta ad issewjed taɣarṣt n ddenb d tewhibt n řɣiǧet d tewhibt n wecmaḍ d tewhibin n řehna, maḥend ad igg aṣřaḥ i taddart n Israil.” 
“Ammu i iqqar Sidi inu, SIDI: ‘Deg uyur amezwaru, deg wass amezwar n uyur, ad teksid ijj n ufunas icnan aṭṭas, ameẓyan n tfunast, uca ad zzayes tekksed ddenb zi Zzawect Iqeddsen. 
Akehhan ad iksi zeg idammen n tɣarṣa n ddenb uca ad ten yegg x řeḍruf i iǧan ɣar uɣezdis n tewwura n Taddart, ɣar arebɛa n tɣemmura n treffidet n uɛalṭar u x řeḍruf n tewwart n řemraḥ n daxeř. 
Ammu i ɣa tegged deg wass wiss sebɛa n uyur, di ṭṭweɛ n wenni iweddaren deg webrid u di ṭṭweɛ n uqubbani, ammu i ɣa teggem aṣřaḥ i Taddart.’” 
“Deg uyur amezwaru, deg wass wiss arbeɛṭac n uyur ad tiři Tɣarṣt n Useɛdu i kenniw, ad yiři řɛid i yijj n řmijař n sebɛa n wussan, ad ccen aɣrum břa antun. 
Deg wass nni ad issewjed řḥakem ijj n ufunas ameẓyan am tɣarṣṭ n ddenb i yixef nnes u i marra řgens n temmurt. 
Di sebɛa n wussan n řɛid ad issewjed ict n tɣarṣt n wecmaḍ i SIDI: sebɛa n ifunasen imeẓyanen d sebɛa n icarriyyen icnan, marra sebɛa n wussan nni, uřa d ict n tɣarṣt n ddenb n ijj n umyan zeg iɣayḍen kuř ass. 
Ad issewjed ɛawed tawhibt n řɣiǧet: ijj n ifa i yijj n ufunas ameẓyan u ijj n ifa i yijj n icarri u ijj n uhinu n zzect i yijj n ifa. 
Deg yuyur wiss sebɛa, deg wass wiss xemmesṭac n uyur ittxeṣṣa as ad yegg ammu marra man aya di řɛid, sebɛa n wussan: am tɣarṣt n ddenb am tɣarṣt n wecmaḍ, am tewhibt n řɣiǧet am zzect.” 
