﻿Ḥizqiyal.
31.
Deg useggʷas wiss ḥiṭac, deg uyur wiss třata, deg wass amezwaru n uyur imsar belli yusa-dd ɣari wawař n SIDI, inna: 
“A mmis n bnadem, ini i firɛun, ajeǧid n Miṣra, u i marra řɣaci nnes inhewřen: ‘Wi akidek imquddan s marra řemɣaret nnec? 
Xzar, tuɣa Accur d tacejjart n tengelt x idurar n Lubnan ak-d tseḍwin icnan d tifray i itticen tiři mliḥ u ak-d tiddi d azirar yuɛřan, ařami tuccent nnes tiweḍ-dd ař iseynuten. 
Aman arrin tt ad iyma, aman ihewřen ssgeɛɛden tt aṭṭas. Iɣezran n waman nnes ssizzřen deg wenneḍ n tebhirt nnes uca aman ihewřen arrin iɣezran nnes ad raḥen ɣar marra ticejjura n yeyyar. 
X uya ittwassuɛřa tiddi nnes x marra ticejjura n yeyyar, u tiseḍwin nnes dewřent s waṭṭas u ifetwan nnes zzuggarten s waman ifeyyḍen, xmi tuɣa tessɣemmi. 
Marra ijḍaḍ n ujenna ggin řɛucc nsen di tseḍwin nnes, marra řmař n yeyyar ferxen sadu ifetwan nnes u marra řegnus mɣaren tuɣa ttɣiman di tiři nnes. 
Tuɣa-tt tecna s řemɣaret nnes u s tuzzeggart n tseḍwin nnes, maɣar aẓwar nnes tuɣa-t ak-d waṭṭas n waman. 
Ticejjura n tengelt di jjennet n AREBBI war xas ɛdunt, ticejjura n umerzi war sekkwint tseḍwin nnes uca ticejjura n dulb war sekkwint ifetwan nnes. Uřa d ict n tcejjart di jjennet n AREBBI tarwes dayes deg waẓri nnes.    
Ggiɣ tt tecna ak-d waṭṭas n tseḍwin nnes, ařami zzayes usment marra ticejjura n Ɛadn, tinni tuɣa di jjennet n AREBBI.’” 
“S uya, ammu i iqqar Sidi inu, SIDI: ‘Umi tessgeɛɛded ixef nnem s tiddi nnem, wah nettat tegga tuccent nnes jar iseynuten u uř nnes issgeɛɛed ixef nnes zi ssibbet n řuɛřa nnes, 
s uyenni wciɣ tt deg ufus n wenni d amzemmar qaɛ jar řegnus, wenni iggin s tidett am dd-ittřiqen ak-d tuɛeffna nnes, uca ammu i uẓẓřeɣ xas. 
Zedmen tt ibarraniyyen, řegnus iqesḥen aṭṭas, zedmen t uca jjin tt. Tiseḍwin nnes wḍant x idurar u di marra tiɣzurtin, ifetwan nnes ttwarẓen di marra tiɣezratin n temmurt u marra řegnus n temmurt hwan-dd zi sadu tiři nnes uca jjin tt. 
Marra ijḍaḍ n ujenna zedɣen x ukeccuḍ nnes nni iwḍan uca marra řmař n yeyyar tuɣa aten x ifetwan nnes. 
Necc ggiɣ tt, ḥima marra ticejjura war dikkwiřent ɛad ttneffxent s tiddi nsent uca ad ggent tuccent nsen deg iseynuten, u marra ticejjura nni iswin aman s ufeyyeḍ, war ttbeddint ɛad s yixef nsent di nnfaxet nsent, maɣar nitenti marra ttwamewcent i řmewt, ɣar řaǧaɣ n temmurt, di řwesṭ n tarwa n bnadem, ak-d inni ihekkwan deg weḥfur n wenḍeř.’” 
“Ammu i iqqar Sidi inu, SIDI: ‘Deg wass nni di tehwa ɣar řaxart, ggiɣ ijj wecḍan. Di ṭṭweɛ nnes dřiɣ aman ihewřen uca ssbeddeɣ iɣezran nnes uca fecřen waman imɣaren. Di ṭṭweɛ nnes ssbarrecneɣ idurar n Lubnan uca marra ticejjura n yeyyar ceḍnent xas. 
S ddriz n uweṭṭu nnes ssarjijeɣ řegnus, umi tt ssehwiɣ ɣar řaxart ak-d inni ihekkwan deg weḥfur n wenḍeř. Marra ticejjura n Ɛadn, tinni iɛizzen aṭṭas d tinni icnan qaɛ zi Lubnan, tinni iswin aṭṭas n waman marra, aqa ttwassfewwjent s man aya di řaǧaɣ n temmurt. 
Uřa d nitenti hwant akides ɣar řaxart, ɣar inni ittwanɣen s ssif, inni tuɣa aɣiř nnes ijehden, inni tuɣa iqqimen di tiři nnes di řwest n řegnus. 
Ak wi tsawid ammu di řɛezz d řemɣaret jar tcejjura n Ɛadn? Waxxa amenni ad tᵉttwassehwid ak-d tcejjura n Ɛadn ař raǧaɣ n temmurt. Ad tbuzzřed di řwest n yinni war ittwaxetnen, ak-d inni ittwanɣen s ssif. Uca ad inin: Wa d firɛun d marra řɣaci nnes inhewřen!’, ammu i iqqar Sidi inu, SIDI.” 
