﻿Ḥizqiyal.
27.
Yusa-dd ɣari wawař n SIDI, inna: 
“Cek, a mmis n bnadem, sgeɛɛed ijj n weẓri n wecḍan, x Ṣur. 
Ini i Ṣur, tandint i din izeddɣen ɣar tewwura n řebḥar, tandint nni ittsebbaben ak-d řegnus nni izeddɣen di tegzirin aṭṭas: ‘Ammu i iqqar Sidi inu, SIDI: A Ṣur, cem teqqared: Necc aqa ayi nican deg waẓri!’ 
Iseɣwan n uyeřzim nnem aqa aten deg wuř n řebḥur, inni cem ibnan aqa ggin aẓri nnem nican. 
Marra tiřwiḥin n tfeřwin n tɣarruba nnem ggin tent i cem di tnayen zi tcejjura n umerzi, iwyen ticejjura n tengelt zi Lubnan, maḥend ad am ggen tiḥenya i řbaccat. 
Zi tcejjura n řbeǧuḍ n Bacan ggin řemqadef nnem, řbankuwat nnem i iqeddafen aqa atent zi řɛaj ittwagg deg ukeccud n tengelt, iwyen t zi tegzirin n ayt n Kittim.    
Řbacc nnem tuɣa-t s řeqṭen azdad zi Miṣra, xeyyḍen t s waṭṭas n tintat. Řbacc tuɣa i cem d taɛeǧant, tasqift n uqiḍun nnem tuɣa-tt zeg ufiřu udehmani d arjuwani zi tegzirin n Ilica. 
Imezdaɣ n Ṣidun u n Arwad tuɣa aten d iqeddafen nnem. Imiɣisen nnem, a Ṣur, nni dayem iǧan, tuɣa aten d ineddahen nnem. 
Iwessura n Jubayl d imiɣisen nnes tuɣa aten dayem, ɛeddřen marra tizza nnem. Marra tiɣarruba n řebḥar d ibeḥriyyen nsen usin-dd ɣarem ḥima ad kidem sebbeben. 
Ayt n Lfurṣ, n Lud u n Fuṭ tuɣa aten di řɛeskar nnem, iryazen iɛeskariyyen. Uyřen dayem taseddart nsen d lkask nsen uca wcin am řɛezz. 
Ayt n Arwad d řɛeskar nnem tuɣa aten x řeḥyuḍ nnem uca Igammadiyyen, ayt n bu-teryast nnem, bedden x ssumɛat nnem. Tiseddariyyen nsen iqesḥen n useřqi i tuɣa uyřent deg wenneḍ x řeḥyuḍ, arnint deg waẓri nnem aṭṭas. 
Tarcis tuɣa tᵉttsebbab akidem i ssibbet n ufeyyeḍ n ɛřam kuř igeřwan. Nitni wcin am nnuqart, uzzař, astanyu d řexfif di ṭṭweɛ n sseřɛet nni d asen tezzenzed. 
Yawan d Tubal d Macix tuɣa aten d isebbaben nnem. Nitni wcin am řeɛmur n iwdan d řeqcuɛ n nnḥas di ṭṭweɛ n sseřɛet nnem. 
Zi taddart n ijeǧiden n Tujarma wcin am yiysan d imnayen d iserdan di ṭṭweɛ n sseřɛet nni d asen tezzenzed. 
Arraw n Dadan tuɣa aten d isebbaben di ṭṭweɛ nnem. Aṭṭas n tegzirin tuɣa xsent ad ṭṭfent sseřɛet zeg ufus nnem. Tiɣmas timeqqranin n řfiř d ukeccuḍ n webnus arrint am tent-i-dd d arriɣaluten. 
Aram tuɣa ittsebbab akidem x waṭṭas n řeqcuɛ i tṣennɛed. Nitni wcin am karbunkel d ajurwani d lburḍa s tintat ifarzen d řeqṭen azdad d řmarjan d řeɛqaq izeggwaɣen di ṭṭweɛ n sseřɛet nni d asen tqeddmed. 
Yahuda d temmurt n Israil tuɣa ttsebbaben akidem. Nitni wcin am yimendi zi Minnit uřa d ḥalawit, tamment, zzect d balsam di ṭṭweɛ n sseřɛet nnem. 
Dimacq tuɣa ittsebbab akidem deg waṭṭas n řeqcuɛ i tṣennɛed, x marra igeřwan nnem, s binu n Xilbun d tḍuft tacemřařt. 
Di ṭṭweɛ n sseřɛet nni d asen tezzenzed, wcin am Wadan d Yawan uzzař n wemziř d qassiya d uɣanim aḥemmum ittfuḥen zi Uzal. 
Dadan tuɣa ittsebbab akidem s werruḍ n tbardiwin i uneddah. 
Iɛraben di řwaṭat d marra řḥukkam n Qidar tuɣa ttsebbaben akidem. Deg izemrawen d icarriyyen d iɣayḍen tuɣa ttsebbaben akidem. 
Isebbaben n Caba d yinni n Raɛma tuɣa aten d isebbaben nnem. Nitni wcin řemxeyyer n řeɛṭur d ɛřam kuř iẓra iɣřan d wureɣ di ṭṭweɛ n sseřɛat nni d asen tqeddmed. 
Ḥaran d Kinna d Ɛadan, isebbaben n Caba, Accur d Kilmad, tuɣa ttsebbaben akidem. 
Nitni tuɣa ttsebbaben akidem deg řeɛbayat icennɛen d iseřhamen ideḥmiyyen d lburḍat tiqarqacin u di řkettan iɣřan s ifiřan n tintat ifarzen nni iǧan jar sseřɛet nnem s tesɣunin ijehden ittwamuden. 
Iɣarruba n Tarcic tuɣa aten d ikaravanen nnem d sseřɛet nnem. Tuɣa cem dinni, teccured u tdeqřed aṭṭas deg wuř n řebḥur. 
Iqeddafen nnem iwyen cem ɣar waman yuɛřan, asemmiḍ zi ccarq yarẓa cem deg wuř n řebḥur. 
Igeřwan nnem d sseřɛet nni tezzenzed d tsebbabt nnem, ibeḥriyyen nnem d ineddahen nnem d yinni iɛeddřen tireẓẓa nnem, d isebbaben nni ittsebbaben akidem, d marra iɛeskariyyen inni akidem u ak-d marra agraw di řwesṭ nnem, ad wḍan marra deg wuř n řebḥur deg wass n uweṭṭu nnem. 
Zi řḥess n tɣuyyit n ineddahen nnem ad arjijen dcurat nnem. 
Ad hwan zi tɣarruba marra inni iṭṭfen timeqdafin, marra ibeḥriyyen d marra ineddahen nnem. Nitni ad bedden x temmurt, 
uca ad ssgeɛɛden tmijja nsen, ad sɣuyen s imeṭṭawen imarzagen, ad nḍaren acař x izeǧifen nsen, ad zuzzaren iɣɣeḍ x yixef nsen, 
uca ad ḥeffen ixef nsen zi ssibbet nnem. Nitni ad beysen s txuncay n wecḍan uca ad xam run s řeɛmar iccur s tarzugi u ad ssgeɛɛden ict n tɣuyyit tamerzagt. 
Am ttweḥwiḥen ad xam ssgeɛɛden ijj n izři n wecḍan, uca ad xam wten agejdur, ad inin: Man wen iǧan am Ṣur, am tendint ittwahedmen di řwesṭ n řebḥar? 
Řami dd-iwyen sseřɛet nnem zeg ujemmaḍ n řebḥur, tuɣa tessjiwned aṭṭas n řegnus. S waṭṭas n igeřwan nnem d tsebbabt nnem tarrid ijeǧiden n temmurt d ttwajaren. 
Di tsaɛɛet nni di tᵉttwarẓed s řebḥur, di řmehmud n waman, tuɣa tewḍa tsebbabt nnem marra u marra agraw i ɣarem di řebḥar. 
Marra imezdaɣ n tegzirin ttbehten u ijeǧiden nsen ttarjifen, ttnexřaɛen udmawen nsen. 
Isebbaben jar řegnus ad xam ṣeffaren, aqa tdewřed d ijj n umedya i warjef, uca war tᵉttiřid ɛad i řebda.’” 
