﻿Ḥizqiyal.
23.
Yusa-dd ɣari wawař n SIDI, inna: 
“A mmis n bnadem, tuɣa din tnayen n temɣarin, yessis n ict n temɣart. 
Nitenti ssfesdent ixef nsen di Miṣra, di temẓi nsent ssfesdent ixef nsent. Din tuɣa ɛebzent deg idmaren nsent uca din ḥadan ibbac nsent iɛuzryen. 
Ismawen nsent tuɣa Uhula, tameqqrant nsent, d učmas Uhuliba. Nitenti dewřent inu uca urwent iḥenjiren d tḥenjirin. Ina d ismawen nsent: Samarya d Uhula, u Urcalim d Uhuliba. 
Uhula tessefsed ixef nnes ɣari u teɛceq inni tt ittexsen, ayt n Accur, jjiran nnes, 
iryazen nni arḍen arruḍ adeḥmi, lwulat d imḍebbaren, marra iḥudriyyen icennɛen, imnayen nni yenyin s uyis. 
S farq-ccɣeř nnes tewca ixef nnes i nitni, ɣar řemxeyyar n ayt n Accur, ɣar marra nitni uca nettat tᵉttwassexmej s marra wi tᵉttexs, s marra imeyḍa nsen n ṣṣanam. 
Nettat war tejji farq-ccɣeř nnes ak-d Imiṣriyyen, minzi di temẓi nnes ṭṭsen akides uca ḥadan ibbac nnes iɛuzryen uca ssfarrɣen xas farq-ccɣeř nsen.” 
“S uya wciɣ tt deg ufus n yinni tuɣa tt ittexsen, deg ufus n ayt n Accur i tuɣa teɛceq. 
Nitni ssɛarran řɛar nnes uca kksen iḥenjiren nnes d tḥenjirin nnes uca nɣin tt s ssif. Tedweř as ijj n yisem war icniɛ jar temɣarin uca nitni ssiwḍen xas řeḥkamat.” 
“Umi teẓra man aya učmas, Uhuliba, aqa tarni ɛad deg weɛceq nnes uca tarni uřa di farq-ccɣeř nnes ktar x farq-ccɣeř n učmas. 
Nettat teɛceq ayt n Accur, lwulat d imḍebbaren, jjiran nni yarḍen arruḍ d lemliḥ qaɛ, imnayen nni yenyin x yeysan, marra iḥudriyyen icennɛen. 
Ẓriɣ aqa nettat tessexmej ixef nnes. Nitenti s tnayen idsent uyurent abrid d ijjen. 
maca nettat tarni ɛad di farq-ccɣeř nnes. Umi teẓra iryazen, ḥenncen ten x řḥiḍ, tṣawar n yeryazen, arcamen di tintat tizeggʷaɣin, 
beysen s webyas ɣar tejɛinnatin nsen, s ireẓẓat s tintat ifarqen x izeǧifen nsen, marra ɣarsen ccuf am yineɣrafen n řɛeskar, arewsen di ayt n Babil, iryazen zi temmurt n Ikaldaniyyen, tammurt mani xeřqen. 
Ammu i tedweř nettat tᵉttexs i-ten umi tiṭṭawin nnes ẓrint ten uca nettat tessekk ɣarsen ireqqasen, ɣar temmurt n Ikaldaniyyen. 
Usin-dd ɣares ayt n Babil maḥend ad ṭṭṣen akides di qama n tmexsa uca ssxemjen tt s farq-ccɣeř nsen uca nettat tessexmej ixef nnes zzaysen. Xenni iggʷej xasen řeɛmar nnes. 
Tessefsed nettat ixef nnes s bṭayṭay uca tessɛarra řɛar nnes. Xenni iggʷej xas řeɛmar inu am mammec tuɣa iggʷej řeɛmar inu uřa x učmas. 
Tessefsed ixef nnes aṭṭas umi teɛqeř x wussan n temẓi nnes řami tuɣa tessefsed ixef nnes di temmurt n Miṣra. 
Nettat teɛceq inni tt ittexsen, inni aysum nsen am weysum n iɣyař u inni adɛaq nsen am wedɛaq n iysan. 
Aqa teɛqeb-dd ɣar řefḍihet n temẓi nnem, ařami Imiṣriyyen ḥadan idmaren nnem n temẓi.” 
“S uya, Uhuliba, ammu i iqqar Sidi inu, SIDI: ‘Xzar, Necc ad xam ssekkareɣ inni cem ittexsen i x tuɣa iggʷej řeɛmar nnem uca ad ggeɣ ad xam dd-asen zeg wenneḍ nnem: 
tarwa n Babil d marra Ikaldaniyyen, imeḥḍayen d imcennɛen d tarwa n taṣiřet u marra ayt n Accur akidsen, iḥudriyyen ijebbden meẓri, lwulat, marra nitni d imḍebbaren, ineɣrafen n řɛeskar d yeryazen s yisem, aqa marra nitni d imnayen inni yenyin x yeysan. 
Nitni ad xam dd-usin s ikarruten i umenɣi ak-d tjarrarin iqarqben u s ijj n wegraw n řegnus, s tseddariyin n uɛeskari timeqqranin d tseddariyin timeẓyanin, uřa s lkask x uzeǧif. Nitni ad ssbedden ixef nsen deg wenneḍ nnem u Necc ad asen wceɣ ddeɛwet u nitni ad cem ḥekmen ɛlaḥsab ccariɛa nsen. 
Necc ad ggeɣ tusmi inu iqeddsen ḍidd i cem uca nitni ad zzayem ggen s wesɛar. Nitni ad qqsen tinzarin nnem d tiṭṭawin nnem uca min zzayem iqqimen ad iwḍa s ssif. Nitni ad kksen iḥenjiren nnem d yessim nnem uca min iqqimen ad ittwacc s tmessi. 
Ad kksen arruḍ nnem uca ad kksen řehzuṭ nnem. 
Ammu i ɣa ssbeddeɣ řefḍiḥet nnem uřa d farq-ccɣeř nnem zi temmurt n Miṣra uca war ɣarsen tessgiɛɛded ɛad tiṭṭawin nnem u war tidared ɛad Miṣra.’ 
Minzi ammu i iqqar Sidi inu, SIDI: ‘Xzar, Necc ad cem ggeɣ deg ufus n yinni cem icarrhen, deg ufus n yinni i x tuɣa iggʷej řeɛmar nnem. 
Ad zzayem ggen am wecrah nsen u ad kksen marra i umi tarbred uca ad cem jjen awarni asen tᵉttwaɛarrid d tuɛaryant ařami ittwaɛarra řɛar n farq-ccɣeř nnem uřa d řefḍihet nnem d farq-ccɣeř nnem. 
Ad zzayem ggen aya minzi teḍfared řegnus am iggur bnadem awarni i temɣart n farq-ccɣeř u minzi tessxemjed ixef nnem s imeyḍa n ṣṣanam nsen. 
Tuyured deg webrid n učmam, uca ad am wceɣ řkas nnes deg ufus nnem.’” 
“Ammu i iqqar Sidi inu, SIDI: ‘Ad teswed řkas n učmam wenni yuǧɣen u iwesɛen, ařami řqedd nnes ad yarr řɛedyan ad zzayem dehcen s řḥegra u ad zzayem stehzan. 
Ad teccured s wescar d wecḍan. Řkas n učmam Samarya d ijj n řkas n unexřiɛ d wareddeǧ. 
Ad t teswed uca ad t tẓemmed, ad tɣezzed cquf nnes uca ad tqebced zzayes idmaren nnem, minzi Necc nniɣ t!’, ammu i iqqar Sidi inu, SIDI. 
‘S uya, ammu i iqqar Sidi inu, SIDI: ‘Umi dayi tᵉttud uca temmenḍared ayi awarni i weɛrur nnem, s uya ittxeṣṣa cem ad tarbud s yixef nnem uřa d řefḍiḥet nnem d farq-ccɣeř nnem.’” 
Inna ayi SIDI: “A mmis n bnadem, ma texsed ad tcarrɛed Uhula d Uhuliba? Ini asent xenni jjɛayef nsent. 
Minzi zennant uca idammen řeṣqen ɣar ifassen nsent u zennant ak-d imeyḍa n l’aṣnam nsent. Sennej i uya arrint iḥenjiren nsent, inni urwent i Necc, ad ẓwan timessi d macca i imeyḍa n l’aṣnam nsent. 
Marra aya ggint dayi: deg wass nni ssxemjent nitenti Zzawect inu Iqeddsen uca ssɛiǧtent ussan inu n ssebt. 
Minzi umi ɣarṣen i tarwa nsent i imeyḍa nsent n l’aṣnam, usint-i-dd deg wass nni simant nnes di Zzawect inu Iqeddsen maḥend ad tt ssɛiǧtent. Xzar, ammu i ggint di řwesṭ n Taddart inu. 
Ɛad ssekkent x yeryazen i dd-yusin zi řaggʷaj. Ssekken areqqas ɣarsen, u xzar, usin-dd nitni, inni i x tessirded ixef nnem, i x tkulared tiṭṭawin nnem uca thezṭed s telwizt. 
Teqqimed x ijj n řectu yecna, tuɣa zzates ṭṭabřa isswejden i x tessarsed řebxur inu d zzect inu. 
Řami issusem řḥess n řɣaci inhewřen nni din ɣares, ttwanedhen iskarjiyyen zi řexřa ɣar yeryazen nni iǧan zi řɣaci n iwdan, uca nitni ggin timeqyasin ɣar ifassen nsent uřa d ijj n tajj izewwqen x izeǧifen nsent. 
Xenni nniɣ Necc: Aqa aten zennan ak-d ict n temɣart n farq-ccɣeř dduysaren. Řexxu farq-ccɣeř nnes simant nnes ad issefsed ixef nnes uca nettat tuyur akides dayes. 
Nitni udfen xas am udfen x ict n temɣart n farq-ccɣeř. Ammu udfen x Uhula u x Uhuliba, timɣarin nni ittwafeḍḥen. 
Iryazen iseggden ad tent ḥekmen ɛlaḥsab řḥeqq n tinni izennan u ɛlaḥsab řḥeqq n tinni issizzařen idammen, minzi nitenti d timɣarin izennan uca idammen řeṣqen ɣar ifassen nsent.” 
“Minzi ammu i iqqar Sidi inu, SIDI: ‘Necc ad xasent ssekkareɣ ijj n wegraw uca ad tent arreɣ d ict n řqecɛet n unexřiɛ d takeccaḍt. 
Agraw n řgens ad tent yarjem uca ad tent qeḍɛen s řesyuf. Iḥenjiren nsent d tḥenjirin nsent ad ten nɣen uca ad sscemḍen tudrin nsent s tmessi. 
Ammu i ɣa ssbeddeɣ řefḍayeḥ nsent di temmurt ařami ɣa ttwaɛeřment marra timɣarin uca war tteggent ɛad am řefḍayeḥ nsent. 
Ammu i xakent ɣa ggen řefḍiḥet nkent uca ad tarbunt ddnub n weɛbed n imeyḍa nkent n l’aṣnam uca ad tessnent, aqa Necc Sidi d SIDI!’” 
